2 Samuel 5 - AHYERƐLƐ KRONGRON

Dawide di Yisrael mukoraa so hene

¹ Afei Yisrael abusua kure amukoraa wale Dawide berɛ beesele ye kyɛ, “Nana, yɛte wɔ bɔbɔ wɔ nnehyeɛ.

² Daa ne, bɔ né Sɔɔlo di yɛ so hene ne, né sɛ yɛkɔ oo, sɛ yɛba oo, wɔ yeɛ né edi Yisrael nyunu ɔ. Na AWURADE aha ahyire wɔ kyɛ, Wɔ yeɛ ɛkɔyɛ me maen Yisrael so neafoɛ ɔ, na wɔ yeɛ ɛkɔla Yisrael noa ɔ.”

³ Mbanyi ne amukoraa wale Nana Dawide berɛ wɔ Hebron. Nana Dawide ne bɛ yɛle apam wɔ AWURADE nyunu wɔ Hebron, na bɛpopale Dawide ngoo bɛfale ye besili Yisrael so hene.

⁴ Dawide hyɛle ye bo lili hene ne, né wali afoɛ aburasa, na olili hene afoɛ aburanna.

⁵ Olili Yuda so hene wɔ Hebron afoɛ nzoo ne bue; yeɛ olili Yisrael amukoraa ne Yuda so hene wɔ Yerusalem afoɛ aburasa ne nza.

Dawide ko fa Yerusalem

⁶ Yebusifoɛ bɔ né bɛte aseɛ ne aso ne, Nana Dawide ne ye koɛhonɛfoɛ sili nu hɔle Yerusalem bɛɛfale koɛ bɛtoale bɛ. Na Yebusifoɛ sele Dawide kyɛ, “Ɛngɔhora wa ba, ofikyɛ anyesiniwaafoɛ ne mmubuafoɛ mɔ po bɛkɔfoa wɔ maa ekosa.” Besusuli kyɛ Dawide ngɔhora ngowura kuro ne anu.

⁷ Nakoso Dawide lili Sion kuro bɔ ɔte anwoserɛ afealeɛ ne aso ngonim. Na ye ala yeɛ waayɛ Dawide kuro ne.

⁸ Sɔ kyẽa ne, Dawide sele kyɛ, “Ebiala bɔ ɔpena kyɛ okoku Yebusifoɛ nen, bɛ bɔen bɔ bapɛ bɔ nzue tengyɛ fa nu ba kuro ne anu ne, odi kyɛ okowura nu kuku mmenia bɔ bɛnwa bɛte mmubuafoɛ ne anyesiniwaafoɛ bɔ bɛ nwo ayɛ me Dawide ahi ne.” Ɛhe ati yeɛ waayɛ edwirɛ bɔ ɔla berɛ kyɛ, “Anyesiniwaafoɛ ne mmubuafoɛ gya baa ndia (Nyameɛ) awuro berɛ.”

⁹ Dawide tenane anwoserɛ afealeɛ ne anu, na ɔtole berɛ dumaa Dawide kuro. Dawide tole kuro ne anwo fasue bra yiale, fite nekaa bɔ bɛfrɛ ye Milo ne maa oodwuli kuro ne anu.

¹⁰ Dawide hɔle so nyane ngɔsoɛ, ofikyɛ AWURADE, Asafo Nyameɛ gyinane ye si.

¹¹ Tiro hene Hiram tuli mmenia maa bɛhɔle Dawide berɛ. Bɛfale sida mmakaa bɛɛmane ye. Bakaa dwumvoɛ mɔ ne suasilɛfoɛ boka so yeɛ bɛhɔle ɔ, na besili awuro bɛmane Dawide.

¹² Afei Dawide nwuni ye kyɛ AWURADE afa ye asi Yisrael so hene, na ɔnate AWURADE maen Yisrael ti, AWURADE apagya ye Dawide ahennie ne.

¹³ Dawide tu fili Hebron wale nen, ye si ye ɔfale sómaa pee, na ogyale mmraa koso pee wɔ Yerusalem. Dawide wole mmaa mmienzua ne mmrasua pee.

¹⁴ Ye mma bɔ ɔwole bɛ wɔ Yerusalem ne, bɛ dumaa ɛhe: Samua, Sobabo, Natan, Solomon,

¹⁵ Yibare, Elisua, Nefege, Yafia,

¹⁶ Elisama, Eliada, yeɛ Elifɛlɛte.

Dawide di Filistifoɛ so ngonim

¹⁷ Filistifoɛ tele kyɛ bapopa Dawide ngoo bafa ye bali Yisrael so hene ne, Filisti koɛhonɛfoɛ amukoraa hɔle kyɛ bɛkwaapena Dawide bɛkye ye. Nakoso Dawide tele sɔ dwirɛ nen, oowurale anwoserɛ afealeɛ ne anu.

¹⁸ Filistifoɛ nemɔ wale bɛɛyɛle Refaim bɔnza ne anu mitimiti.

¹⁹ Na Dawide bisale AWURADE kyɛ, “Mva koɛ ngɔndoa Filistifoɛ anaa? Ɛkɔfa bɛ kowura me sa anaa?” Yeɛ AWURADE buale Dawide kyɛ, “Kɔ, ngɔfa Filistifoɛ ngowura wɔ sa amba.”

²⁰ Yiti Dawide hɔle Baal Perasim, na olili bɛ so ngonim wɔ berɛ. Na ɔhane kyɛ, “AWURADE ahwi afa me pɔfoɛ mɔ so wɔ me nyunu kyɛbɔ asue yi twi fa nningyein so ɔ.” Yiti bɛfrɛle berɛ Baal Perasim.

²¹ Filistifoɛ nwatili bɛyakyili bɛ mmosoen berɛ, na Dawide ne ye koɛhonɛfoɛ nemɔ sesale bɛ hɔle.

²² Filistifoɛ sa hɔle bieku bɛɛyɛle Refaim bɔnza ne anu mitimiti.

²³ Dawide bisale AWURADE, na obuale kyɛ, “Nnɛkɔ wɔ nyunu tee, na mmom kakyi wɔ nwo kɔfa bɛ si. Kɔ bɛ so wɔ mmakaa bɔ bɛfrɛ ye basam ne ndendeneɛ so.

²⁴ Sɛ ɛte mmenia gya boso nga wɔ basam mmakaa nemɔ aso a, ye de kɔ Filistifoɛ so. Na ɛhe kyire kyɛ AWURADE ali wɔ nyunu moa okũkũ Filisti koɛhonɛfoɛ nemɔ.”

²⁵ Dawide yɔle kyɛbɔ AWURADE hyɛle ye ne ala, na ohuhuni Filistifoɛ nemɔ toonn fite Geba oodwuli Gɛsɛre.