Anyandera 22 - AHYERƐLƐ KRONGRON

¹ Dumaa paa te paa tra anwonya pee, yeɛ animnyam te paa tra ɛdwetɛ ne sikaa kɔkorɛ.

² Nikyee ko he ma sikaniɛ ne ehianiɛ bɛte pɛ: AWURADE yeɛ ɔbɔle bɛ mu ɔ.

³ Badwemma nwu musue bɔ ɔkɔwa ɔ, na ɔtwe ye nwo kɔfea, nakoso bɛ bɔ b’adwene te nganga de, bɛfa bɛ ti bekowura nu benwu amaneɛ.

⁴ Anwobrɛaseɛ ne AWURADE surolɛ nwo akatuaa yeɛ ɔfa anwonya, animnyam ne ngoa ba ɔ.

⁵ Mmowue ne ngaen wɔ bɔnefoɛ atee so, na ebiala bɔ ye ngoa nwo hia ye ne, ɔtwe ye nwo fi bɛ nwo.

⁶ Tete akwadaa ma onwu atee paa bɔ odi kyɛ ɔfa so ɔ, amaa sɛ onyi a wamvi so.

⁷ Sikafoɛ di ehiafoɛ so, yeɛ sona bɔ obisa bosea ne, ɔte bɔ ɔbɔ bosea n’akoaa.

⁸ Sona bɔ odua amumuyɛɛ ne, ɔkɔpɛ musue, na ye ɛyaafɛlɛ mbire nu kobubu.

⁹ Sona bɔ ofia ye kunu ɔkyɛ nikyee ne, onya saleɛ, ofikyɛ ɔfa ye aleɛ ne bie ma ehiafoɛ.

¹⁰ Foa ngorohoɛniɛ ne, na ngondii so kɔpɛ; aporowaa ne nzoaa bo kɔpɛ.

¹¹ Sona bɔ okuro bra sannwuu bɔlɛ, bɔ ye noa dwirɛ yɛ fɛ ne, ɛhene ne kɔyɛ ye damvo.

¹² AWURADE nye bɔ nimdeɛfoɛ nwo waen, nakoso amumuyɛɛniɛ de, ɔbɔ ye dwirɛ gua.

¹³ Ɛfoen sona dwirɛ bɔ ɔkã ole kyɛ, “Gyata wɔ aluo dɔ, bekohu me wɔ mmorɔnoɛ nemɔ aso!”

¹⁴ Nyanzoen brasua noa dwirɛ te kumaa kuronn, bienzua bɔ AWURADE afɛ ye so yaa ne, ɔtɔ nu.

¹⁵ Ngwaseade yɔlɛ ayi akwadaa ti anu tɛkyɛ, ɛfa mbire tea ye a, otu ngwaseade ne fi ye nwo.

¹⁶ Sona bɔ osisi ehiafoɛ fa nya ye nwo, ɔne bɔ ɔfa ye anwonya kyɛ sikafoɛ ne, ehiaa yeɛ okohia ye ɔ.

Nworɛ dwirɛ biemɔ

¹⁷ Yɛ asoɛ tie nworɛfoɛ noa dwirɛ, ma w’adwene hɔ me nimdeɛ ne aso,

¹⁸ ofikyɛ ɔte paa ma wɔ kyɛ ɛkɔfa kosie wɔ ti anu, bɔ ye mukoraa ɔla wɔ noa ɔ.

¹⁹ Matu wɔ sɔ foɛ ne ɛnɛ, yoo, wɔ, amaa ɔnate so afa wɔ wora awura AWURADE nu.

²⁰ Mahyerɛ edwirɛ bɔ nu pi ɔ aburasa mama wɔ, foɛtulɛ ne nimdeɛ dwirɛ mɔ,

²¹ kyɛ memaa enwu kyɛbɔ nahorɛ dwirɛ ne ɔte turoloo, amaa ɔnate so afa nahorɛ mmuayɛɛ aama bɛ bɔ bɛsomane wɔ ɔ.

²² Nnɛdi sona bɔ ɔyɛ anwumvo ɔ aminɛ, ofikyɛ ɔyɛ anwumvo, yeɛ nnɛsisi ehianiɛ wɔ nekaa bɔ bedi dwirɛ ɔ;

²³ ofikyɛ AWURADE koli bɛ dwirɛ kɔma bɛ, na bɛ bɔ besisi ehiafoɛ ne, okole bɛ kra kofi bɛ sa nu.

²⁴ Nnɛfa sona bɔ ye ahone pingye ye ɔ abiɛngoɛ, yeɛ nnɛne bɔ ɔfɛ yaa mbaen mbaen ɔ bɛbɔ afɛ,

²⁵ anyɔ a ekosua ye suban ne bie, ná aprɛprɛ wɔ kra ato ngaen nu.

²⁶ Nnɛboka bɛ bɔ bedi agyinamuɛ ne aso, bɛ bɔ bedi kerɛ nu agyinamuɛ ne.

²⁷ Sɛ annya nikyee bie amva andua a, nzu ati yeɛ ongole wɔ bɛen bɔ ɛla so ɔ?

²⁸ Nnɛtutu daa tete ɛwɛen bɔ wɔ nana mɔ bato ne.

²⁹ Aso anwu sona bɔ ɔyɛ ye adwuma ferengyemm ɔ? Ahemvo mɔ yeɛ okonya atee kɔso bɛ ɔ, ɔngɔso kwahweabaa mɔ.