Anyandera 30 - AHYERƐLƐ KRONGRON

Agure noa dwirɛ

¹ Yake awa Agure noa dwirɛ bɔ ɔte ngɔmhyɛlɛ ne, ye ɛhe. Biaa ne sele Yitiɛl, osele Yitiɛl ne Yukale kyɛ,

² Nahorɛ nu, nde sona mbaen bɔ nnde sona ɔ; nimdeɛ bɔ sona le ye ne, nnne bie.

³ Nnzuane nworɛ, yeɛ Krongronniɛ ne koso, nnne ye nwo nimdeɛ biala.

⁴ Nwa yeɛ wafo wahɔ nyameɛso ná wadwu wawa ɔ? Nwa yeɛ waboaboa mvrama noa wɔ ye sa nu ɔ? Nwa yeɛ ɔfa ɛtena ɔbɔ nzue mɔ nonongu ɔ? Nwa yeɛ wafa aseɛ ye ti ne ye ti amukoraa wasiesie berɛ ɔ? Ye dumaa li sɛɛ, yeɛ ɔwa wora ye dumaa li sɛɛ? Sɛ ɛse a, kã kyire me e!

⁵ Nyameɛ noa dwirɛ biala te sannwuu, ɔte akokyɛm ma bɛ bɔ bɛfa bɛ wora bewura ye nu ɔ.

⁶ Nnɛfa edwirɛ biala boka ye noa dwirɛ ne aso, ɔba ye sɔ a, okohwi wɔ nyunu maa bekonwu kyɛ ɛte anoanu.

⁷ Nningyein nyɔ yeɛ mesrɛ mefi wɔ berɛ ɔ: nnɛfa bɔ me atianuserɛ koraka né mawu.

⁸ Ye bra mbaen mbaen ne nnakannaka fi me so kɔ dedeede, nnɛmaa medi hiaa, yeɛ nnɛmaa menya me nwo tam, na mmom, ma me me noa aleɛ bɔ mehia ɔ;

⁹ amaa ɔnate so mannya me nwo tam, ná mambo wɔ manga kyɛ, “Nwa ole AWURADE?” Afei koso, ná wanhia me ma manwua, ná mamva fiɛ manga me Nyameɛ dumaa.

¹⁰ Nnɛkã akoaa nwo dwirɛ tɛɛ kyire ye mene, ɛyɔ sɔ a, ɔkɔwa wɔ amoen, na ekoli fɔ.

¹¹ Mmenia biemɔ wɔ berɛ a, bɛnoma bɛ baba, yeɛ bɛnga kyɛ bɛ maame onya saleɛ.

¹² Mmenia biemɔ wɔ berɛ a, bebu bɛ nwo kyɛ bɛ nwo te, nakoso bɛ bɔne mata bɛ, bɔ yeɛ bɛ nwo nde ɔ.

¹³ Mmenia biemɔ wɔ berɛ a, bɛ nye nzɔ sona, na bɛ nye tra bɛ ndo nwiaa!

¹⁴ Mmenia biemɔ wɔ berɛ a, bɛ gye te kyɛ ngrandɛ, bɛ gye bɔ ɔwɔ bɛ nnaalɔ dɔ ne, ɔte kyɛ dadeɛ ba, bɔ bɛfa bekuku mmenia bɔ bɛyɛ anwumvo ɔ befi aseɛ ye aso, ɔne ehiafoɛ befi adasa nu ɔ.

¹⁵ Miminɛ le mmaa mmrasua nyɔ bɔ bɛteatea nu kyɛ, “Fa ma me! Fa ma me!” Nningyein nza biemɔ wɔ berɛ bɔ bɛ ko nyi le ɔ; yoo, nningyein nna biemɔ wɔ berɛ bɔ bɛ de bɛnga kyɛ, “Ɔte paa, me ko ayi” ɔ.

¹⁶ Bɛ ole: Ɛborɔ, koɛ bɔ ɔte mmotaen, aseɛ bɔ ɔmeme nzue a ɔnde ye, yeɛ see bɔ ɔnga kyɛ, “Ɔte paa, maa nnua” ɔ.

¹⁷ Anyeɛ bɔ ɔgoro ye baba anwo, ɔne bɔ ɔpo kyɛ okotie ye maame dwirɛ ne, bɔnza nu anene mɔ kotutu sɔ anyeɛ ne, na kɔleɛ mma mɔ kosuso koli.

¹⁸ Nningyein nza yeɛ bɛyɛ me nwanwa paa ɔ; yoo, nna de, mende ye bo. Bɛ ole:

¹⁹ kɔleɛ atee bɔ otu fa so wɔ ewienu ɔ, ewoo atee bɔ ɔnate so wɔ nyɔbotaen so ɔ, ɛlɛen atee bɔ ɔnate so wɔ ɛpo so ɔ, atee bɔ bienzua ne taluwa b’adwene si yia wɔ ehurolɛ nu ɔ.

²⁰ Brasua bɔ ɔsɛkye agyaa ne, sɔaa yeɛ ye suban te ɔ: odidi, ná afei waprapra ye noa nwo wahã kyɛ, “Nnyɔle bɔne biala.”

²¹ Nningyein nza yeɛ ɔma aseɛ woso ɔ, yeɛ nningyein nna yeɛ ɔngora ye noa gyina ɔ. Bɛ ole:

²² Kanganiɛ bɔ okoli hene ɔ, kwaseaa bɔ okodidi kɔma ye ko koyi ɔ,

²³ brasua bɔ benguro ye ná afei wanya biaa wagya ɔ, yeɛ abaawa bɔ okoli ye mene brasua bia ɔ.

²⁴ Nningyein nna biemɔ wɔ aseɛ ye aso bɔ bɛte mmaa mmaa, nakoso bɛte nworɛfoɛ paa. Bɛ ɛhe:

²⁵ Ngyiregyiraa te ngaka bɔ bɛ nwo nyɛ se ɔ, nakoso wawa pe a yeɛ bɛpena b’aleɛ besie ɔ;

²⁶ Amoakua mɔ bɛte ngaka bɔ bɛ nwo nyɛ se ɔ, nakoso bɛpɛ bɛ bɔen wɔ nyɔboɛ nyɔboɛ nu;

²⁷ Mmɛbɛ mɔ belle hene biala, nakoso sɛ bɛ mukoraa besi nu bɛkɔ a, bɛ nnidisoɛ ne te dibea dibea;

²⁸ sona kora kye laleɛ ɔfa tira ye sa nu, nakoso ahemvie yeɛ laleɛ mɔ bɛwɔ ɔ.

²⁹ Nningyein nza yeɛ bɛ natelɛ yɛ nyemene ɔ, amba, nna de, bɛ gya tutulɛ yɛ ahomeka. Bɛ ole:

³⁰ Gyata, bɔ ye nwo yɛ se tra ngaka amukoraati, bɔ ɔnnwati mvi ebiala nyunu ɔ,

³¹ akɔnyima, abɔngye nyii, yeɛ ɛhene bɔ bɛyyɛle ye so ɛlɔen biala ɔ.

³² Sɛ ayɛ kwaseaa amoma wɔ nwo so, anaakyɛ abɔ porɛ tɛɛ a, ye de fa wɔ sa to wɔ noa.

³³ Kyɛbɔ betwi nandwie nyɔfonesue maa ɔbɔ kunguma, ná bemia bonyi pee a mogya fi nu ba ne, sɔ ala yeɛ sɛ ehu sona ahone a, ngondii si ɔ.