Anyandera 25 - AHYERƐLƐ KRONGRON

Solomon anyandera nemɔ bieku

¹ Ɛhemɔ koso te Solomon anyandera bɔ obuli, bɔ Yuda hene Hesekia ahyerɛlɛfoɛ bɛneane bɔ ɔwɔ berɛ daa ne aso bɛhyerɛ ɔ.

² Mvealeɛ nu dwirɛ te Nyameɛ ye animnyam, na ahemvo mɔ b’animnyam ole kyɛ bɛkɔfeefee edwirɛ nu ɔ.

³ Kyɛbɔ nyameɛso si wale kɔ anwuro, ná aseɛ bo dɔ kɔ kuronn ne, sɔ ala yeɛ sɛ ɛfeefee bɔ ɔwɔ ahemvo mɔ ti anu a ɔnyɛ yee ɔ.

⁴ Ye efiɛ ne fi ɛdwetɛ nu, na dwumvoɛ konya ye kɔfa koli adwii.

⁵ Foa bɔnefoɛ ne fi ɛhene ne nyunu, na ye ahennie bia kotimu wɔ tenenee nu.

⁶ Nnɛmoma wɔ nwo so wɔ ɛhene ne nyunu, yeɛ nnɛkogyina atitirefoɛ nekaa,

⁷ ofikyɛ ɔte paa kyɛ bekose wɔ kyɛ, “Bra anwuro faen,” tra kyɛ bekogua wɔ nyunu ase wɔ sona titire ne anyunu. Edwirɛ bɔ wɔ nye anwu ye ne,

⁸ nnɛpere wɔ nwo ndɛndɛ fa kɔ mbanyi gya so, ofikyɛ ɔkwaayie ye bo ne, sɛ ebiɛngo bu gua wɔ so ma wɔ nyunu gua ase a, ɛkɔyɛ ye sɛ?

⁹ Sɛ ɛne ebiɛngo benya dwirɛ a, ɛne ye ngome bɛhã, na ɔnzɛ kyɛ ɛsa ebiɛngo ne bo gua so;

¹⁰ ɔba ye sɔ a, ebiala bɔ ɔkɔte ne, okogua wɔ nyunu ase, na w’animguaseɛ ne ngofi wɔ so.

¹¹ Ɛkã edwirɛ wɔ mmerɛ bɔ ɔfata nu a, ɔte kyɛ sikaa kɔkorɛ bɔ bafa bali adwii bagua ɛdwetɛ nu ɔ.

¹² Sɛ nworɛniɛ tu wɔ foɛ ná ɛfa a, ɔte kyɛ sikaa kɔkorɛ asomade ne agudeɛ.

¹³ Kyɛbɔ asukɔtwea yurukuku ɔte wɔ ahuhuro mmerɛ bɔ bɛfa fieso aleɛ ne, sɔ ala yeɛ somafoɛ nahorɛniɛ ɔte ma bɛ bɔ bɛsomane ye ne ɔ, na ɔma ye mene mɔ bɛ kra nwo tɔ bɛ fɔnwoo.

¹⁴ Sona bɔ ɔhyɛ akyɛdeɛ nwo bɔ fa hoahoa ye nwo, nakoso onni so ne, ɔte kyɛ munungum ne mvrama bɔ bɛmva esue mma ɔ.

¹⁵ Enya aboterɛ a, ɔkora ma ndɛenbualɛniɛ kakyi ye adwene, yeɛ sɛ ɛyɛ wɔ noa bɛtɛɛ a, ɔkora ma maen mbanyi betie wɔ dwirɛ.

¹⁶ Sɛ enwu woɛ a, nnɛtafe ye adifuu, anyɔ a, ɔkɔfo wɔ boɛ so maa ɛkɔfe.

¹⁷ Nnɛyɛ eliɛngo awuro drɛdrɛ, anyɔ a, wɔ nwo kɔfone ye maa ɔkɔpɔ wɔ.

¹⁸ Sona bɔ okoli oliɛngo nwo adanzewia ne, ɔte kyɛ koɛ abopura, ngrandɛ ne agyaen nnaennaen.

¹⁹ Edwirɛ to wɔ ná ɛfa wɔ wora wura ngɔngɔnzaaniɛ nu a, ɔte kyɛ agyee bɔ ɔkekã ɔ, ɔne agyirɛ bɔ wafondo ɔ.

²⁰ Sɛ ɛto dwein kyire ebie bɔ ye wora abɔ a, ɔte kyɛ apa wɔ nwo tena wɔ ɛyerɛ mmerɛ nu, anaa ɔte kyɛ nzaa kekarekekare bɔ afa agua kena nu ɔ.

²¹ Sɛ ɛhɔen ku wɔ pɔfoɛ a, ma ye aleɛ ma oli, yeɛ sɛ nzuhɔen ku ye a, ma ye nzue ma ɔno;

²² ofikyɛ sɛ ɛyɔ sɔ a, né asuso see nzramaa agua ye ti afia, na AWURADE kɔma wɔ ye nwo akatuaa paa.

²³ Kyɛbɔ sorɔ dɔ mvrama fa esue ba ne, sɔ ala yeɛ sɛ ɛkã ebie si dwirɛ a ɔfa ɛyaafɛlɛ ba ɔ.

²⁴ Ɔte paa kyɛ ɛkɔtena sua anwuro pumbu ahameɛ bie anu tra kyɛ ɛne braa bɔ ye nwo te ngondii ɔ bɛkɔtena awuro ɔ.

²⁵ Ndɛenvɛen bɔ okofi dedeede kɔwa ne, ɔte kyɛ afa nzue frɔlɔɔ ama sona bɔ nzuhɔen ku ye ɔ.

²⁶ Teneneeniɛ bɔ ɔkɔma ye nwo ate kɔma bɔnefoɛ kɔsɛkye ye ne, ɔte kyɛ mbombonzue bɔ baponda ye, anaa abura nu nzue bɔ basɛkye ye ɔ.

²⁷ Woɛtafelɛ pee ɔtte mayee, na sɔ ala yeɛ sɛ ɛpena animnyam ma wɔ nwo a ɔtte mayee ɔ.

²⁸ Sona bɔ ɔngora nhyɛ ye nwo so ne, ɔte kyɛ kuro bɔ pɔfoɛ mɔ awura nu, bɔ ye nwo fasue abubu agua ɔ.