2 Timoteo 2 - AHYERƐLƐ KRONGRON

Kristo nahorɛ asraaniɛ

¹ Yiti mma, ma wɔ nwo yɛ se wɔ adom bɔ ɔwɔ Kristo Yesu nu ne anu.

² Na bɔ ɛte fili me berɛ wɔ adanzefoɛ pee bɛ nyunu ne, fa wura mmenia bɔ bedi nahorɛ bɔ bɛkɔhora bekohyirehyire ebiemɔ koso ɔ bɛ sa.

³ Na wɔ koso, mia wɔ nye nwu amaneɛ kyɛ Kristo Yesu sraaniɛ paa.

⁴ Sraaniɛ bɔ ogyi koɛ noa nen, ɔmva daadaa asetena nu dwirɛ mɔ ngyekye ye nwo, ofikyɛ okuro kyɛ ɔsɔ bɔ ɔfale ye adwuma ne nye.

⁵ Na bɛmva ngonim abotire ne bɛmmɔ amirikatulɛniɛ, sana odi amirikatulɛ ne nwo mmeraa so.

⁶ Kuaniɛ bɔ ɔyɔ adwuma ne, ye yeɛ ɔsɛ kyɛ odi moa di nu aleɛ ne bie ɔ.

⁷ Dwene bɔ mekã ne anwo, ofikyɛ Awurade kɔma wɔ nikyee biala nu ndeaseɛ.

⁸ Kaye Yesu Kristo, Dawide bosoniɛ ne bɔ otingyele fili awufoɛ nu, kyɛbɔ me nzɛmba ne te ne,

⁹ nzɛmba ne bɔ yiti yeɛ menwu amaneɛ ná babɔ me panwu kyɛ wudiniɛ ne; nakoso Nyameɛ dwirɛ ne de, bɛbbɔle ye panwu.

¹⁰ Yiti ɔnate mmenia bɔ baneanea nu baye bɛ ne ati, memia me nye menwu amaneɛ mukoraa, amaa ɔnate so bɛ koso banya ngoalelɛ bɔ ɔwɔ Kristo Yesu nu ne ɔne animnyam afebɔɔ ne.

¹¹ Nahorɛ dwirɛ ɛhe: “Sɛ yɛne ye yawu a, yɛne ye yɛkɔtena ase koso;

¹² sɛ yɛmia yɛ nye yɛtindim a, yɛne ye koli hene koso; sɛ yɛpo ye a, ye koso ɔkɔpo yɛ;

¹³ sɛ yɛnni nahorɛ a, ye de, odi nahorɛ daa, ofikyɛ ɔngora mbɛ ngondombo.”

Adwumayɔlɛniɛ bɔ ɔsɔ Nyameɛ nye ɔ

¹⁴ Kaye bɛ wɔ nningyein hemɔ nwo, ná bɔ bɛ kɔkɔ wɔ Awurade nyunu, kyɛ nnɛmaa besu edwirɛ mɔ nwo aporowaa bɔ mvasoɛ biala nne so ɔ, ofikyɛ ɔsopa bɛ bɔ betie ne.

¹⁵ Bɔ mmɔden paa kyɛ ɛkɔsɔ Nyameɛ nye, kyɛ adwumayɔlɛniɛ bɔ ye adwuma nwo nyɛ ye nya ɔ, kyɛ sona bɔ okyirekyire nahorɛ dwirɛ ne pɛpɛɛpɛ ɔ.

¹⁶ Twe wɔ nwo fi edwirɛ mbaen mbaen bɔ ye nwo nde ɔ nwo, ofikyɛ odiedie mmenia fa bɛ kɔ musue nu.

¹⁷ Bɛ ngyerɛkyerɛ ne, ɔtrɛ kyɛ anwonyerɛ tɛɛ bɔ odidi anwoɔnaen ɔ, na bɛ nu biemɔ ole Himeneo ne Fileto,

¹⁸ bɔ bali nahorɛ ne nwo makyebu bekyirekyire kyɛ ewutingyelɛ apɛ nu ahɔ dadaada, ná bɛfa bɛsɛkye ebiemɔ gyidie ɔ.

¹⁹ Nakoso Nyameɛ fapem ne, ogyi berɛ pindinn, bɔ nzɔanoɛ he sɔ ye noa ɔ: “Awurade se bɛ bɔ bɛte ye deɛ”, yeɛ “Ma ebiala bɔ ɔbɔ Awurade dumaa ne ɔhwe ye nwo fi amumuyɛɛ nwo.”

²⁰ Nna esikaa kɔkorɛ ne ɛdwetɛ nningyein ngome yeɛ bɛwɔ awuro piri nu ɔ, na mmom mmakaa ne ɛfaa deɛ koso wɔ nu bie. Bɛfa anidie bɛma bɛ nu biemɔ, yeɛ ebiemɔ de bɛmva anidie bɛmma bɛ.

²¹ Na sɛ sona te ye nwo fi bɔ bɛmva anidie bɛmma ye ne anwo a, ɔkɔyɛ nikyee bɔ bɛfa anidie bɛma ye ɔ, bɔ bate ye nwo, bɔ ye mene fa yɛ nikyee a ɔyɛ yé ɔ, ná wasiesie ye nwo wama adwuma paa biala.

²² Yiti twe wɔ nwo fi mmerandeɛ nu akɔnnɔ nwo, ná fa wɔ nye sie tenenee, gyidie, ɔdɔ ne asomdwee so, ɛne bɛ bɔ befi ahone bɔ nu te ɔ nu bɛfrɛ Awurade bɛbɔ nu ne.

²³ Nakoso ngwaseaa aporowaasulɛ ne edwirɛ mbaen mbaen de, twe wɔ nwo fi ye nwo, ofikyɛ ɛse kyɛ bɛne ngondii yeɛ bɛnate ɔ.

²⁴ Ɔnzɛ kyɛ Awurade akoaa kuro ngondii, na mmom ɔsɛ kyɛ ɔbrɛ ye nwo ase ma ebiala, ɔkora yɛ ngyerɛkyerɛ, ná onya aboterɛ,

²⁵ ná ɔfa anwobrɛaseɛ nu dwudwo kyire bɛ bɔ bɛne ye nyɛ adwene ɔ. Ofikyɛ ebiaa né Nyameɛ amaa basakyera b’adwene ná banwu nahorɛ ne,

²⁶ ná banya bɛ ti badidi nu bafi abɔnzam bɔ wahye bɛ nnure kyɛ bɛyɔ ye apɛdeɛ ne, ye ngaen nu.