2 Samuel 3 - AHYERƐLƐ KRONGRON

¹ Koɛ bɔ ɔtɔle Sɔɔlo awuro ama ne Dawide awuro ama b’afia ne, ɔhɔle so hyɛle. Dawide hɔle so nyane ngɔsoɛ, nakoso Sɔɔlo sasofoɛ de, bɛhɔle so bɛhɔle ase.

Dawide mma mmienzua

² Dawide wole mmaa mmienzua wɔ Hebron. Ye bamuɛbaa ole Amnɔn bɔ oni ole Ahinoam bɔ ofi Yesreel ne.

³ Kileabo tɔ so nyɔ. Oni ole Abigail bɔ ofi Kamɛl bɔ ɔte Nabal kunaniɛ ne. Absalom tɔ so nza. Oni Maaka te Gesure hene Talmae awa.

⁴ Adoniya tɔ so nna. Oni ole Hagite. Sefatia tɔ so nnu. Oni ole Abital.

⁵ Yitream tɔ so nzia. Ɔte Dawide aye Egla awa. Sɔ mmaa mmienzua nemɔ yeɛ Dawide wole bɛ wɔ Hebron ɔ.

Abenɛ kɔ Dawide bue nu

⁶ Mmerɛ bɔ koɛ tɔle Sɔɔlo awuro ama ne Dawide awuro ama b’afia ne, Abenɛ mane ye dibea wɔ Sɔɔlo sasofoɛ nu hɔle anwuro.

⁷ Sɔɔlo te ase ne, né ye sómaa bie dumaa li Risipa. Ɔte Aya awa brasua. Na Yisbosɛte fa sili Abenɛ nyunu kyɛ, “Nzu ati yeɛ ɛne me baba sómaa ne bala ɔ?”

⁸ Yisbosɛte noa dwirɛ ne mane Abenɛ ahone huli paa maa ɔhane kyɛ, “Ɛnwa nzɛ nde kyea hɔ ɔ, bɔ mefa me ngoa meto serewa wɔ Yuda sa nu ɔ? Ɔbaadwu ɛnɛ ye, mali nahorɛ mama wɔ baba Sɔɔlo sasofoɛ, oliɛma mɔ ne ye damvo mɔ. Manye wɔ mamma Dawide. Nakoso afei de, braa he anwo kwaadu yeɛ ɛfa bɔ me ɔ.

⁹ Nea, ndaen bɔ AWURADE ta hyirele Dawide nen, sɛ manyɔ sɔ ala mamma Dawide a, Nyameɛ otua me Abenɛ so kerɛ piri paa!

¹⁰ Ɔtale ndaen kyɛ, ɔkɔye ahennie ne kofi Sɔɔlo awuro, ná wama Dawide ali Yisrael ne Yuda so hene, fite Dan bɔ ɔkwaadwu Beɛ Hyeba.”

¹¹ Né Yisbosɛte suro Abenɛ, yiti wangora wanga sɔ edwirɛ ne anwo hwee ko.

¹² Afei Abenɛ tuli ɛbɔfoɛ mɔ maa bɛhɔle Dawide berɛ wɔ Hebron beesele ye kyɛ, “Nwa yeɛ maen ye wura ye bo ɔ? Maa yɛyɛ apam, na ngɔboka wɔ maa Yisrael amukoraa bɛkɔwa wɔ bue nu.”

¹³ Na Dawide buale kyɛ, “Yoo, mate; me ne wɔ yɛkɔyɛ apam. Nakoso nikyee ko yeɛ mepena kyɛ ɛyɔ ma me ɔ. Ye ole kyɛ, nnɛba me nyunu, sɛ ɛ́ba me nyunu a, sana ɛfa Sɔɔlo awa brasua Mikal ɛboka wɔ nwo so ɛne ye bɛba.”

¹⁴ Na Dawide tuli mmenia maa bɛhɔle Sɔɔlo awa Yisbosɛte berɛ beesele ye kyɛ, “Me ye Mikal bɔ mvale Filistifoɛ ɛyaa ko bɛ bienzua noa nwomaa nyɛle ye nwo nningyein ne, fa me nikyee ma me.”

¹⁵ Na Yisbosɛte tuli mmenia maa beelele Mikal befili ohu Paltiɛl bɔ ɔse ole Layise ne berɛ bɛwale.

¹⁶ Nakoso ohu Paltiɛl fale esuɛ natele lili ye si toonn oodwuli Bahurim. Yeɛ Abenɛ sele ye kyɛ, “Sa wɔ si kɔ!” Na osale ye si.

¹⁷ Na Abenɛ ne Yisrael mbanyi belili ngitahoɛ kyɛ, “Ɛmɔyɛle kyɛ ɛmɔpena Dawide maa odi ɛmɔ so hene ɔ wahyɛ.

¹⁸ Bekye yeɛ mmerɛ ne adwu ɔ, ofikyɛ AWURADE ahyɛ Dawide bɔ kyɛ, ‘Ngɔfa me somvoɛ Dawide so yeɛ ngole me mmenia Yisrael ngofi Filistifoɛ sa nu, ɔne bɛ pɔfoɛ amukoraa bɛ sa nu ɔ.’ ”

¹⁹ Abenɛ ne Benyaminfoɛ koso belili ngitahoɛ. Afei Abenɛ hɔle Hebron, kyɛ nikyee biala bɔ Yisrael ne Benyamin sasofoɛ amukoraa bale bato nu kyɛ bɛkɔyɔ ne, ɔkwaafa ye nwo amaneɛ ɔbɔ Dawide.

²⁰ Abenɛ ne mmenia aburanyɔ wale Dawide berɛ wɔ Hebron, na Dawide tole poen mane Abenɛ ne mmenia bɔ bɛboka ye so ne.

²¹ Na Abenɛ sele Dawide kyɛ, “Nana, me mene, maa ngɔmmoaboa Yisrael amukoraa bɛ noa ma wɔ. Bɛ ne wɔ kɔyɛ apam, na ekoli ebiala so hene kyɛbɔ ɛpena ɔ.” Na Dawide ne Abenɛ lili ngraa maa osili nu hɔle asomdwee nu.

Yoabo ku Abenɛ

²² Wangyɛ biala, Dawide koɛhonɛfoɛ nemɔ ne Yoabo befili apaabɔlɛ nu wale, na bɛfale koɛ nu nzesadeɛ pee bɛwale. Sɔ mmerɛ ne, né Abenɛ ɔnne Dawide berɛ wɔ Hebron, ofikyɛ Dawide ne ye lili ngraa maa ɔhɔle asomdwee nu.

²³ Yoabo ne koɛhonɛfoɛ amukoraa bɔ bɛboka ye so ne, bɛwale ne, ebie bɔle Yoabo amaneɛ kyɛ, “Nɛɛ awa Abenɛ wale Nana Dawide berɛ, na ɔne ye bali ngraa maa wahɔ asomdwee nu.”

²⁴ Yeɛ Yoabo hɔle Nana Dawide berɛ oobisale ye kyɛ, “Nana, nzikyɛ dwirɛ yeɛ ali ye sɔa ye? Abenɛ wale wɔ wa. Nzu ati yeɛ ama ye ate maa wafa ye nwo wali wahɔ ye?

²⁵ Ɛnze kyɛ Nɛɛ awa Abenɛ wale kyɛ ɔbaato wɔ kanda onwu wɔ koɛhonɛ nwo nhyehyɛleɛ, ɔne bɔ ɛyɔ amukoraa ɔ?”

²⁶ Yoabo fili Dawide nwo berɛ fitele ne, otuli ɛbɔfoɛ mɔ maa bɛpole Abenɛ so, na bɛɛfale ye befili Sira abura nwo bɛwale; nakoso né Dawide nze ye nwo huu.

²⁷ Abenɛ sa wale Hebron nen, Yoabo ne ye bɛhɔle kuro berɛ pambim ne ahameɛ, kyɛ ɔne ye bɛkwaatu asure. Na Yoabo wɔle Abenɛ kunu dadeɛ huni ye, ɔnate kyɛ né Abenɛ aha Yoabo aliɛma Asahel mogya wagua.

²⁸ Nziɛ ye bɔ Dawide tele sɔ dwirɛ nen, ɔhane kyɛ, “Nɛɛ awa Abenɛ mogya ne, me ne m’ahennie yɛdi ye nwo be afebɔɔ wɔ AWURADE nyunu.

²⁹ Ye nwo foɛlilɛ kɔbɔ Yoabo ti so, ɔne ɔse abusuafoɛ bɛ ti so. Sona bɔ ye bienzua fiti, anaa kwataniɛ, anaa sayɛɛ, anaa bɔ ɔtɔ ngrandɛ noa, anaa bɔ ye noa aleɛ abɔ ye ne, ebie ngɔpa Yoabo awuro le!”

³⁰ Yoabo ne oliɛma Abisae behuni Abenɛ, ofikyɛ ohuni b’eliɛma Asahel wɔ Gibeon koɛ ne anu.

³¹ Yeɛ Dawide sele Yoabo ne koɛhonɛfoɛ amukoraa bɔ bɛboka ye so ne kyɛ, “Ɛ́mɔsunzua ɛmɔ ndaadeɛ nu, ɛ́mɔfa ɛsɛen tena bɛhera, ná ɛ́mɔsu Abenɛ.” Na Nana Dawide lili efuin alaka ne asi.

³² Besiele Abenɛ wɔ Hebron. Nana Dawide tikyele esuɛ nu wɔ Abenɛ asieleɛ ne aso, na mmenia ne amukoraa besuni.

³³ Nana Dawide suni Abenɛ kyɛ, “Ao, aso ngwaseaa wue yeɛ odi kyɛ Abenɛ wu ɔ?

³⁴ Bangyekye wɔ sa bangua wɔ nwo, yeɛ bammɔ wɔ panwu. Na kyɛbɔ sona si wu wɔ amumuyɛɛfoɛ bɛ sa nu ne, ao, sɔ ala yeɛ awu ɔ.” Na koɛhonɛfoɛ ne amukoraa besuni Abenɛ bieku.

³⁵ Afei mmenia ne amukoraa bɛwale Dawide berɛ bɛɛsrɛle ye kyɛ ɔpena nikyee kãa li, wɔ mmerɛ bɔ né eyia gyi so ɔ. Nakoso Dawide tale ndaen kyɛ, “Sɛ mefa aleɛ anaa nikyee biala meka me noa koraka né eyia atɔ a, Nyameɛ otua me so kerɛ piri paa!”

³⁶ Mmenia ne amu tele Dawide noa dwirɛ nen, ɔyɛle bɛ fɛ, kyɛbɔ nikyee biala bɔ Nana Dawide yɔle ne, bɛ mukoraa bɛ nye gyele ye nwo ne.

³⁷ Yiti sɔ kyẽa ne, mmenia ne amukoraa ne Yisrael amukoraa, benwuni ye kyɛ, Nana Dawide nze Nɛɛ awa Abenɛ wue ne nwo hwee.

³⁸ Na Nana Dawide sele ye mbanyi mɔ kyɛ, “Ɛmɔnze kyɛ sona titire bɔ ɔte safohene ɔ wawu ɛnɛ wɔ Yisrael ɔ?

³⁹ Ɔwɔ nu kyɛ bapopa me ngoo bafa me basi hene de, nakoso ɛnɛ de, Seruya mma nemɔ bama me nwo ahyere me. Sɔ mmenia hemɔ, mebɔ bɛ kyɛnn so a ɔmmɔ. Na sona bɔ ɔyɔ bɔne ne, AWURADE kotua ye kerɛ kyɛbɔ ye bɔne yɔleɛ te ɔ!”