2 Timoteo 3 - AHYERƐLƐ KRONGRON

Ayieleɛ mmerɛ ne

¹ Nakoso kaye kyɛ, ayieleɛ mmerɛ ne, mmerɛ bɔ nu yɛ se ɔ kɔwa.

² Ofikyɛ mmenia kɔyɛ pɛsɛmangomenya, sikanyeboro, anwohoahoa, anwomasoɛ, musue dwirɛ kekanɛfoɛ, bɛkɔyɛ awofoɛ so asoserɛ, boniayɛfoɛ, mmenia bɔ bɛmva krongronyɛlɛ bɛnyɛ huu,

³ bengonya sona nwo dɔ, amvamvirifoɛ, ɛsoentolɛfoɛ, bɛ bɔ bɛnhyɛ b’akɔnnɔ so ɔ, bɛ bɔ bɛ ti anu te awosii, bɛ bɔ bɛpo nikye paa biala,

⁴ bɛ bɔ bɛye bɛ mmango mɔ bɛma, asobrakyeɛfoɛ, bekoli bɛ ti piri, ná bahuro anigye batra Nyameɛ;

⁵ bɛkɔyɛ bɛ nwo kyɛ basɔ nyamesom paa ne anu, nakoso bɛpo tumi bɔ ɔwɔ nu ne. Twe wɔ nwo fi sɔ mmenia nemɔ nwo.

Akyerɛkyerɛfoɛ ngondombofoɛ

⁶ Sɔ mmenia ne, bɛ nu biemɔ wurawura awuro mɔ nu, na bɛlakalaka mmrasua bɔ b’adwene te nganga, bɔ bɔne ayɛ bɛ so adesoa, ná akɔnnɔ ahoroɔ ahyɛ bɛ so ɔ benya bɛ;

⁷ mmrasua bɔ bekuro kyɛ daa besua nikye, nakoso bɛngɔhora bengonwu nahorɛ ne le ɔ.

⁸ Na kyɛbɔ Yane ne Yambrɛ bedwɔso betiale Mose nen, sɔ ala yeɛ sɔ mmenia nemɔ koso bɛko betia nahorɛ ne ɔ. Bɛte mmenia bɔ b’adwene ali naakye, ná babɔ ase wɔ gyidie nu ɔ.

⁹ Nakoso bɔ bɛyɔ ne ongoosi pasiliwa biala, ofikyɛ bɛ ngwaseasɛm ne kɔla ali wɔ mmenia amukoraa nyunu, kyɛbɔ mmenia nyɔ ne deɛ yɛle ne.

Foɛtulɛ bɔ ɔpɛ ye bo ɔ

¹⁰ Nakoso wɔ de, ɛse me ngyerɛkyerɛ ne paa, me brabɔlɛ, me botaeɛ, me gyidie, m’animia, me dɔ ne m’aboterɛ;

¹¹ ndaneanyeɛ bɔ wato me, m’amaneɛ bɔ ɔtole me wɔ Antiokia, Yikoniom ne Lisetra, ɔne ndaneanyeɛ ahoroɔ bɔ ɔtole me ne; nakoso Awurade lele me fili ye mukoraa nu.

¹² Amba, sona biala bɔ ɔpena kyɛ ɔbɔ bra bɔ ɔsɔ anyeɛ wɔ Kristo Yesu nu ne, bɛkɔtane ye nye.

¹³ Na amumuyɛɛfoɛ ne aminɛlilɛfoɛ bɛkɔhɔ so bɛkɔlɔ asukɔ wɔ bɔne nu; bɛkɔlakalaka mmenia, ná mmenia koso alakalaka bɛ.

¹⁴ Nakoso wɔ de, bɔ asua ɔne bɔ ale ali ne, kɔ so sɔ nu yé, ofikyɛ sona bɔ esua fili ye berɛ ne, ɛse kyɛbɔ osi te ɔ,

¹⁵ ɔne kyɛbɔ ofi wɔ ngwadaa nu yeɛ anwu Ahyerɛlɛ Krongron ne kyɛ ɔkora maa enwu nworɛ bɔ ɔnate Yesu Kristo nu gyidie so ɔfa wɔ kɔ ngoalelɛ nu ɔ.

¹⁶ Ahyerɛlɛ ne amukoraa fi Nyameɛ nwomeɛ nu yeɛ ɔwale ɔ, na ɔte paa ma ngyerɛkyerɛ, ɔma sona nwu ye mvomsoɛ, bɛfa bɛtengyɛtengyɛ sona, na bɛfa bɛtete sona wɔ tenenee atee so,

¹⁷ amaa ɔnate so Nyameɛ sona wayɛ pɛpɛɛpɛ bɔ bama ye ndeteyɛɛ bɔ odi mu ɔ bama nnwumaa paa amukoraa.