2 Yohane 1 - AHYERƐLƐ KRONGRON

¹ Krataa he fi me bɔ nde panyi berɛ. Mefa mebrɛ braa bɔ baneanea nu baye ye ne ɔne ye mma. Mekuro bɛ dwirɛ nahorɛ nu, na nna me ngome, na mmom mmenia mukoraa bɔ banwu nahorɛ ne wora bekuro bɛ dwirɛ,

² ɔnate nahorɛ ne bɔ ɔte yɛ nu ná ɔne yɛ kɔtena afebɔɔ ne ati.

³ Baba Nyameɛ ne Ɔwa Awurade Yesu Kristo bɛlo yɛ ná bɛ́ma yɛ asomdwee, ná bénwu yɛ anwumvoin wɔ nahorɛ ne ɔdɔ nu.

Nahorɛ ne ɔdɔ

⁴ Ɔyɛle me fɛ paa, kyɛ nwuni kyɛ wɔ mma nemɔ bie nate nahorɛ ne anu kyɛbɔ Baba ne hyɛle yɛ ne ala.

⁵ Yiti afei, bra panyi, mesrɛ wɔ kyɛ ɛ́mɔma yɛhurohuro yɛ nwo dwirɛ; nna kyɛ mmeraa foforɛ yeɛ mekyerɛ mebrɛ ɛmɔ ɔ, na mmom mmeraa bɔ yɛnyane ye fili ahyɛaseɛ ne ala ɔ.

⁶ Na ɔdɔ ole kyɛ yɛkoli ye ahyɛdeɛ ne aso ɔ’. Na ahyɛdeɛ ne, kyɛbɔ yate fi ahyɛaseɛ ne ole kyɛ yɛtena ɔdɔ nu.

⁷ Ofikyɛ nnakannakafoɛ pee bawa wiase, na bɛ yeɛ benne bɛndo nu kyɛ Yesu Kristo awa anwoɔnaen nu waayɛ kuro sona ɔ. Na sona biala bɔ ɔyɔ sɔ ne, ɔte ngondomboniɛ ne antikristo.

⁸ Ɛ́mɔnea ɛmɔ nwo yé, amaa bɔ ɛmɔafɛ banya ye ne wamvi ɛmɔ sa, na mmom ɛmɔanya ye nwo akatuaa mukoraa.

⁹ Sona biala bɔ onni Kristo ngyerɛkyerɛ so ná mmom ɔfa bie bata ye nwo ne, ɔnze Nyameɛ. Nakoso sona biala bɔ odi Kristo ngyerɛkyerɛ so ne, ɔse Baba ne ne Baa ne.

¹⁰ Sɛ ebiala ba ɛmɔ berɛ nna ottira sɔ ngyerɛkyerɛ ye a, nnɛma ɛmɔsikye ye ɛmɔ awuro anaa nnɛma ɛmɔyɛ ye akwaaba.

¹¹ Ofikyɛ ebiala bɔ ɔyɛ ye akwaaba ne, ɔyɔ ye yɔleɛ tɛɛ ne bie.

Ayieleɛ

¹² Edwirɛ pee wɔ berɛ bɔ ɔsɛ kyɛ mekã mekyire ɛmɔ ɔ, nakoso mengɔfa krataa ne pɛn mengɔhyerɛ mengɔbrɛ ɛmɔ; na mmom mepena kyɛ mebafua ɛmɔ nwo ná manwu ɛmɔ nyunu maa yali ngɔmɔ, amaa y’anigye ali mu.

¹³ Eliɛmaa brasua bɔ baneanea nu baye ye ne, ye mma mɔ bébisa ɛmɔ ahye.