Anyandera 20 - AHYERƐLƐ KRONGRON

¹ Nzaa te ngorohoɛniɛ, nzaa serɛ maa ekuro ngondii, na ebiala bɔ ɔkɔfa ye ti kowura nu ne, ɔnze nworɛ.

² Sɛ ɛhene fɛ yaa hahii a, ɔte kyɛ gyata bɔ opo ɔ, ebiala bɔ okohu ye ahone ne, ɔfa ye ngoa pɛ so.

³ Sona twe ye nwo fi ngondii nwo a, ɔte animnyam ma ye, na kwaseaa biala kuro ngondii.

⁴ Prakasua ti, ɛfoen sona nzo boo, yiti fieso aleɛ falɛ dwu a, né ɔpena bie, nakoso onnya bie.

⁵ Kuro sona ti anu adwene te kyɛ buma, badwemma sona yeɛ ɔkora sa bie ɔ.

⁶ Mmeni pee nwa bɛ bɔbɔ bɛte paa, nakoso sona bɔ odi nahorɛ de, nwa yeɛ okonwu bie ɔ?

⁷ Teneneeniɛ ye bra te sannwuu, na ye mma konya saleɛ wɔ ye si.

⁸ Sɛ ɛhene tena ndɛenbualɛ bia so a, ɔfa ye nye kari nwu bɔ ɔte bɔne amukoraa.

⁹ Nwa yeɛ ɔkɔhora kɔhã kyɛ, “Mate m’ahone nu sannwuu, me nwo ate afi me bɔne nwo” ɔ?

¹⁰ Asusudeɛ mɔ bɔ nzonzoleɛ wɔ nu, ɔne tonyi mɔ bɔ nzonzoleɛ wɔ nu ɔ, AWURADE kyi bɛ munyɔ kɔkɔkɔkɔ.

¹¹ Akwadaa po, ye yɔleɛ maa benwu ye suban, sɛ ye yɔleɛ nwo te oo, anaa ɔte paa oo.

¹² Asoɛ bɔ ɔte dwirɛ, yeɛ anyeɛ bɔ onwu nikye, AWURADE yeɛ ɔyɔle bɛ munyɔ ɔ.

¹³ Nnɛma nnafelɛ yɛ wɔ fɛ, ná wanhia wɔ, tete wɔ nye, na ekonya aleɛ pee kɔma wɔ ko koyi.

¹⁴ Sona bɔ ɔtɔ nikyee ne, ɔkã kyɛ, “Ɔtte mayee, ɔtte mayee,” nakoso ɔkakyi ye nwo kɔ a, ɔfa hoahoa ye nwo.

¹⁵ Sikaa kɔkorɛ wɔ berɛ, yeɛ agudeɛ paa pee koso wɔ berɛ, nakoso noa bɔ ɔkã nimdeɛ dwirɛ de, ɔte mbembenanneɛ bɔ ye nyɔboɛ yɛ se ɔ.

¹⁶ Sɛ ebie di ɛwɔfoɛ agyinamuɛ a, de sɔ sona ne tena fa sie, yeɛ sɛ odi ebie bɔ ofi maen bie aso agyinamuɛ a, de awowaa fa sie.

¹⁷ Aleɛ bɔ sona fa nnakannaka so nya ye ne, ɔyɛ fɛ, nakoso ye si ye, nyɔboseka yi ye noa nu to.

¹⁸ Egyina foɛtulɛ so ɛfa adwene a, odi mu, sɛ ɛbaahɔ koɛ a, gyina foɛtulɛ paa so.

¹⁹ Sona bɔ okyinikyini di nzekure ne, ɔma ye noa yɛ kurokuro wɔ edwirɛ bɔ bɛfeafea so ɔ nwo, yiti nnɛfa wɔ nwo bɔ sona bɔ ye noa te kurokuro ɔ.

²⁰ Ebiala bɔ ɔkɔnoma ɔse anaa oni ne, ye kanea konua wɔ awosii kabii nu.

²¹ Agyapadeɛ bɔ ɛpere wɔ nwo nya ye ahyɛaseɛ ne, ye ayieleɛ ngɔyɛ saleɛ.

²² Nnɛkã kyɛ, “Ngɔfa bɔne ngotua bɔne kerɛ.” Na mmom fa wura AWURADE sa, na ɔkɔboka wɔ.

²³ Asusudeɛ mɔ bɔ nzonzoleɛ wɔ nu ne, bɛte AWURADE akyiwadeɛ, yeɛ tonyi bɔ bawura nu ne koso ɔtte mayee.

²⁴ Kuro sona agyirɛ bɔ otutu ne, ogyi AWURADE so, ɔkɔyɛ sɛɛ né sona ate ye bɔbɔ ye atee bɔ ɔnate so ɔ bo?

²⁵ Ɔte musue ma sona kyɛ ɔkɔpere ye nwo kɔhã kyɛ, “Ɛhe te krongron,” ná koso ɔbɔ anohoba yie a, afei ɔhyɛ ye bo ɔdwenedwene ɔ.

²⁶ Ɛhene bɔ ɔse nworɛ ne, ɔfa ye nye kari nwu bɔnefoɛ, na ɔfa teaseɛnam otwi fa bɛ so.

²⁷ Sona sunzum te AWURADE kanea, na ɔneanea ye nu amukoraa onwu ye nekaa biala.

²⁸ Pɛpɛɛpɛyɛlɛ ne nahorɛlilɛ ɔbɔ ɛhene nwo waen, na pɛpɛɛpɛyɛlɛ yeɛ ɔma ye ahennie gyina ɔ.

²⁹ Mmerandeɛ b’animnyam ole b’anwoserɛ, yeɛ egyein te nworowaa mɔ b’anwonyemene.

³⁰ Bakaa bɔ ɔma bɛ nwo pakyepakye ne, otu bɔne bo, na sɔ ala yeɛ mbire koso ɔworoworo sona nu osiesie ye nu ɔ.