Anyandera 3 - AHYERƐLƐ KRONGRONNyameɛ surolɛ nwo foɛtulɛ 1 Mma, nnɛma wɔ wora fi me foɛtulɛ ne, na mmom fa me mmeraa dwirɛ nemɔ sie wɔ ti anu; 2 ofikyɛ bɛkɔmaa ekonyi kɔhyɛ, ekonya ngoa tendenn, ná wayie wɔ yé. 3 Nnɛma pɛpɛɛpɛyɛlɛ ne nahorɛlilɛ bɛpa wɔ nwo, kyekye fa ya wɔ kɔme, ná kyerɛ ye wɔ w’ahone nu. 4 Na ɛhe kɔmaa Nyameɛ ne mmenia bɛkɔlo wɔ, ná babɔ wɔ dumaa paa. 5 Fa wɔ wora amukoraa wura AWURADE nu, na nnɛfa wɔ nwo to wɔ bɔbɔ wɔ nworɛ so. 6 Wɔ bra mukoraa, maa Nyameɛ bra nu, na okohyire wɔ atee maa ɛkɔfa so. 7 Nnɛbu wɔ nwo nworɛniɛ, suro AWURADE, ná twe wɔ nwo fi bɔne nwo. 8 Ɔkɔyɛ aporɛnuserɛ kɔma wɔ nwonaen, ɔne wɔ mmowue nu anwoserɛ. 9 Fa bɔ ele ye ɔ hyɛ AWURADE animnyam, wɔ fieso aleɛ bɔ ekoli moa kɔfa amukoraa koso, 10 amaa ɔnate so aleɛ ayi wɔ pata mɔ so tɛkyɛtɛkyɛɛ, na wɔ kumaa bɔ etwi nzaa nu ne, nzaa koyi kobu kɔfa so. 11 Mma, ɔyɛ a nnɛpo AWURADE tealɛ bɔ ɔfa tengyɛtengyɛ wɔ ne, yeɛ sɛ ɔkã wɔ nyunu a, nnɛmaa ɔyɛ wɔ ahi, 12 ofikyɛ sona bɔ AWURADE kuro ye dwirɛ ne yeɛ ɔkã ye nyunu ɔ, kyɛbɔ seɛ ɔyɛ ɔwa bɔ ɔla ye ahone nwo ne ala. 13 Sona bɔ wapena nworɛ si atee wanwu ye ne, yeɛ sona bɔ onya ndeaseɛ ne, saleɛ te ye deɛ. 14 Ofikyɛ bɔ enya ye fi nu ne, ɔte paa tra ɛdwetɛ, yeɛ so mvasoɛ ne ɔte paa tra sikaa kɔkorɛ. 15 Nworɛ nyɔboɛ yɛ se tra agudeɛ, na bɔ wɔ nye gye ye nwo biala, ɛngɔhora ngɔfa ngɔtoto nworɛ nwo. 16 Ngoa tendenn wɔ ye sa famaa nu, yeɛ anwonya ne animnyam wɔ ye sa bɛen nu. 17 Ye atee te anika atee, na ye saa amukoraa te asomdwee. 18 Ɔte ngoa bakaa ma bɛ bɔ betira ye nu ɔ, na bɛ bɔ bɛsɔ ye nu bum ne, benya saleɛ. 19 AWURADE nate nworɛ so yeɛ ɔbɔle aseɛ bo ɔ, ɔnate ndeaseɛ so yeɛ ɔfale ewienu sɛle berɛ ɔ; 20 ɔnate ye nimdeɛ so yeɛ buma mɔ nu nzue pu wale ɔ, yeɛ ɔnate so yeɛ munungum mɔ koso bɛpepe bosue begua ase ɔ. 21 Mma, fa nworɛ bɔ nu pi ɔ, ɔne adwene bɔ nu abukye ɔ sie, nnɛmaa befi wɔ nye so, 22 amaa ɔnate so bayɛ ngoa bama wɔ kra, ɔne animnyam bɔ ɔla wɔ kɔme ɔ. 23 Ɔba ye sɔ a, ɛkɔfa w’atee so asomdwee nu, na wɔ gya ngopoli. 24 Sɛ ɛkɔda a, engosuro, yeɛ sɛ ɛda a, wɔ nnaa kɔyɛ wɔ fɛ. 25 Nnɛsuro mvum nu ahunundetelɛ, anaa asane bɔ ɔto bɔnefoɛ ɔ. 26 Ofikyɛ AWURADE kɔyɛ w’anyelasoɛ, na ɔkɔbɔ wɔ nwo waen bɔ ɛngɔtɔ ngaen biala nu ɔ. 27 Sona bɔ ohia mmokalɛ ne, nnɛfa paayɛlɛ bɔ ye atianuserɛ, na sɛ ɛkɔhora kɔboka a, boka. 28 Nnɛkã kyire ebiɛngo kyɛ, “Kɔ bra, na ngɔfa ngɔma wɔ ɛhema,” wɔ aberɛ bɔ ele nikyee ne bie wɔ berɛ ɔ. 29 Nnɛbɔ ebiɛngo anwo porɛ tɛɛ, wɔ aberɛ bɔ ɔne wɔ bɛte ye asomdwee nu ɔ. 30 Nnɛne ebiala benya edwudwolɛ mbaen mbaen, wɔ aberɛ bɔ ɔyyɔle wɔ tɛɛ biala ɔ. 31 Nnɛma wɔ nye boro asisiefoɛ, yeɛ esaa bɔ bapɛ bato berɛ ne, nnɛfa nu biala so. 32 Ofikyɛ sona bɔ ɔte kanda ne, ɔte AWURADE akyiwadeɛ, nakoso teneneeniɛ de, AWURADE kã ye ti anu dwirɛ kyire ye. 33 AWURADE ɛnomalɛ wɔ bɔnefoɛ awuro nu, nakoso nekaa bɔ teneneeniɛ te de, oyira berɛ. 34 Nahorɛ nu, ɔgoro ngorohoɛfoɛ nwo, nakoso anwobrɛaseɛfoɛ de, ɔdo bɛ. 35 Animnyam kooli nworɛfoɛ bɛ sa nu, nakoso ngwaseafoɛ de, animguaseɛ kɔmata bɛ. |
Esahie Bible © Bible Society of Ghana, 2018.
Bible Society of Ghana