Anyandera 21 - AHYERƐLƐ KRONGRON

¹ Ɛhene adwene, ɔte kyɛ asue bɔ ɔtengyɛ ɔ wɔ AWURADE sa nu, nekaa bɔ okuro ɔ yeɛ obiri ye fa ɔ.

² Bɔ sona yɔ biala, ɔtengyɛ wɔ ye nye so, nakoso AWURADE yeɛ ɔkari ye ti anu dwirɛ nea ɔ.

³ Tenenee bra ne pɛpɛɛpɛyɛlɛ, ɔsɔ AWURADE nye tra afɔleɛbɔlɛ.

⁴ Anyeɛ bɔ ɔnzɔ sona ne anwomasoɛ, bɛte bɔnefoɛ kanea, bɛte bɔne.

⁵ Sona bɔ okuro adwuma ne, ye nhyehyɛleɛ maa onya ye nwo tam, nakoso sona bɔ ɔpere ye nwo de, onnya huu.

⁶ Anwonya bɔ bɛfa nnakannaka so benya ye ne, ɔte mbaen, na ɔte bɛ so ewue ngaen.

⁷ Amumuyɛɛfoɛ bɛ nzɛmmɔne kɔpra bɛ bo kɔhɔ, ofikyɛ bɛpo kyɛ bɛkɔyɔ bɔ ɔtengyɛ ɔ.

⁸ Amumuyɛɛniɛ yɔleɛ ndengyɛ, nakoso sona bɔ ye nwo te ne de, ye atee tengyɛ.

⁹ Ɔte paa kyɛ ɛkɔtena sua anwuro pumbu ahameɛ bie anu tra kyɛ ɛne braa bɔ ye nwo te ngondii ɔ bɛkɔtena awuro ɔ.

¹⁰ Amumuyɛɛniɛ, ye kra gye aleɛ ole bɔne, na onnwu ye mmango anwumvoin.

¹¹ Sɛ bɛtwe ngorohoɛniɛ so a, sona bɔ ye adwene te kãa ɔ nwu nworɛ, yeɛ sɛ betu nworɛniɛ foɛ a, ye nimdeɛ kɔ anwuro.

¹² Teneneeniɛ ɔfa ye nye nea bɔ ɔkɔ so wɔ bɔnefoɛ awuro ɔ, na bɔnefoɛ bɛ bɔne ti, b’ayieleɛ nyie bɛ yé.

¹³ Ebiala bɔ mmenia bɔ bɛyɛ anwumvo ɔ besu bɛfrɛ ye a otuatua ye so ne, ye koso osũ frɛ a, ebiala ngɔtɛ ye so.

¹⁴ Mvealeɛ nu akyɛdeɛ brɛ ɛyaafɛlɛ ase, yeɛ fea-ase-ma kudɛɛ ma ahonehulɛ tɔ nzue nu.

¹⁵ Sɛ pɛpɛɛpɛyɛlɛ yɛ adwuma a, teneneeniɛ nye gye, nakoso bɔnefoɛ mɔ de, pɛpɛɛpɛyɛlɛ nwunanwuna bɛ.

¹⁶ Sona bɔ odi nimdeɛ atee nwo makyebu ne, awufoɛ mɔ nu yeɛ ɔkɔtena ɔ.

¹⁷ Sona bɔ ɔfa anigye sie ye nye so ne, odi hiaa, yeɛ bɔ okuro nzaa ne ngoo ne, ɔngɔyɛ sikaniɛ.

¹⁸ Bɔnefoɛ yeɛ bɛkɔfa bɛkɔpɔ teneneeniɛ ɔ, na sɔ ala yeɛ bɛkɔfa amumuyɛɛniɛ bɛkɔpɔ sona bɔ odi nahorɛ ɔ.

¹⁹ Ɔte paa kyɛ ɛkɔtena aseɛ akwaweɛ so tra kyɛ ɛne braa bɔ ye nwo te ngondii bɔ odwane wɔ nwo ɔ bɛkɔtena ɔ.

²⁰ Agudeɛ bɔ odi mu ne ngoo wɔ nworɛniɛ awuro, nakoso kwaseaa de, onya ye a ɔsɛkye ye.

²¹ Ebiala bɔ ɔfa tenenee bra ne paayɛlɛ osie ye nye so ne, okonya ngoa, tenenee ne animnyam.

²² Nworɛniɛ fo fasue kɔ anwoserɛfoɛ bɛ kuro, na anwoserɛ afealeɛ bɔ bafa bɛ wora bawura nu ne, odwiri gua.

²³ Ebiala bɔ ɔnea ye noa ne ye dwudwolɛ so yé ne, ɔtwe ye kra fi amaneɛ nu.

²⁴ Anwomasoɛniɛ bɔ otu ye nwo ne, ye dumaa ole ngorohoɛniɛ, na ɔbɔ ye bra anwomasoɛ ndrasoɛ nu.

²⁵ Ɛfoen sona, nikyee bɔ ye komvi wɔ so ne yeɛ oku ye ɔ, ofikyɛ ye sa nga ye gya nga.

²⁶ Ebie nye boro nikyee kɔkɔkɔkɔ daa biala, nakoso teneneeniɛ de, ofia ye kunu ɔkyɛ nikye.

²⁷ Bɔnefoɛ afɔleɛ te akyiwadeɛ, na sɛ ɔfa adwene tɛɛ ɔbɔ afɔleɛ ne po de a, ye de né wasram so!

²⁸ Danzeniɛ ngondomboniɛ kowu, nakoso sona bɔ ɔyɛ asoɛ tie ne de, ye dwirɛ yeɛ okotindim ɔ.

²⁹ Bɔnefoɛ kumgum ye nyunu, nakoso teneneeniɛ de, ɔdwene ye agyirɛtulɛ nwo.

³⁰ Nworɛ anaa nimdeɛ anaa foɛtulɛ biala nne berɛ bɔ ɔkɔhora kogyina AWURADE nyunu ɔ.

³¹ Besiesie pɔngɔ bɛfa bɛnwondɛ koɛ kyẽa, nakoso ngonimlilɛ de, ɔwɔ AWURADE sa nu.