Anyandera 31 - AHYERƐLƐ KRONGRON

Ɛhene biala hia foɛtulɛ

¹ Ɛhe te Nana Lemuel noa dwirɛ, foɛ bɔ ye maame tuli ye ɔ:

² Nzu ɔ, mma bienzua, me kunu ba, nzu ɔ? Nzu ɔ, mma bienzua bɔ ɔnate bɔhyɛ so yeɛ nwole wɔ ɔ?

³ Nnɛsɛkye w’anwoserɛ wɔ mmrasua nwo, nnɛfa wɔ nwo ma bɛ bɔ bɛma ahemvo mɔ bɛtɔ ase ne.

⁴ O Lemuel, ɔtte mayee mma ahemvo mɔ kyɛ bɛkɔno nzaa ɔ, ɔtte mayee mma ahemvo mɔ; anaa maenbulɛfoɛ kyɛ bekohuro nzaa serɛ ɔ;

⁵ bɛno a, anyɔ a bɛ wora kofi mmeraa ne, na bekobua ebiala bɔ ɔyɛ anwumvo ɔ ndɛengyea.

⁶ Fa nzaa serɛ ma sona bɔ ɔla awusu ɔ, ná fa bobe nzaa ma sona bɔ odi aworabɔlɛ ɔ.

⁷ Maa ɔno ma ye wora fi ye anwokyere ne, ná wangaye amaneɛ bɔ ɔfa nu ne ko.

⁸ Kã bie ma bɛ bɔ bɛ noa ndwu dwaa nu ɔ, nea kyɛ ebiala bɔ ɔyɛ anwumvo ne bengosisi ye ɔ.

⁹ Te wɔ noa dwudwo, bua ndɛen bɔ ɔtengyɛ ɔ, di ehiafoɛ ne bɛ bɔ bɛyɛ anwumvo ɔ bɛ dwirɛ ma bɛ.

Braa paa nwo ayɛyelɛ

¹⁰ Braa paa, nwa yeɛ okonya ɔ? Odi mu tra agudeɛ bɔkɔɔ.

¹¹ Ohu fa ye wora wura ye nu, na ɔnate so ohu nhia hwee.

¹² Ɔyɛ ohu paa bɔ ɔmva edwirɛ tɛɛ biala nni ye, mmerɛ biala bɔ braa ne te ase ɔ.

¹³ Ɔpena boaen nwiaa ne gyese si atee, na ofia ye kunu ɔfa ye sa yɔ adwuma.

¹⁴ Ɔte kyɛ dwadiniɛ ye lɛen mɔ, ɔfa ye aleɛ fi dedeede ba.

¹⁵ Ɔpɛ aleɛ dwɔso, ɔyɛ aleɛ ma ye awuro ama, na okyire ye mmaawa mɔ adwuma maa bɛyɔ.

¹⁶ Ɔfa sie ye nye so kyɛ ɔkɔtɔ aseɛ, na ɔtɔ, na sikaa bɔ onya fi ye sa noa adwuma nu ne, ɔfa yɛ bobe boo.

¹⁷ Ɔyere ye nwo yɔ adwuma, na ɔbɔ ye nwo mmɔden wɔ adwumayɔlɛ nu.

¹⁸ Onwu kyɛ ye adwuma kɔ so, na ye kanea nnua kɔngɔen.

¹⁹ Ɔsɔ bakaa bɔ bɛfa bɛnwo gyese ne anu, na ɔfa ye sa sosɔ kyekye ne anu.

²⁰ Ɔma ye sa sõ ehiafoɛ so, na ɔboka bɛ bɔ bɛyɛ anwumvo ɔ.

²¹ Sɛ asukɔtwea tɔ a, ye kunu ndete ye wɔ ye awuro ama nwo, ofikyɛ ye awuro ama mukoraa bɛhera kundu nyɔboɛ serɛ nyemenenyemene.

²² Ɔnwo ye bɔbɔ ye bomo, ɔhera nwera paa ne kende.

²³ Ohu te sona bɔ mmenia bu ye badwa nu ɔ, na kuro berɛ mbanyi bɛbɔ dwaa a, ɔte nu bie.

²⁴ Ɔnwo nwera ndaadeɛ tɔne ye, na ye berɛ yeɛ dwadifoɛ betu abɔsoɛ ɔ.

²⁵ Anwoserɛ ne anidie te ye tena bɔ ɔkera ɔ, na mmerɛ bɔ ɔla ye nyunu ne, odi ye nwo ahurusi.

²⁶ Odwudwo nworɛ nu, na otu paayɛlɛ nwo foɛ.

²⁷ Ɔnea toto bɔ ɔkɔ so wɔ ye awuro ɔ yé, na ɔtte foen wɔ nikyee biala nwo.

²⁸ Ye mma dwɔso gyina, na bɛfrɛ ye “Saleɛ braa,” na ohu koso ɔye ye ayɛ kyɛ,

²⁹ “Mmrasua pee bɛte mmrasua bɔ begya bɛ ɔ, nakoso wɔ de, ɛpɛ bɛ mukoraa.”

³⁰ Sokooyɛlɛ te nnakannaka, yeɛ anwonyemene te mbaen, nakoso brasua bɔ osuro AWURADE de, ɔfata kyɛ bɛye ye ayɛ.

³¹ Adwuma bɔ wayɔ ne, ɛ́mɔbɔ ye aba so, bɔ wayɔ ne, ɛ́mɔma onya ye nwo animnyam wɔ badwa nu.