2 Samuel 4 - AHYERƐLƐ KRONGRON

Rimon mma nemɔ ku Yisbosɛte

¹ Sɔɔlo awa Yisbosɛte tele kyɛ bahu Abenɛ wɔ Hebron nen, ye aba nu buli, na ɛserɛ tɔle Yisrael amukoraa so.

² Sɔɔlo awa ne, ye mmenia bɔ bɛbɔ apaa ne, né ole mmenia nyɔ bɔ bɛla bɛ noa ɔ. Ko dumaa li Baana, yeɛ ko wora li Rekabo. Bɛte Benyaminniɛ Rimon bɔ ofi Beerote ne ye mma. Né mmenia bu Beerote kyɛ ɔte Benyaminfoɛ kuro.

³ (Sɔ mmerɛ ne, né Beerotefoɛ banwati bahɔ Gitaim, na ɔbaadwu ɛnɛ ye, bɛtɛ wɔ berɛ kyɛ ɛwɔfoɛ mɔ.)

⁴ Né Sɔɔlo awa Yonatan le baa bienzua bubuaniɛ bie. Oli Mefibosɛte. Mmenia fili Yesreel bɛɛbɔle amaneɛ kyɛ Sɔɔlo ne Yonatan bawu nen, né Mefibosɛte ali afoɛ nnu. Baanealɛniɛ bɔ ɔnea ye ne pagyale ye nwatili. Na ndɛndɛ so bɔ ɔnwati nen, Mefibosɛte te tɔle, na ɔyɛle bubuaniɛ.

⁵ Beeroteniɛ Rimon ye mma Rekabo ne Baana besili nu, na beedwuli Yisbosɛte awuro eyia ketee, wɔ mmerɛ bɔ né ɔda eyia ɔ.

⁶ Sona bɔ ɔwɛne awuro berɛ anoa ne, né ɔpa atokoɔ nu, nakoso nnaa wuale ye, yiti Rekabo ne oliɛma Baana bɛhɔle awuro berɛ kudɛɛ [kyɛ mmenia bɔ bɛkwaafa atokoɔ ɔ. Bɛwɔle ye kunu dadeɛ, na bɛnwati bɛhɔle.]

⁷ Bɛhɔle awuro berɛ nen, né Yisbosɛte alafe wɔ ye mba so wɔ ye sua nu, na bɛwɔle ye dadeɛ behuni ye. Bɛpɛle ye ti, na bɛfale tire ne bɛnatele bɛɛfale Yɔɔdan bɔnza ne anu toonn kɔngɔen ne.

⁸ Bɛfale Yisbosɛte ti ne bɛbrɛle Nana Dawide wɔ Hebron, na bɛhane kyɛ, “Wɔ pɔfoɛ Sɔɔlo bɔ né ɔpena wɔ ku wɔ ne, ɔwa Yisbosɛte ye ti ɛhe. Nana, me mene, AWURADE atɔ Sɔɔlo ne ye boso ama so wereɛ wama wɔ.”

⁹ Nakoso Dawide buale Beeroteniɛ Rimon ye mma Rekabo ne oliɛma Baana kyɛ, “AWURADE teasefoɛ bɔ wabɔ me nwo waen wafi musue mukoraa nu ne, ngyi ye nyunu meka kyɛ,

¹⁰ sona bɔ ɔɔbɔle me amaneɛ kyɛ Sɔɔlo awu ne, né ye adwene yɛ ye kyɛ ndɛenvɛen yeɛ ɔfa brɛ me ɔ. Nakoso ngyele ye nguni ye wɔ Siklage. Amaneɛ bɔ ɔɔbɔle ne, bɔ mva nduale ye so kerɛ hɔ ɛne.

¹¹ Na sɛ nzɛmmɔnefoɛ ahu sona bɔ ɔtengyɛ, wɔ ye bɔbɔ ye awuro, wɔ ye mba so a, ye de ngotua bɛ so kerɛ piri paa! Ɔnate ehunɛ bɔ ɛmɔahu ye ne ati, ngotua ɛmɔ so kerɛ, na ngɔye ɛmɔ ngofi aseɛ ye aso.”

¹² Yiti Dawide mane ye mmerandeɛ nemɔ huni bɛ. Bɛpepɛle bɛ gya ne bɛ sa befili so. Na bɛ kundunzii ne, besinzele bɛ wɔ ɛkwaa bɔ ɔwɔ Hebron ne anwo. Nakoso Yisbosɛte ti ne de, besiele ye wɔ Abenɛ asieleɛ ne anu wɔ Hebron.