Anyandera 18 - AHYERƐLƐ KRONGRON1 Sona bɔ ɔpena ye ngome ye yeeyɛlɛ ne, ɔpena ye ngome ye deɛ, na onne nzusuleɛ paa biala ndo nu. 2 Kwaseaa nye ngye kyɛ okonya nimdeɛ ɔ, na mmom bɔ ɔwɔ ye adwene nu angome yeɛ ɔkã ɔ. 3 Nzɛmmɔne ne animtia yeɛ bɛnate ɔ, yeɛ nyanzoen bra ne animguaseɛ yeɛ bɛnate ɔ. 4 Sona noa dwirɛ te kyɛ asue buma, yeɛ nworɛ dwirɛ te kyɛ asue bɔ ɔsẽ ɔ. 5 Ɔtte mayee kyɛ ɛkɔma bɔnefoɛ koli be, ná ekobua teneneeniɛ ndɛengyea ɔ. 6 Kwaseaa dwudwolɛ ma ngondii ba, yeɛ ye noa dwirɛ frɛfrɛ ɛbolɛ. 7 Kwaseaa ye dwudwolɛ fa ye kɔ amaneɛ nu, na ye noa dwirɛ sua ye kra ngaen. 8 Nzekurebɔlɛniɛ ye noa dwirɛ te menemene, na edwirɛ ne woroworo wɔ. 9 Sona bɔ ɔte foen wɔ ye adwuma nwo ne, oliɛma ole sona bɔ ɔsɛkye nningyein ɔ. 10 AWURADE dumaa ne te abandenden pindinn, nu yeɛ teneneeniɛ nwati kɔbɔ ye nwo waen maa onya ye ti didi nu ɔ. 11 Sikaniɛ anwonya yeɛ ɔte ye kuro bɔ wato ye nwo fasue ɔ, osusu kyɛ ɔte fasue tendenn. 12 Anwomasoɛ mma onyie sona yé, na anwobrɛaseɛ ne animnyam yeɛ bɛnate ɔ. 13 Sona bɔ ondie edwirɛ nyie koraka né wabua ye nwo bie ne, ɔmaa ɔyɛ kwaseaa, na ogua ye nyunu ase. 14 Sona nde apɔ a, ye sunzum maa ogyina anwonyerɛ ne noa, nakoso sunzum bɔ ye wora abɔ de, nwa yeɛ ɔkɔhora kogyina sɔ tebea ne noa ɔ? 15 Sona badwemma osua nimdeɛ, yeɛ nworɛfoɛ bɛ so pena nimdeɛ. 16 Sona akyɛdeɛ bukye atee ma ye, na ɔmaa onya atee kɔ mmeni titire nyunu. 17 Sona di moa bɔ ye nguro a, ɛnwanzɛ odi be kɔpem kyɛ bɔ ɔne ye bɛbɔ nguro ne kobisabisa ye dwirɛ ɔ. 18 Serewagualɛ ma aporowaa so pɛ, na obua tumifoɛ mɔ b’afia ndɛen. 19 Aliɛmaa bɔ ayɛ ye tɛɛ ne, ɔyɛ se kyɛ ɔne wɔ bɛkɔyɛ ko, tra kyɛ ekoli kuro bɔ bato ye nwo fasue so ngonim ɔ, na bɛ ngondii te kyɛ mmuralɛ bɔ ɔbrambram sua anoa asi ɔ. 20 Sona noa dwirɛ ma ye ko yi, ye noa dwirɛ ma ye nwo tɔ ye. 21 Sona noa dwirɛ maa onya ewue anaa ngoa, na bɔ okuro edwudwolɛ ne, onya ye nwo amaneɛ. 22 Bienzua bɔ okonya yeɛ ne, wanya nikye paa, na AWURADE alo ye. 23 Ehianiɛ noa dwirɛ te kyerɛpalɛ, nakoso sikaniɛ de, ɔma mmuayɛɛ fumfum. 24 Abiɛngoɛ biemɔ fa sona kɔ sɛkyelɛ nu, nakoso abiɛngoɛ bie bata wɔ tra aliɛmaa. |
Esahie Bible © Bible Society of Ghana, 2018.
Bible Society of Ghana