2 Samuel 6 - AHYERƐLƐ KRONGRON

Dawide fa apam alaka ne ba Yerusalem

¹ Yisrael koɛhonɛfoɛ bɔ bɛse ko paa ne, Dawide mane bɛ mukoraa bɛboale bɛ noa bieku. Né bɛte apee aburasa.

² Dawide ne koɛhonɛfoɛ bɔ bɛboka ye so ne amukoraa besili nu befili Baale Yuda, kyɛ bɛkwaafa Nyameɛ apam alaka ne bɛba. Alaka ne, Asafo AWURADE bɔ ye ahennie bia wɔ kɛrubim nemɔ afia ne, ye dumaa la so.

³ Bɛfale Nyameɛ alaka ne besiele teaseɛnam monɛ kamee so, na bɛye befili Abinadabo awuro bɔ ogyi pambaa so ne anu. Teaseɛnam monɛ kamee bɔ Nyameɛ apam alaka ne gyi so ne, Abinadabo mma Yusa ne Ahio yeɛ bɛfa bɛhɔle ɔ.

⁴ Né Ahio li Nyameɛ alaka ne nyunu.

⁵ Na Dawide ne Yisrael awuro ama amukoraa bɛfale sangoo, adengum, akasaa, donno ne firikyiwa bɛfale b’anwoserɛ mu bɛtole dwein begole abilie wɔ AWURADE nyunu.

⁶ Na beedwuli Nakɔn ye nekaa bɔ bɛboro aburoo nen, nandwie nemɔ sotili, yiti Yusa tengyɛle ye sa sɔle Nyameɛ alaka ne anu.

⁷ AWURADE fɛle Yusa so yaa, ofikyɛ ɔtengyɛle ye sa sɔle alaka ne anu. Nyameɛ bɔle ye tole ase wɔ berɛ, na owuli tɔle Nyameɛ alaka ne anwo berɛ.

⁸ Dawide fɛle yaa, ɔnate kyɛ AWURADE fɛle yaa tuale Yusa so kerɛ. Yiti bafrɛ berɛ Pɛrɛse Yusa maa waadwu ɛnɛ.

⁹ Dawide surole AWURADE sɔ kyẽa ne, na ɔhane kyɛ, “Ɔkɔyɛ sɛɛ né mahora mafa AWURADE alaka ne mahɔ m’awuro?”

¹⁰ Yiti Dawide anguro kyɛ ɔkɔfa AWURADE alaka ne ɔkɔ ye awuro wɔ Dawide kuro ne anu, na mmom Dawide makye fale alaka ne hɔle Gitiniɛ Obɛde Edom awuro.

¹¹ AWURADE alaka ne lili Gitiniɛ Obɛde Edom awuro bosome nza, na AWURADE yirale Obɛde Edom ne ye awuro ama mukoraa.

¹² Na ebiemɔ bɛbɔle Nana Dawide amaneɛ kyɛ, “Ɔnate Nyameɛ alaka ne ati, AWURADE ayira Obɛde Edom awuro ama, ɔne bɔ ole ye amukoraa.” Yiti Dawide hɔle anigye so ɔɔfale Nyameɛ alaka ne fili Obɛde Edom awuro wale Dawide kuro ne anu.

¹³ Na bɛ bɔ bɛsõ AWURADE alaka ne, betuli bɛ gya nzia ne, Dawide fale nandwie ne nandwie sayɛɛ bɔle afɔleɛ.

¹⁴ Dawide fale ye anwoserɛ amukoraa gole abilie wɔ AWURADE nyunu. Né Dawide afa ɔsɔfo ataadeɛ bɔ ɔte nwera ɔ wapɛ ye bo.

¹⁵ Na Dawide ne Yisrael awuro ama amukoraa bɛbɔle ese behuli totorobɛndo bɛfale AWURADE alaka ne bɛwale Yerusalem.

¹⁶ Mmerɛ bɔ AWURADE alaka ne oodwuli Dawide kuro berɛ nen, Sɔɔlo awa brasua Mikal tole ye nye neane mboma nu. Onwuni kyɛ Nana Dawide ohuru pepe go abilie wɔ AWURADE nyunu ɔ, na obuli Dawide animtia wɔ ye ti anu.

¹⁷ Bɛfale AWURADE alaka ne beesiele nekaa bɔ basiesie bama ye ne, wɔ ɛtena sua bɔ Dawide si siele berɛ mane ye ne anu. Na Dawide bɔle naen yeralɛ afɔleɛ ne asomdwee afɔleɛ wɔ AWURADE nyunu.

¹⁸ Dawide bɔle naen yeralɛ afɔleɛ ne asomdwee afɔleɛ yiele ne, ɔsrɛle Asafo AWURADE saleɛ mane maen ne.

¹⁹ Na ɔhyɛle aleɛ mane Yisrael maen ne anu mmienzua ne mmrasua mukoraa. Ebiala nyane paanoo mumua ko, naen porɛ ko ne bobe taterɛ ko. Na afei ebiala hɔle ye awuro.

²⁰ Nziɛ ye, Dawide sa hɔle kyɛ ɔkwaasrɛ Nyameɛ saleɛ ma ye awuro ama. Yeɛ Sɔɔlo awa Mikal fitele ooyiale Dawide, na osele Dawide kyɛ, “Ɛnɛ de, Yisrael hene ayɛ ye nwo bie paa! Wapa ye nwo ɛnɛ wɔ ye somvoɛ mɔ b’afaneɛ mɔ nyunu, kyɛbɔ sona bɔ ɔnze nyanzoen si pa ye nwo ɔ!”

²¹ Na Dawide buale Mikal kyɛ, “AWURADE bɔ ɔyele wɔ baba ne ye awuro ama mukoraa siele ahameɛ, ná ɔneaneane nu yele me sili me hene wɔ ye maen Yisrael so ne, ye nyunu yeɛ ngole abilie ne ɔ.

²² Ngɔyɔ bɔ ɔtra sɔ koraa, maa ekobu me kyɛ magua me nyunu ase. Nakoso afaneɛ mɔ bɔ ɛkã bɛ nwo dwirɛ ne, bɛ yeɛ bɛkɔhyɛ me animnyam ɔ.”

²³ Na Sɔɔlo awa Mikal wanwo ba le ɔfa hɔle wue.