Anyandera 28 - AHYERƐLƐ KRONGRON

Saleɛ ne ɛnomalɛ

¹ Bɔnefoɛ nwati wɔ aberɛ bɔ ebiala mvoa ye ɔ, na teneneeniɛ de, ye hue yɛ se te kyɛ gyata.

² Sɛ mmeraatolɛ wɔ maen nu a, nu maenbulɛfoɛ bɛyɛ pee; nakoso sɛ onya maenbulɛniɛ nimdeɛniɛ bɔ ɔte badwemma a, nu dwo fɔnwoo maa ogyina ye gya so.

³ Ehianiɛ bɔ okosisi ehianiɛ ne, ɔte kyɛ esue bɔ ɔtɔ titititi sɛkye eboo nu aleɛ ɔ.

⁴ Bɛ bɔ bɛmva mmeraa bɛnyɛ huu ne, bɛbɔ bɔnefoɛ aba so, nakoso bɛ bɔ bedi mmeraa so ne de, bɛko betia bɔnefoɛ.

⁵ Bɔnefoɛ nde pɛpɛɛpɛyɛlɛ bo, nakoso bɛ bɔ bɛpena AWURADE si atee ne de, bɛte ye mukoraa bo.

⁶ Ehianiɛ bɔ ye bra te sannwuu ne, ɔte paa tra sikaniɛ bɔ ye suban ɔtte mayee ɔ.

⁷ Ebiala bɔ odi mmeraa so ne, ɔte baa nworɛniɛ, nakoso bɔ ɔfa ye nwo bɔ asanzafoɛ ne de, ɔtwetwe animguaseɛ brɛ ɔse.

⁸ Sona bɔ ɔnate aminɛlilɛ ne bosea nwo nzihoɛ so onya ye nwo ne, ye anwonya bɔ ɔboaboa ye noa ne, okodi ebie bɔ ɔse ehiafoɛ anwumvoin ɔ ye berɛ.

⁹ Sɛ ebie prapra ye so asi wɔ mmeraa ne anwo a, ye mbaeɛ po ɔte akyiwadeɛ.

¹⁰ Ebiala bɔ odiedie teneneefoɛ maa bɛyɔ bɔne ne, ɔkɔtɔ ye bɔbɔ ye kumaa bɔ wafu ɔ nu; nakoso bɛ bɔ bɛ bra te sannwuu ne de, okoyie bɛ yé.

¹¹ Sikaniɛ bu ye nwo kyɛ ɔte nworɛniɛ, nakoso ehianiɛ bɔ ɔte badwemma ne de, ɔma sikaniɛ ne bo da so.

¹² Teneneefoɛ di ngonim a, ɔte anigye piri, nakoso sɛ bɔnefoɛ nya tumi a, mmenia nwati bɛkɔfea.

¹³ Ebiala bɔ ɔkata ye mmeraatolɛ so ne, ongoyie ye yé, nakoso bɔ ɔkã, ná ɔyakyi ye yɔlɛ ne, bekonwu ye anwumvoin.

¹⁴ Sona bɔ mmerɛ biala osuro Nyameɛ ne, onya saleɛ, nakoso bɔ ye so yɛ se ne de, musue kɔto ye.

¹⁵ Maen panyi bɔ ɔfa atianuserɛ di mmenia bɔ bɛyɛ anwumvo so ne, ɔte kyɛ gyata bɔ opo anaa kwabrafo bɔ ye nye aboro ɔ.

¹⁶ Maen panyi bɔ ɔnze nworɛ ne, ɔhyɛ ye mmenia so paa, nakoso bɔ okyi anwonya fiɛ ne de, okonyi kɔhyɛ.

¹⁷ Sɛ ebie di obiɛngo wue nwo fɔ a, ɔkɔnwati toonn kɔfa kɔhɔ ewue nu, na nnɛma ebiala si ye ate.

¹⁸ Sona bɔ odi nahorɛ ne, okonya ngoa, nakoso bɔ ɔnate atee tɛɛ so ne de, ye ayieleɛ koyie ye mvum nu.

¹⁹ Ebiala bɔ ɔyɔ ye aseɛ so boo ne, onya aleɛ pee, nakoso bɔ odi nningyein mbaen mbaen si ne de, ehiaa te mata ye.

²⁰ Nahorɛniɛ konya saleɛ pee, nakoso sona bɔ ɔpere ye nwo onya ye nwo ndɛndɛ ne de, ɔngɔfa ye nwo ngoli tɔtorɔtɔɔ.

²¹ Mmenia nu nyeyemuɛ ɔtte mayee, nakoso aleɛ kaaba bie po ɔkora ma sona yɔ bɔne.

²² Sona bɔ ɔperepere ye nwo nya ye nwo ne, ɔte anyeboroborolɛniɛ, na ɔndwene kyɛ ehiaa kɔwa ye so ɔ.

²³ Sona bɔ ebie yɔ tɛɛ a otwi ye nyunu ne, onya ye nyunu animnyam nziɛ ye tra ebie bɔ ɔfa ye noa kekã adɛfɛdɛfɛ dwirɛ ɔ.

²⁴ Ebiala bɔ owua ɔse ne oni, ná ose kyɛ, “Ɛhe de, nna mmeraatolɛ ɔ” ahɔ ne, obiɛngo ole awerɔm awueniɛ.

²⁵ Sona bɔ ye nye boro nikyee ne, ɔtwetwe ngondii ba, nakoso bɔ ɔfa ye wora wura AWURADE nu ne de, okoyie ye yé.

²⁶ Ebiala bɔ ɔfa ye nwo to ye nworɛ so ne, ɔte kwaseaa, nakoso ebiala bɔ ɔfa nworɛ to ye brabɔlɛ nwo ne, okonya ngoa.

²⁷ Sona bɔ ɔkyɛ ehiafoɛ nikyee ne, nikye fee nwo ngohia ye, nakoso bɔ okobu ye nye kogua bɛ mmokalɛ so ne de, amoenwaa pee kɔwa ye so.

²⁸ Bɔnefoɛ nya tumi a, mmenia nwati bɛkɔfea, na sɛ bɔnefoɛ bɛ boso nua a, teneneefoɛ bɛyɛ pee.