Anyandera 27 - AHYERƐLƐ KRONGRON

¹ Nnɛfa ɛhema hoahoa wɔ nwo, ofikyɛ ɛnze alehyeleɛ nu dwirɛ.

² Ma ebie ɔkamvo wɔ, wɔ bɔbɔ nnɛkamvo wɔ nwo, ma ebie mbaen ɔhã, wɔ bɔbɔ nnɛte wɔ noa kã.

³ Nyɔboɛ te kubuu, yeɛ anweaa nu yɛ no de, nakoso kwaseaa ye yaafɛlɛ tra bɛ munyɔ.

⁴ Ɛyaafɛlɛ ti anu yɛ se, yeɛ ahonehulɛ tra so, nakoso nwa yeɛ ɔkɔhora kogyina nungunɛ noa ɔ?

⁵ Ɛpakye nu etwi ebie nyunu a, ɔte paa tra kyɛ ekuro ye dwirɛ bɔ ɛnna ye ali ɔ.

⁶ Wɔ damvo twi wɔ nyunu a, nahorɛ wɔ nu, nakoso sɛ pɔfoɛ yɛ wɔ atuu po a, ɔte nnakannaka.

⁷ Sona ko yi a, woɛ nyɛ ye akɔnnɔ; nakoso bɔ ɛhɔen ku ye de, aleɛ weewee biala yɛ ye fɛ.

⁸ Sona bɔ ofi ye awuro kokyinikyini ne, ɔte kyɛ anomaa bɔ ofi ye saen nu kokyinikyini ɔ.

⁹ Kyɛbɔ sakyeɛfona ne ayirefona ma sona nye gye ne, sɔ ala yeɛ adamvoa nu fɛɛ, bɔ ɔte foɛtulɛ paa bɔ ɔfa ma wɔ te ɔ.

¹⁰ Nnɛpo wɔ damvo ne wɔ baba damvo; yeɛ sɛ edwirɛ to wɔ a, nnɛkɔ eliɛma awuro, na mmom sona bɔ ɔte pingye wɔ ne, ɔkɔhora kɔboka wɔ kɔtra eliɛma bɔ ɔwɔ dedeede ɔ.

¹¹ Mma, sua nworɛ ma me nye gye, amaa ɔnate so manya mmuayɛɛ mama ebiala bɔ okodwudwo kotia me ɔ.

¹² Badwemma nwu musue bɔ ɔkɔwa ɔ, na ɔtwe ye nwo kɔfea, nakoso bɛ bɔ b’adwene te nganga de, bɛfa bɛ ti bekowura nu benwu amaneɛ.

¹³ Sɛ ebie di ɛwɔfoɛ agyinamuɛ a, de sɔ sona ne tena fa sie, yeɛ sɛ odi ebie bɔ ofi maen bie aso agyinamuɛ a, de awowaa fa sie.

¹⁴ Ebiala bɔ ɔpɛ aleɛ teatea nu kã saleɛ dwirɛ kyire obiɛngo ne, bekobu ye dwirɛ ne kyɛ ɔte amoenwaa.

¹⁵ Braa bɔ okuro ngondii ne, ɔne asuso mmerɛ nzue bɔ ɔnyakyi pepenɛ ɔ bɛte pɛ.

¹⁶ Sɛ ɛpena kyɛ ɛma braa ne yakyi a, ɔte kyɛ ɛma mvrama yakyi tulɛ ɔ, anaa ɔte kyɛ ɛfa wɔ sa famaa ebuma ngoo ɔ.

¹⁷ Bɛfa buralɛ yeɛ besi buralɛ ɔ, na sɔ ala yeɛ sona ma sona adwene nu bukye ɔ.

¹⁸ Ebiala bɔ ɔnea borɔdoma bakaa so ne, odi ye mma ne bie, yeɛ bɔ ɔso ye mene ne koso, ye mene kɔhyɛ ye animnyam.

¹⁹ Kyɛbɔ sona nea nzue nu a onwu ye nyunu ne, sɔ ala yeɛ sona ye ti anu adwene okyire ye sona sue ɔ.

²⁰ Kyɛbɔ ɛborɔ ne Abadɔn bɛ ko nyi le ne, sɔ ala yeɛ kuro sona nye ɔneanea a ɔmvɛ ɔ.

²¹ Kyɛbɔ bɛfa bokyea bɛpɔ ɛdwetɛ nwo, ná bɛfa afaa bɛpɔ sikaa kɔkorɛ nwo ne, sɔ ala yeɛ bɛbɔ sona aba so a, benwu kyɛbɔ osi te ɔ.

²² Sɛ ɛfa dwɔmaa si kwaseaa ɛfra aburoo wɔ duwaa nu po a, ye gyiminɛ ne ngofi ye nu ngotu.

²³ Odi kyɛ enwu kyɛbɔ wɔ mmoaen b’aporɛnuserɛ osi te ɔ, yeɛ odi kyɛ ɛnea wɔ nyɛmmoa mɔ so yé;

²⁴ ofikyɛ anwonya ndena berɛ daa; na ahennie abotire, aso ɔkɔtena berɛ koodwu aworɛ ndoatoasoɛ amukoraa so?

²⁵ Sɛ bɛpɛ ɛserɛ, ná foforɛ fifi, ná bɛpɛ mmokaa nemɔ aso ndire bɛboaboa ye noa besie a,

²⁶ ye de ekonya mmoaen nwo nwiaa kɔfa kɔyɛ wɔ tena, ekonya mbɔngye kɔtɔne bɛ kɔfa kɔtɔ aseɛ;

²⁷ ekonya mbɔngye nyɔfonesue somaa kɔyɛ w’aleɛ, w’awuro ama aleɛ, ɔne w’afaneɛ mmaayaa mɔ bɛ noa aleɛ.