2 Tɛsalonika 2 - AHYERƐLƐ KRONGRON

Amumuyɛɛniɛ ne

¹ Aliɛmaa mɔ, bɔ ɔfa y’Awurade Yesu Kristo walɛ ne ne nwo, ɔne yɛ noa boalɛ bɔ yɛkwaafa yɛyia ye ne nwo de, yɛsrɛ kyɛ nnɛmɔma ɔyɛ ɛmɔ ti anu kesenee,

² Nyekyire, anaa edwirɛ anaa krataa bɔ ebiemɔ nwa ofi yɛ berɛ ne, bɔ okyire kyɛ Awurade kyẽa ne wawa nen, nnɛmɔma ɛmɔ ti anu yɛ ɛmɔ kesenee ndɛndɛ wɔ ye nwo, anaa nnɛmɔma ɔha ɛmɔ.

³ Nnɛmɔma ebiala lakalaka ɛmɔ wɔ atee biala so; ofikyɛ sɔ kyẽa ne ngɔwa, sana ɛlɔenyɛlɛ ne ba koraka; na afei bala amumuyɛɛniɛ ne ali koraka, baa bɔ wamini ne.

⁴ Ye yeɛ odwɔso tia, na osa ma ye nwo so tra nikyee biala bɔ bɛfrɛ ye Nyameɛ ná bɛsɔne ye ɔ; na ɔkɔtena Nyameɛ asɔneyɛɛ sua nu kɔfrɛ ye nwo kyɛ ye ole Nyameɛ.

⁵ Aso ɛmɔngaye kyɛ ngane ɛhemɔ ngyirele ɛmɔ wɔ mmerɛ bɔ né nwɔ ɛmɔ berɛ nen?

⁶ Na ɛmɔ de, ɛmɔse nikye horɛ bɔ kekesaala ye osi ye ate ɔ, amaa bala ye ali wɔ ye mmerɛ nu.

⁷ Ofikyɛ mvealeɛ nu amumuyɛɛ wahyɛ ye adwuma bo dada, na bɔ osi ye ate kekesaala ye ne, ɔkɔhɔ so kosi ye ate, kɔpem kyɛ bɛkɔye bɔ osi ye ate ne bekofi berɛ ɔ.

⁸ Na ɛhe asi ye yeɛ bɛkɔma amumuyɛɛniɛ ne nwo kɔla ali ɔ. Na Awurade Yesu kɔfa ye noa nu nwomeɛ kohũ ye, ná afei wafa ye animnyam walɛ ne wasɛkye ye bɔkɔɔ.

⁹ Amumuyɛɛniɛ ne kɔfa abɔnzam dwumadie so yeɛ ɔkɔwa ɔ, na okonya tumi kɔyɔ nzɛngyerɛnneɛ ne nnakannaka anwanwadeɛ mukoraa.

¹⁰ Na ɔkɔfa nnakannaka ne amumuyɛɛ atee mukoraa so konya bɛ bɔ begu so bemini ne, ofikyɛ bɛyɛle asoserɛ wɔ nahorɛ bɔ ɔma daa ngoa ne nwo.

¹¹ Ɛhe ati Nyameɛ kɔsoma nnakannaka tumi maa okoli dwumaa wɔ bɛ nu, na bale ngondombo bali.

¹² Yiti bekobua bɛ bɔ banne nahorɛ ne banni, na mmom bɛ nye gye bɔ ɔndengyɛ nwo ne amukoraa ndɛen.

Baye ɛmɔ kyɛ ɛmɔnya ngoa

¹³ Aliɛmaa mɔ bɔ Awurade kuro ɛmɔ dwirɛ ɔ, ɔte yɛ asɛdeɛ kyɛ ɔnate ɛmɔ ti daa yɛda Nyameɛ ase ɔ. Ofikyɛ Nyameɛ fi ahyɛaseɛ ne yeɛ waneanea nu waye ɛmɔ kyɛ ɛ́mɔnya daa ngoa, bɔ ɔnate Sunzum nu anwotelɛ ne nahorɛ gyidie nu ɔ.

¹⁴ Ɔnate yɛ nzɛmba ne aso yeɛ wafrɛ ɛmɔ kyɛ ɛmɔɔnya kyɛfa wɔ y’Awurade Yesu Kristo animnyam nu ɔ.

¹⁵ Yiti aliɛmaa mɔ, ɛmɔgyina pindinn, na ɛmɔsɔ ngyerɛkyerɛ bɔ yɛnate yɛ noa dwirɛ anaa krataa so yafa yahyire ɛmɔ ne anu yé.

¹⁶ Na afei, Y’Awurade Yesu Kristo bɔbɔ ne yɛ Baba Nyameɛ, bɔ okuro yɛ dwirɛ, ná walo yɛ wama yɛ daa asomdwee ne anyelasoɛ paa ne,

¹⁷ ɔ́kyekye ɛmɔ wora, ná ɔma ɛmɔ anwoserɛ wɔ edwirɛ ne adwuma paa mukoraa nu.