2 Timoteo 4 - AHYERƐLƐ KRONGRON

Bɔ edwirɛ ne dawure

¹ Na Nyameɛ ne Kristo Yesu bɔ ɔbaabua ateasefoɛ ne awufoɛ ndɛen ne, ɔne ye nwo aliyelɛ ne ye ahennie ne, mefa mehyɛ wɔ kyɛ;

² bɔ edwirɛ ne dawure, ná kɔ so yɔ, kyɛ mmerɛ paa nu oo, anaa mmerɛ tɛɛ nu oo. Maa mmenia benwu bɛ mvomsoɛ, twi bɛ nyunu, tu foɛ, wɔ ndoboaseɛ ne aboterɛ amukoraa nu.

³ Ofikyɛ mmerɛ bie kɔwa bɔ mmenia ngotie ngyerɛkyerɛ bɔ ɔte paa ne, na mmom bɛ so anu bɔ ɔyɛ bɛ fɛ ne ati, bɛkɔboaboa akyerɛkyerɛfoɛ noa maa bɛkɔhã edwirɛ bɔ bɛpena kyɛ bɛte ɔ.

⁴ Bekotuatua bɛ so wɔ nahorɛ ne anwo, ná baatie ɛhoaa mmom.

⁵ Nakoso wɔ de, ma wɔ nye la berɛ wɔ nikyee biala nu, mia wɔ nye fa amaneɛ nu, yɔ nzɛmbahanɛniɛ adwuma ne, ná yie wɔ solɛ adwuma ne bɔkɔɔ.

⁶ Na me de, mmerɛ ne adwu bɔ bɛbaafa me bɛbɔ afɔleɛ ɔ, na mmerɛ ne apingye kyɛ ngofi wa ɔ.

⁷ Koɛ paa ne, maho; amirika ne, matu mayie; gyidie ne, masɔ nu.

⁸ Na bɔ waha bɔ ɔla berɛ ma me ole tenenee abotire bɔ Awurade, ndɛenbualɛniɛ tenenee ne ɔkɔfa kɔbɔ m’aba so sɔ Kyẽa ne ɔ; bɔ nna me ngome, na mmom bɛ bɔ bekuro ye nwo aliyelɛ ne amukoraa koso ɔkɔbɔ b’aba so bie.

Pɔɔlo wora dɔ Timoteo

⁹ Bɔ mmɔden bra me wa ndɛndɛ.

¹⁰ Ofikyɛ Dema ahuro kekesaala ye wiase ye dwirɛ, na wayakyi me nu wasi nu wahɔ Tɛsalonika; Kreseke ahɔ Galatia, yeɛ Tito ahɔ Dalmatia.

¹¹ Luka ngome twe yeɛ ɔne me wɔ wa ɔ. Ɛba a, fa Marko boka wɔ nwo so bra, ofikyɛ ye nwo hia me paa wɔ ɛsolɛ adwuma ne anu.

¹² Masoma Tihiko wɔ Ɛfeso.

¹³ Sɛ ɛba a, fa m’ataadeɛ aguasoɛ bɔ mva nyakyili Kapuse wɔ Troase ne brɛ me, yeɛ nwomaa nemɔ koso, nganga nwomaa bɔ so te kokwakokwa nemɔ.

¹⁴ Kɔɔbere dwumvoɛ Aleksandro wafa edwirɛ bɔ ɔtte mayee koraa wali me. Awurade kotua ye kerɛ kyɛbɔ ye yɔleɛ te ɔ.

¹⁵ Wɔ koso nea wɔ nwo yé wɔ ye nwo, ofikyɛ ɔho tiale yɛ dwirɛ ne anyeborolɛ so.

¹⁶ Na mmerɛ bɔ né meye me noa bɔ oli moa mefa mesa me nwo ne, ebiala wammangyina me si; bɛ mukoraa bɛyakyili me nu bɛhɔle. Na mesrɛ kyɛ nnɛmaa benya ye nwo asohwenɛ.

¹⁷ Nakoso Awurade gyinane me si mane me anwoserɛ, kyɛbɔ ɔkɔyɛ bɔ ɔkɔfa me so kɔbɔ edwirɛ ne dawure bɔkɔɔ kɔma Amaenmaensofoɛ amukoraa bɛkɔte ɔ. Yiti ɔpepɛ lele me fili gyata noa nu.

¹⁸ Awurade kɔpepɛ kole me kofi musue amukoraa nu, na okole me kɔhɔ ye nyameɛso ahennie ne anu. Ye yeɛ animnyam ɔte ye deɛ daa daa afebɔɔ ɔ. Amen.

Ngraalilɛ

¹⁹ Mebisa Prisika ne Akwila, yeɛ Onesiforo awuro ama ahye.

²⁰ Eraseto hale Korinto, na Trofimo de, nyakyili ye Mileto bɔ né ɔnde apɔ ɔ.

²¹ Bɔ mmɔden dwu wa koraka né prakasua ne awa. Yubulo ne Pudɛn ne Lino ne Klɔdia ne aliɛmaa nemɔ amukoraa bebisa wɔ ahye.

²² Awurade [Yesu Kristo] ne wɔ sunzum bɛtena. Adom ɔ́yɛ ɛmɔ deɛ. Amen.