Anyandera 19 - AHYERƐLƐ KRONGRON

¹ Ehianiɛ bɔ ye bra te sannwuu ne, ɔte paa tra sona bɔ ɔte nnakannaka ne kwaseaa ɔ.

² Ɔtte mayee mma sona kyɛ nimdeɛ kɔbɔ ye ɔ, yeɛ bɔ otutu amirika yɔ nikyee ne, ɔyɛ mvomsoɛ.

³ Sona bɔbɔ ye gyiminɛ yeɛ ɔma ye ayieleɛ yie ye ɔ, nakoso ɔpɛ ye nwo fɛ AWURADE so yaa.

⁴ Sikaa ma sona nya adamvoa pee, nakoso ehianiɛ de, ye mmango mɔ bɛnga bɛmma ye nwo.

⁵ Adanzewianiɛ ngɔfa ye nwo ngoli tɔtorɔtɔɔ, yeɛ nnakannakaniɛ wora ɔngɔfa ye nwo ngoli mbaen.

⁶ Mmeni pee pena kyɛ bɛsɔ sona bɔ ye sa bo nyɛ se ɔ nye, na ebiala fa sona bɔ ɔyɛ adɔeɛ ɔ adamvoa.

⁷ Sɛ ehianiɛ oliɛma mɔ amukoraa po bɛpɔ ye a, ɔkɔyɛ sɛɛ bɔ ye damvo mɔ bɛngɔhwe bɛ nwo ngofi ye nwo ɔ! Ɔpena bɛ ɔne bɛ dwudwo a, onnya bɛ.

⁸ Sona bɔ osua nworɛ ne, okuro ye kra dwirɛ, yeɛ bɔ onya nimdeɛ ne, onya ngɔsoɛ.

⁹ Adanzewianiɛ ngɔfa ye nwo ngoli tɔtorɔtɔɔ, yeɛ nnakannakaniɛ wora okowu.

¹⁰ Anwonya mvata kwaseaa, yeɛ ɔtte mayee kyɛ kanganiɛ koli nnehyeɛ so ɔ.

¹¹ Anwohyɛsoɛniɛ ye ahone nhu ndɛ, na ɔte animnyam ma ye kyɛ okobu ye nye kogua mvomsoɛ so ɔ.

¹² Sɛ ɛhene fɛ yaa a, ɔte kyɛ gyata bɔ opo ɔ, nakoso ye anwumvoinnwunɛ te kyɛ ndire so ebosue.

¹³ Baa kwaseaa ma ye baba nwu amaneɛ, yeɛ braa bɔ okuro ngondii ne, ɔte kyɛ nzue bɔ mmerɛ biala ɔpepe ɔ.

¹⁴ Awuro ne anwonya te agyapadeɛ bɔ seɛ fa yakyi mma ɔ, nakoso braa badwemma de, ofi AWURADE berɛ.

¹⁵ Ɛfoen ma sona da hatee, yeɛ akwadworɔ sona di hɔen.

¹⁶ Sona bɔ odi mmeraa dwirɛ ne aso ne, ɔpena ye kra ngoa, nakoso bɔ ɔnnea ye atee bɔ ɔnate so yé ne, okowu.

¹⁷ Ebiala bɔ ɔyɛ sona bɔ ɔyɛ anwumvo paa nen, ɔfa fɛmo AWURADE, na paa bɔ wayɛ ne, AWURADE kɔyɛ ye bie kotua kerɛ.

¹⁸ Tea ɛwa wɔ mmerɛ bɔ anyelasoɛ wɔ berɛ ɔ, nnɛfa wɔ nye sie ye so kyɛ ɛkɔmaa ɔkɔhɔ ɛsɛkyelɛ nu.

¹⁹ Sona bɔ ye ahone hu mbiri mbiri ne, okonya ye nwo asohwenɛ, sɛ ɛpepɛ de ye a, sana esa pepɛ de ye bieku.

²⁰ Tie foɛtulɛ ná de ngyerɛkyerɛ to nu, amaa ɔnate so anwu nworɛ kyẽa bie.

²¹ Kuro sona fa ye adwene yɛ nhyehyɛleɛ pee, nakoso bɔ AWURADE ahyehyɛ ne yeɛ okogyina ɔ.

²² Nahorɛlilɛ yeɛ bɛpena ye wɔ sona nu ɔ, na ɔte paa kyɛ ɛkɔyɛ hianiɛ tra kyɛ ɛkɔyɛ nnakannakaniɛ ɔ.

²³ AWURADE surolɛ ma sona nya ngoa, enya ye a, ɛkɔtena asomdwee nu, na edwirɛ biala ngɔto wɔ.

²⁴ Ɛfoen sona fa ye sa to talie nu a, ye sa po ɔngora mva ngɔ ye noa.

²⁵ Bo ngorohoɛniɛ, na sona bɔ ye adwene te kãa ne kosua nworɛ, kã sona badwemma nyunu, na okonya nimdeɛ.

²⁶ Baa bɔ ɔbo ɔse ná osa foa oni fi awuro ne, ɔte nyanzoen ne animguaseɛ ba.

²⁷ Mma, ɛyakyi foɛtulɛ tielɛ a, ɛne nimdeɛ dwirɛ kɔbɔ nzahoɛ.

²⁸ Adanzewianiɛ ɔgoro ndɛenbualɛ pɛpɛɛpɛ nwo, yeɛ bɔnefoɛ ye noa aleɛ ole amumuyɛɛ.

²⁹ Besiesie asohwenɛ bɛto berɛ bɛma ngorohoɛfoɛ, yeɛ mbirefinɛ koso bɛma ngwaseafoɛ si.