2 Samuel 24 - AHYERƐLƐ KRONGRON

Dawide ka maen ne anu mmenia

¹ AWURADE ahone huli Yisrael so bieku paa, na ɔmane Dawide yɔle nikyee tiale bɛ. Osele ye kyɛ, “Kɔha Yisraelfoɛ ne Yudafoɛ.”

² Yiti Nana Dawide sele Yoabo ne safohene nemɔ kyɛ, “Ɛmɔɔhyini Yisrael mmusua kure amukoraa nu, fite Dan bɔ ɔkwaadwu Beɛ Hyeba, ná ɛ́mɔha mmenia ne ma nwu bɛ somaa.”

³ Yeɛ Yoabo buale Nana Dawide kyɛ, “Nana, w’adaworoma, AWURADE wɔ Nyameɛ ma mmenia ne bɛ somaa ɔyɛ mmɔhoɛ ɛyaa, maa ɛfa wɔ nye nwu ye a, ahaa ye de ye paa nu ɔ. Nakoso nzu ati yeɛ ekuro kyɛ ɛyɔ sɔ nikyee ye ɔ?”

⁴ Nakoso Nana Dawide tuli Yoabo ne safohene nemɔ bɛ dwirɛ deɛ guale. Yiti Yoabo ne safohene nemɔ fili Nana Dawide nyunu berɛ, na besili nu bɛhɔle kyɛ bɛkwaaha Yisraelfoɛ.

⁵ Bɛɛpɛle asue Yɔɔdan, na besikyele wɔ Aroye, wɔ kuro ne ngwaen dɔ wɔ bɔnza ne anu, wɔ Gade ndendeneɛ so, na bɛtoale so bɛhɔle Yasere.

⁶ Afei beedwuli Gileade, yeɛ Kadese bɔ ɔwɔ Hitifoɛ aseɛ so. Befili berɛ bɛhɔle Dan, na bɛtoale so bɛhɔle Sidon.

⁷ Afei beedwuli Tiro anwoserɛ afealeɛ ne anwo berɛ, ɔne Hiwifoɛ ne Kanaanfoɛ nguro ne amukoraa so, na beyiele mmeniahalɛ ne wɔ Beɛ Hyeba bɔ ɔwɔ Yuda ngwaen dɔ ne.

⁸ Bɛfale bosome ngona ne eleburanyɔ yeɛ behyinini aseɛ ne aso amukoraa beyiele ɔ, na besa bɛwale Yerusalem.

⁹ Mmenia bɔ bɛhale bɛ ne, Yoabo fale bɛ somaa nwo amaneɛ bɔle Nana Dawide: Yisrael ɛlɔen bɔ bɛkɔhora bɛkɔhɔ koɛ ne, bɛte apee sɔ alaa ɛyaa mmɔtwɛ, yeɛ Yuda deɛ wora bɛte apee sɔ alaa ɛyaa nnu.

Mmeniahalɛ ne nwo asotwe

¹⁰ Dawide maa bɛhale mmenia ne beyiele nen, nziɛ ye, ye tiboa buale ye fɔ. Na Dawide fa tole AWURADE nyunu kyɛ, “Bɔ mayɔ ye, mayɔ bɔne paa. Nakoso AWURADE, mesrɛ wɔ ala, fa w’akoaa amumuyɛɛ kyɛ ye, ofikyɛ mali ngwaseasɛm paa.”

¹¹ Na ngyerɛmɔ ne bɔ Dawide dwɔsole ne, AWURADE lale ye dwirɛ ali hyirele ngɔmhyɛlɛniɛ Gade, bɔ ɔte Nyameɛ sona bɔ ɔse ase, bɔ ɔka Nyameɛ noa dwirɛ kyire Dawide ne kyɛ,

¹² “Kɔha kyire Dawide kyɛ, AWURADE nwa nyoo: Amaneɛnwunɛ nza yeɛ mefa meto wɔ nyunu ɔ. Nea nu ye nu ko, na ngɔma sɔ dwirɛ ne kɔto wɔ.”

¹³ Yiti Gade wale Dawide berɛ ɔɔbɔle ye amaneɛ. Obisale ye kyɛ, “Beni yeɛ ekuro ɔ? Kyɛ ɛhɔen kɔpe wɔ maen nu afoɛ nzoo, anaakyɛ ɛkɔnwati kofi wɔ pɔfoɛ mɔ bɔ bɛ́fõa wɔ ɔ nyunu bosome nza, anaakyɛ anwonyerɛ tɛɛ kɔte kɔpe wɔ maen nu ɛlɛsa. Yiti dwene ye nwo, ná ye nu ko ma nza mva ye nwo mmuayɛɛ ngɔma bɔ ɔsomane me ne.”

¹⁴ Yeɛ Dawide buale Gade kyɛ, “Yieee, edwirɛ piri paa yeɛ wato me e! Kyɛ kuro sona kɔhwe me so de, ye de ma AWURADE mmom ɔhwe yɛ so, ofikyɛ ye de, ye anwumvoinnwunɛ te piri.”

¹⁵ Yiti AWURADE mane anwonyerɛ tɛɛ te pene Yisrael fite ngyerɛmɔ ne maa oodwuli mmerɛ bɔ wahyɛ ne. Fite Dan bɔ ɔkwaadwu Beɛ Hyeba ne, mmenia apee aburasoo wuwuli.

¹⁶ Na mmerɛ bɔ abɔfo ne tengyɛle ye sa Yerusalem so kyɛ ɔsɛkye kuro ne nen, AWURADE adwene sesane wɔ mmenia hunɛ ne anwo, na osele abɔfo bɔ ogu so oku mmenia ne kyɛ, “Wayɛ yee, yakyi.” Sɔ mmerɛ ne, né AWURADE abɔfo ne adwu Yebusiniɛ Arayuna ye nekaa bɔ bɛboro aburoo ne.

¹⁷ Na Dawide nwuni abɔfo bɔ ogu so oku mmenia nemɔ nen, osele AWURADE kyɛ, “Bɔne ne, me ngome yeɛ mayɔ ɔ, mvomsoɛ ne, me ngome yeɛ mayɔ ɔ. Na mmenia hemɔ bɔ menea bɛ so ye de, nzikyɛ yeɛ bayɔ ɔ? Mesrɛ wɔ ala, ma w’ahonehulɛ ne ɔbra me ne me baba abusuafoɛ so.”

Dawide si afɔleɛ bokyea

¹⁸ Gade wale Dawide berɛ sɔ kyẽa ne oosele ye kyɛ, “Yebusiniɛ Arayuna ye nekaa bɔ bɛboro aburoo ne, fo kɔ berɛ kosi afɔleɛ bokyea ma AWURADE.”

¹⁹ Dawide lili Gade dwirɛ ne aso, na ɔfo hɔle berɛ, kyɛbɔ AWURADE hyɛle ne ala.

²⁰ Arayuna tole ye nye, na onwuni Nana Dawide ne ye mbanyi mɔ kyɛ bɛba ye nwo berɛ. Arayuna ooyiale bɛ, na ɔlale aseɛnwo berɛ fale ye nyunu butuli ase wɔ Nana Dawide nyunu.

²¹ Yeɛ Arayuna bisale kyɛ, “Nana, me mene, nzu ati yeɛ awa w’akoaa berɛ ɔ?” Na Dawide buale kyɛ, “Nekaa bɔ bɛboro aburoo ne, mebaatɔ mefi wɔ berɛ mefa mesi afɔleɛ bokyea mema AWURADE, amaa ɔnate so waye amaneɛ ne wafi maen ne aso.”

²² Yeɛ Arayuna sele Dawide kyɛ, “Nana, me mene, fa, fa aseɛ ne, ná bɔ afɔleɛ biala bɔ ekuro ɔ. Nandwie mɔ bɔ ɛkɔfa kɔbɔ naen yeralɛ afɔleɛ ɛhe, yeɛ ndaboa bɔ bɛboro so aburoo, ɔne nandwie kɔme anu mmakaa bɔ ɛkɔfa kɔsɔ see ɛhe.

²³ Nana, me mene, me Arayuna, mefa sɔ nningyein ne amukoraa mema wɔ.” Yeɛ Arayuna toale so sele kyɛ, “Mesrɛ kyɛ AWURADE wɔ Nyameɛ ole w’afɔleɛ ne ɔto nu.”

²⁴ Nakoso Nana Dawide buale Arayuna kyɛ, “Daabi! Ɛtɔlɛ yeɛ ngɔtɔ ngofi wɔ berɛ ɔ. Ngotua ye kerɛ, kyɛbɔ bɛ nyɔboɛ te ɔ. Ofikyɛ nikyee bɔ mafa ye mbaen ne, mengɔfa ngɔbɔ naen yeralɛ afɔleɛ ngɔma AWURADE me Nyameɛ.” Yiti Dawide tɔle nekaa bɔ bɛboro aburoo ne, ɔne nandwie nemɔ ɛdwetɛ sekel aburannu.

²⁵ Dawide sili afɔleɛ bokyea mane AWURADE wɔ berɛ, na ɔbɔle naen yeralɛ afɔleɛ ne asomdwee afɔleɛ. Yiti AWURADE gyinane ye sufrɛ ne aso nwuni maen ne anwumvoin, na ɔpraprale ɛhawo ne fili Yisrael.