Amose 6 - AHYERƐLƐ KRONGRON

Yisrael ahandaen nwo kɔkɔbɔlɛ

¹ “Bɛ bɔ bɛ nwo atɔ bɛ wɔ Sion, yeɛ bɛ bɔ bɛfa bɛ wora bewura Samaria bokaa nu ɔ, maen maen mbanyi mɔ nu atitire mɔ bɔ Yisrael awuro ama bɛbapena mmokalɛ befi ɛmɔ berɛ ɔ, ɛmɔ yaakɔ!

² Ɛ́mɔpɛ nu bɛhɔ Kalene bɛɛnea, na ɛmɔfi berɛ a, ɛmɔhɔ kuro piri Hamate; afei ɛ́mɔtoro bɛhɔ Filistifoɛ kuro Gate. Aso bɛte paa bɛtra sɔ ahennie hemɔ? Anaa b’aseɛ te piri tra ɛmɔ aseɛ anaa?

³ Ɛmɔ bɔ ɛmɔtu kyẽa tɛɛ ne bɛhyɛ dedeede, nakoso ɛmɔ yɔleɛ de, basabasa yeɛ ɔfa ba ɔ!

⁴ “Ɛmɔ yaakɔ! Ɛmɔ bɔ ɛmɔla mba bɔ bafa ɛsoen gye bayɔ ɔ so, bɔ ɛmɔtwe ɛmɔ nu wɔ ɛmɔ bɛen so, bɔ ɛmɔku mmoaen kure ne anu mmoaen akrɔngrɔma mɔ, ɔne tuin ne anu nandwie akrɔngrɔma mɔ bedi ɔ;

⁵ ɛmɔ bɔ ɛmɔto dwein basabasa bɛfa besuro sangoo so, ná ɛmɔyɔ edweintolɛ nningyein bɔ ɔte kyɛ Dawide deɛ ne ɔ;

⁶ ɛmɔ bɔ ɛmɔno nzaa awaa bɔ wayi to, bɔ ɛmɔfa sakyeɛfona paa bɛpopa, nakoso ɔmva ɛmɔ nwo kyɛ Yosef ɔbɔ ɔ!

⁷ Yiti bɛ yeɛ bekoli moa bɛkɔhye bɛ nnure bɛkɔhɔ ɔ, na bɛ bɔ bɛtengyɛ bɛ nu ne, b’anigye mmorosoɛ ne ye bo kɔpɛ.”

⁸ AWURADE Nyameɛ wata ye nwo ndaen, (AWURADE, Asafo Nyameɛ nwa), “Yakob ye anwomasoɛ ne yɛ me tɛ, yeɛ mekyi ye anwoserɛ afealeɛ nemɔ; yiti ngɔfa kuro ne, ɔne bɔ ɔwɔ nu amukoraa ngowura pɔfoɛ mɔ sa.

⁹ Na ɔkɔwa kyɛ, sɛ mmenia buru bɛka awuro ko anu a, bekowuwu.

¹⁰ Na sɛ abusuaniɛ, bɔ ye yeɛ odi kyɛ osie fuin ne, okuku fuin ne fi awuro ne anu, na obisa ebie wɔ awuro ne akunu dɔ kyɛ, “Aso sona bieku tɛ boka wɔ so wɔ berɛ anaa” a, okobua kyɛ, “Daabi.” Na ɔkɔhã kyɛ, “Mua wɔ noa. Onni kyɛ yɛbɔ AWURADE dumaa.”

¹¹ Tie, AWURADE afa ahyɛdeɛ wama, na bekobubu awuro piri ne bekogua gyirigorɔɔ, ná babu sua ba ne bagua ase bɔkɔɔ.

¹² Aso mbɔngɔ betu amirika wɔ nyɔbotaen so anaa? Aso bɛfa nandwie befundam berɛ anaa? Nakoso ɛmɔama ndɛenbualɛ akakyi ɛborɔ, yeɛ tenenee mma bakakyi anafranaku.

¹³ Ɛmɔ bɔ ɛmɔhoahoa ɛmɔ anwo kyɛ ɛmɔali Lodeba kuro ne aso ngonim, bɔ ɛmɔkekã kyɛ, “Aso nna yɛ bɔbɔ y’anwoserɛ yeɛ yafa yali Karenaim so ngonim ɔ?”

¹⁴ “Nakoso ao Yisrael awuro ama, ɛ́mɔtie, ngɔma maen bie kodwɔso kotia ɛmɔ,” AWURADE Asafo Nyameɛ noa dwirɛ ɛne. “Bɛkɔhyɛ ɛmɔ so fi Hamate tiwaa koodwu Araba bɔnza ne anu.”