Anyandera 23 - AHYERƐLƐ KRONGRON

¹ Sɛ ɛne panyi bie bɛtena ase kyɛ ɛmɔdidi a, edidi a fa adwene to ye nwo paa;

² sɛ ɛte sona bɔ wɔ nye boro aleɛ a, ye de te w’adidie so.

³ Nnɛma wɔ nye boro ye aleɛ fɛfɛɛfɛ ne, ofikyɛ ɔte nnakannaka aleɛ.

⁴ Nnɛha wɔ nwo pee pena anwonya, nnɛdi wɔ bɔbɔ wɔ nworɛ si.

⁵ Kyɛ ɛbɔ wɔ nye perɛ ne, né watu wamini, ofikyɛ anwonya le ndaa, na otu kyɛ kɔleɛ ɔkɔ anwuro anwuro.

⁶ Nnɛdi sona bɔ ɔte aheɛ ɔ aleɛ, nnɛma wɔ komvi ba ye aleɛ fɛfɛɛfɛ ne aso,

⁷ ofikyɛ ɔyɔ sɔ sona nye so mbaen, na ose wɔ kyɛ, “Didi ná no,” nakoso nna ye kunu ɔ.

⁸ Kãa bɔ ali ne, ɛkɔfe, na wɔ noa dwirɛ bɔ ɛfa kamvo ye ne kɔyɛ mbaen.

⁹ Nnɛkã dwirɛ gua kwaseaa so anu, ofikyɛ ɔngɔfa wɔ nworɛ dwirɛ ne ngɔyɛ huu.

¹⁰ Nnɛtutu daa tete ɛwɛen, yeɛ nnɛpimbi nyisiaa mɔ b’aseɛ,

¹¹ ofikyɛ bɛ Defoɛ ne ɔte tuminiɛ, na okoli bɛ dwirɛ kɔma bɛ maa okotia wɔ.

¹² Ma w’adwene hɔ foɛtulɛ so, ná ma wɔ so bra nimdeɛ dwirɛ so.

¹³ Akwadaa yɛ tɛɛ a, tea ye, na efi ye mbire a, ongowu.

¹⁴ Efi ye mbire a, ekole ye kra kofi ɛborɔ.

¹⁵ Mma, sɛ nworɛ wɔ wɔ ti anu a, me koso me nye kɔgye.

¹⁶ Sɛ wɔ noa kã edwirɛ bɔ ɔtengyɛ a, me kra nye kɔgye.

¹⁷ Nnɛma wɔ nye boro bɔnefoɛ, na mmom suro AWURADE daa biala.

¹⁸ Nahorɛ nu, mmerɛ bie kɔwa, na w’anyelasoɛ ngɔyɛ mbaen.

¹⁹ Mma, wɔ de, tie ná nwu nworɛ, ná twe w’adwene sie atee ne aso.

²⁰ Nnɛne akɔnomnzafoɛ bɛbɔ afɛ, yeɛ nnɛne anoanufɛɛfoɛ bɛbɔ afɛ;

²¹ ofikyɛ akɔnomnzafoɛ ne adifuufoɛ bekoli hiaa, yeɛ ngosietɔlɛ ɔfa ndangurɛ kera sona.

²² Tie wɔ baba bɔ ɔwole wɔ ne dwirɛ, yeɛ sɛ wɔ maame yɛ aworowaa a, nnɛbu ye animtia.

²³ Tɔ nahorɛ, na nnɛyɛ ye atɔen; yeɛ tɔ nworɛ, foɛtulɛ, ne nimdeɛ.

²⁴ Teneneeniɛ ye baba di ahurusi paa, yeɛ seɛ bɔ ɔwo baa nworɛniɛ ne, seɛ ne nye gye ye nwo.

²⁵ Ma wɔ baba ne wɔ maame benya anika, ná ma wɔ maame bɔ ɔwole wɔ ne oli ahurusi.

²⁶ Mma, fa w’adwene ma me, ná ma wɔ nye gye m’atee nwo.

²⁷ Ɔnate kyɛ brasua gyanderaniɛ te kumaa kuronn, yeɛ brasua sanzaniɛ te abura bɔtɔfee.

²⁸ Ɔtɛ kyɛ awerɔm awueniɛ, na ɔma mmienzua bɔ bɛsɛkye agyaa ɔ bɛsone pee.

²⁹ Nwa yeɛ edwirɛ ato ye ɔ? Nwa yeɛ ye wora ɔbɔ ɔ? Nwa yeɛ okuro ngondiihonɛ? Nwa yeɛ okuro aporowaasulɛ ɔ? Nwa yeɛ wapurapura mbaen ɔ? Nwa yeɛ ye nye mmaa ayɛ kɔɔ ɔ?

³⁰ Bɛ bɔ bɛtena nzaa bo bɛkyɛ ne ɔ, bɛ bɔ bekyini bɛno nzaa mvrafra ne ɔ.

³¹ Nnɛma wɔ nye yɛ nzaa bɔ ye nye apakye ɔ nwo koakoa, bɔ ye nye pɛ ahure wɔ kwangoa nu, bɔ ogua wɔ komvi a ɔkɔ yɔɔ ne.

³² Nziɛ ye, ɔka wɔ kyɛ ewoo, na ye noa borɔ te kyɛ bɔnaa.

³³ Nningyein suronyisuronyi kogyinagyina wɔ nye so, na w’adwene kɔmaa ekodwudwo basabasa.

³⁴ Wɔ nye so kɔyɛ wɔ kyɛ ebie bɔ ɔla ɛpo afia ɔ, okohyini wɔ kyɛ ebie bɔ waala ɛlɛen noa ɔ.

³⁵ Na ɛkɔhã kyɛ, “Bafa nikyee babɔ me, nakoso mambura, babo me, nakoso ɔnyɛ me yea. Mmerɛ beni yeɛ me nye so kɔtete me maa ngɔɔpena nzaa bieku ngɔno ɔ?”