2 Samuel 8 - AHYERƐLƐ KRONGRON

Dawide di ngonim wɔ koɛ ahoroɔ nu

¹ Nziɛ ye, Dawide fale koɛ ɔɔtoale Filistifoɛ, na olili bɛ so ngonim. Dawide lele Metege Amma fili Filistifoɛ sa nu.

² Dawide lili Moabofoɛ koso so ngonim. Ɔmaa bɛlelale aseɛnwo berɛ fekue fekue nza. Ohuni fekue nyɔ, na ɔmane fekue ko nyane ye ti didili nu. Yiti Moabofoɛ bɛɛyɛle Dawide ngoaa bɔ né betua ɛtoɔ bɛma ye ɔ.

³ Soba hene Hadadesa bɔ ɔse ole Rehobo ne, ye koso Dawide lili ye so ngonim, wɔ mmerɛ bɔ né ɔkwaaho trɛ ye ahennie ne anu wɔ asue Yufreti noa ɔ.

⁴ Dawide hyele Hadadesa pɔngɔhanɛfoɛ nemɔ anu apee ko ɛyaa nzoo, ɔne koɛhonɛfoɛ bɔ bɛnate ase ɔ apee aburanyɔ. Mbɔngɔ amukoraa bɔ teaseɛnam sosɔ bɛ ne, Dawide pepɛle bɛ gya si ndii nu, nakoso ɔyakyili mbɔngɔ ne bie bɔ bɛkɔfa teaseɛnam ɛyaa ko bɛkɔsosɔ bɛ ɔ.

⁵ Na Siriafoɛ bɔ bɛwɔ Damasko ne, bɛwale kyɛ bɛbaaboka Soba hene Hadadesa nen, Dawide huni Siriafoɛ nemɔ anu apee aburanyɔ ne nyɔ.

⁶ Afei Dawide ɔɔkyekyele koɛhonɛfoɛ asikyeleɛ mɔ wɔ Damasko bɔ ɔwɔ Siria. Na Siriafoɛ bɛɛyɛle Dawide ngoaa bɔ né betua ɛtoɔ bɛma ye ɔ. Na AWURADE mane Dawide lili ngonim wɔ koɛ biala bɔ ɔhone ɔ nu.

⁷ Sikaa kɔkorɛ akokyɛm bɔ né Hadadesa mbanyi mɔ betiratira ne, Dawide lele bɛ sa nu fa wale Yerusalem.

⁸ Nana Dawide fale kɔɔbere pee fili Hadadesa nguro Beta ne Berotae so.

⁹ Na mmerɛ bɔ Hamate hene Toyi tele kyɛ Dawide ali Hadadesa koɛhonɛfoɛ amukoraa so ngonim ne,

¹⁰ Toyi somane ɔwa bienzua Yoram wɔ Nana Dawide berɛ maa oobisale ye ahye yɛle ye mmo, kyɛ wali Hadadesa so ngonim ɔ, ofikyɛ né Hadadesa ne Toyi bɛtaa bɛko koɛ. Yoram ɔkɔ Dawide berɛ ne, ɔfale mbembenanneɛ bɔ bafa ɛdwetɛ, esikaa kɔkorɛ ne kɔɔbere bayɔ yeɛ ɔhɔle ɔ.

¹¹ Na Nana Dawide tuli sɔ nningyein nemɔ koso siele berɛ mane AWURADE sɔnenɛ, kyɛbɔ maen mɔ bɔ olili bɛ so ngonim ne, otuli b’ɛdwetɛ ne sikaa kɔkorɛ siele berɛ mane AWURADE sɔnenɛ ne.

¹² Sɔ nningyein ne fi Siria, Moabo, Amonfoɛ, Filistifoɛ ne Amalɛkefoɛ berɛ, yeɛ koɛ nu nzesadeɛ bɔ onya fili Soba hene Hadadesa bɔ ɔse ole Rehobo berɛ ne.

¹³ Mmerɛ bɔ Dawide oohuhuni Siriafoɛ apee buru ne mmɔtwɛ wɔ Ngyee Bɔnza ne anu ná osa wale ne, ye dumaa trɛle.

¹⁴ Ɔmane ye koɛhonɛfoɛ bɛɛkyekyele asikyeleɛ wɔ Edom. Bɛkyekyele ye wɔ Edom amukoraa, na Edomfoɛ amukoraa bɛɛyɛle Dawide ngoaa. Na AWURADE mane Dawide lili ngonim wɔ koɛ biala bɔ ɔhone ɔ nu.

Dawide mbanyi mɔ

¹⁵ Yiti Dawide lili Yisrael amukoraa so hene. Nahorɛlilɛ ne pɛpɛɛpɛyɛlɛ yeɛ ɔfa lili ye mmenia ne amukoraa so ɔ.

¹⁶ Né Seruya awa Yoabo ɔte koɛhonɛfoɛ nemɔ so safohene; né Ahilude awa Yehosafate ɔte maen ne anu abakɔsɛm ahyerɛlɛniɛ;

¹⁷ né Ahitubo awa Sadoke ne Abiata awa Ahimɛlɛke bɛte asɔfo; yeɛ né Seraya te ahemvie berɛ ahyerɛlɛniɛ.

¹⁸ Né Yehoada awa Benaya ɔte Keretifoɛ ne Peletifoɛ so safohene; yeɛ né Dawide mma mmienzua nemɔ bɛte maen mbanyi.