Amose 2 - AHYERƐLƐ KRONGRON

Moabo nwo ngɔm

¹ AWURADE nwa nyoo, “Ɔnate Moabo ye amumuyɛɛ nza, eh, ɔne nna ne ati, mengɔhwe ye so hwenɛ ne mengosa; ofikyɛ ɔyerale Edom hene mmowue maa ɔtɔle nzoen.

² Yiti ngɔto Moabo nu see maa ɔkɔyera Kiriote anwoserɛ afealeɛ nemɔ, na Moabo kowu wɔ bagyabagya nu, wɔ esebɔlɛ ne totorobɛndohulɛ nu.

³ Ngɔpɛ ye maenbulɛniɛ ne asue ngofi ye nu, na ngohũhũ atitire nemɔ amukoraa ngɔboka ye so,” AWURADE noa dwirɛ ɛne.

Yuda nwo ngɔm

⁴ AWURADE nwa nyoo, “Ɔnate Yuda ye amumuyɛɛ nza, eh, ɔne nna ne ati, mengɔhwe ye so hwenɛ ne mengosa; ofikyɛ bapo AWURADE mmeraa, banni ye mmeraa dwirɛ so. Bɛ nnakannaka bɔ ɔte atee bɔ bɛ nana mɔ fale so ne, wamaa bali makyebu.

⁵ Yiti ngɔto Yuda nu see maa ɔkɔyera Yerusalem anwoserɛ afealeɛ nemɔ.”

Yisrael nwo ngɔm

⁶ AWURADE nwa nyoo, “Ɔnate Yisrael ye amumuyɛɛ nza, eh, ɔne nna ne ati, mengɔhwe ye so hwenɛ ne mengosa; ofikyɛ bɛtɔne teneneeniɛ bɛfa bede ɛdwetɛ, yeɛ bɛtɔne ehianiɛ bɛfa bede mmaboa.

⁷ Bɛ yeɛ betiatia ehiafoɛ ti so bɛkã bɛ ti bewura nnɛterɛ nu, ná besisi mmenia bɔ bɛyɛ anwumvo ɔ; ebie ne ɔse bɛ ne afaneɛ ko bɛda bɛfa begua me dumaa krongron ne anwo fiɛ.

⁸ Ndena bɔ bafa basi bɛ berɛ awowaa ne, bɛfa bɛsesɛ afɔleɛ bokyea biala anwo bɛda so, na bɛtɔ mmenia bedi a, nu nzaa ne, bɛno ye wɔ bɛ nyameɛ mɔ awuro.

⁹ Nakoso Amoriniɛ bɔ ye tendenn te kyɛ sida bakaa ne, bɔ ye nwo yɛ se kyɛ eluii ne, nguni ye wɔ bɛ nyunu. Nzɛkyele ye mmakaammaa wɔ anwuro, yeɛ nzɛkyele ye ndii wɔ ye bo.

¹⁰ Afei koso, nyele ɛmɔ mvili Misraim aseɛ so, na nnili ɛmɔ nyunu mvale ɛmɔ mvale ɛserɛ so afoɛ aburanna, kyɛ ɛmɔɔfa Amoriniɛ n’aseɛ ne bɛyɛ ɛmɔ deɛ.

¹¹ Na nyeyele ɛmɔ mma nemɔ bie nyɛle bɛ ngɔmhyɛlɛfoɛ, yeɛ ɛmɔ mmerandeɛ nemɔ bie nyɛle bɛ nasiritefoɛ. Ao Yisraelfoɛ, aso nna sɔ yeɛ ɔte ɔ?,” AWURADE noa dwirɛ ɛne.

¹² “Nakoso ɛmɔmane nasiritefoɛ nemɔ nzaa maa bɛnone, na ɛmɔhyɛle ngɔmhyɛlɛfoɛ nemɔ kyɛ, ‘Nnɛma ɛmɔhyɛ ngɔm!’

¹³ Ɛ́mɔtie, ngɔnyema ɛmɔ ngɔhɔ ase, kyɛbɔ teaseɛnam bɔ aburoo ayi ye to ne ɔnyema kɔ ase ɔ.

¹⁴ Yiti ɛnwatilɛ kɔbɔ anwonyeralɛniɛ, anwoserɛniɛ ye anwoserɛ kotu komini, yeɛ katakyie ngɔhora ngɔpepɛ ngole ye nwo.

¹⁵ Agyaentolɛniɛ ngɔhora ngogyina ye gya so; sona bɔ ye gya bo so yɛ nyera ne, ɔngɔhora ngɔpepɛ ngole ye nwo, yeɛ pɔngɔhanɛniɛ ngɔhora ngɔpepɛ ngole ye nwo.

¹⁶ Na sɔ kyẽa ne, anwoserɛfoɛ nu ahoneserɛniɛ ne, ɔkɔnwati bɔ ye nwo la so ɔ,” AWURADE noa dwirɛ ɛne.