2 Samuel 23 - AHYERƐLƐ KRONGRON

Dawide noa dwirɛ bɔ ɔpɛ ye bo ɔ

¹ Dawide noa dwirɛ bɔ ɔpɛ ye bo ɛhe: Yese awa Dawide, ye noa dwirɛ, sona bɔ Nyameɛ apagya ye ne, ye noa dwirɛ, sona bɔ Yakob Nyameɛ apopa ye ngoo ne, Yisrael edweintolɛniɛ bɔ ye dwein fɛfɛɛfɛ ne, ye noa dwirɛ ɛhe:

² AWURADE Sunzum fa me so dwudwo, ye noa dwirɛ wɔ me temverema so.

³ Yisrael Nyameɛ adwudwo, Yisrael Nyɔbotaen ne sele me kyɛ, ‘Sona bɔ ɔfa pɛpɛɛpɛyɛlɛ da mmenia noa ne, bɔ ɔfa Nyameɛ surolɛ da bɛ noa ne,

⁴ ɔte hyireinn kyɛ eyia bɔ wapukye ngyerɛmɔ ɔ, bɔ munungum nne ye nyunu ɔ, ɔte kyɛ eyia bɔ esue tɔ gua ndire so a, ɔbɔ so ɔ.

⁵ Aso nna sɔ yeɛ m’abusua ɔte wɔ Nyameɛ nyunu anaa? Ofikyɛ ɔne me ayɛ apam afebɔɔ, ɔte apam bɔ wahyehyɛ ye pɛpɛɛpɛ bɔ onni ngasi ɔ. Na m’anyelasoɛ amukoraa, ɔne bɔ mepena amukoraa, aso ɔngɔboka me ma me sa ngɔhã ye anaa?

⁶ Nakoso amumuyɛɛfoɛ de, bɛ mukoraa bɛte kyɛ mmowue bɔ begyi begua ɔ, ofikyɛ ɛngɔhora ngɔfa wɔ sa ngɔsesa.

⁷ Sɛ sona ɔbaahora sɔ nu a, sana otira dadeɛ anaa pealɛɛ dua, na odi kyɛ bɛfa see bɛyera bɛ bɔkɔɔ wɔ nekaa bɔ begua ne ala.

Dawide koɛhonɛfoɛ ahoneserɛfoɛ nemɔ

⁸ Dawide koɛhonɛfoɛ ahoneserɛfoɛ nemɔ, bɛ dumaa ɛhe: Takemoniniɛ Yosebo Basebete bɔ né ɔla koɛhonɛfoɛ ahoneserɛfoɛ nza nemɔ noa ne. Ɔhwene ye pealɛɛ wɔ mmenia ɛyaa mmɔtwɛ so huhuni bɛ wɔ koɛ komapɛ anu.

⁹ Sɛ Yosebo Basebete nne berɛ a, Eleasa bɔ ɔse ole Dodo, bɔ ye koso ɔse ole Ahohi ne, ye yeɛ ɔwɔ berɛ ɔ. Eleasa boka koɛhonɛfoɛ ahoneserɛfoɛ nza ne aso. Mmerɛ bɔ Filistifoɛ boale bɛ noa kyɛ bɛ ne Yisraelfoɛ bɛbaaho ne, né Eleasa boka Dawide so. Yisrael koɛhonɛfoɛ nwatili,

¹⁰ nakoso Eleasa de ogyinane pindinn. Ohuhuni Filistifoɛ alaa mane ye sa nyane, nakoso né ɔngora ye ngrandɛ ne anu yakyi. Na AWURADE maa olili ngonim kandinga sɔ kyẽa ne. Afei Yisrael koɛhonɛfoɛ nemɔ sa wale ye nwo berɛ, nakoso efuin nemɔ yeɛ beepuropurole bɛ nwo nningyein ɔ.

¹¹ Eleasa nne berɛ a, Harariniɛ Agee ɔwa Sama yeɛ ɔwɔ berɛ ɔ. Afei Filistifoɛ boaboale bɛ noa wɔ Lehi, wɔ ngongo boo bie anu. Na Yisrael koɛhonɛfoɛ nwati fili Filistifoɛ nyunu.

¹² Nakoso Sama de, oogyinane eboo ne afia bɔle eboo ne nwo waen, na ohuhuni Filistifoɛ nemɔ. Na AWURADE maa olili ngonim kandinga.

¹³ Na atokoɔ telɛ mmerɛ dwuli ne, koɛhonɛfoɛ atitire aburasa ne, bɛ nu nza hɔle Dawide berɛ wɔ nyɔboɛ bɔ wasi sua wɔ Adulam ne anu. Sɔ mmerɛ ne, né Filistifoɛ fekue bie baakyekye asikyeleɛ wɔ Refaim bɔnza ne anu.

¹⁴ Né Dawide wɔ anwoserɛ afealeɛ ne anu; yeɛ né Filistifoɛ kure ne koso bɛwɔ Betlehem.

¹⁵ Na Dawide le aworadɔlɛ hane kyɛ, “Abura bɔ ɔwɔ Betlehem kuro berɛ pambim ne anwo ne, sɛ ebie sa nu nzue brɛ me maa meno a, ahaa mekuro.”

¹⁶ Yiti koɛhonɛfoɛ ahoneserɛfoɛ nza nemɔ sili bɛ hue bɛhɔle Filistifoɛ asikyeleɛ ne anu. Na abura bɔ ɔwɔ Betlehem kuro berɛ pambim ne anwo ne, bɛsale nu nzue ne bie bɛbrɛle Dawide. Nakoso wanno, na mmom ohwie guale mane AWURADE;

¹⁷ ofikyɛ ɔhane kyɛ, “Daabi, AWURADE pa gua kyɛ ngɔno nzue ne ɔ! Sɛ meno a, mmenia bɔ bɛfale bɛ ngoa bɛtole serewa bɛɛsale nzue ne bɛwale ne, né mano bɛ mogya!” Yiti wanno. Sɔ koɛhonɛfoɛ ahoneserɛfoɛ nza nemɔ yeɛ bɛyɔle sɔ nikyee ne ɔ.

¹⁸ Yoabo aliɛma Abisae bɔ oni ole Seruya ne, né ɔla koɛhonɛfoɛ ahoneserɛfoɛ aburasa nemɔ noa. Ɔhwene ye pealɛɛ ɔne mmenia ɛyaa nza bɛhone. Ohuhuni bɛ, na olele dumaa kyɛ koɛhonɛfoɛ ahoneserɛfoɛ nza nemɔ ala.

¹⁹ Koɛhonɛfoɛ ahoneserɛfoɛ aburasa ne, ye yeɛ olele dumaa piri paa ɔ. Ɔyɛle bɛ so safohene, nakoso wando koɛhonɛfoɛ ahoneserɛfoɛ nza nemɔ.

²⁰ Yehoada awa Benaya bɔ ofi Kabeseel ne, né ɔte koɛhonɛniɛ ahoneserɛniɛ bɔ ye hue yɛ se paa wɔ nningyein pee anu ɔ. Ohuni Moabofoɛ nyɔ bɔ b’ahone yɛ se te kyɛ gyata ɔ. Asa koso, oohuni gyata wɔ abura bie anu ɛlɛho bie bɔ né asukɔtwea tɔ gua ɔ.

²¹ Osa huni Misraimniɛ branoa bie. Né Misraimniɛ ne tira pealɛɛ, nakoso Benaya fale abopura hɔle ye so. Ofotili pealɛɛ ne fili Misraimniɛ ne sa nu, na ɔfale Misraimniɛ ne bɔbɔ ye pealɛɛ ne huni ye.

²² Ahoneserɛ nningyein bɔ Yehoada awa Benaya yɔle ɛne. Na olele dumaa kyɛ koɛhonɛfoɛ ahoneserɛfoɛ nza nemɔ ala.

²³ Olele dumaa paa wɔ koɛhonɛfoɛ ahoneserɛfoɛ aburasa nemɔ anu, nakoso wando koɛhonɛfoɛ ahoneserɛfoɛ nza nemɔ. Na Dawide nwo ɛwaenbɔlɛfoɛ nemɔ, ɔbɔle ye bɛ so panyi.

²⁴ Ɛhemɔ boka koɛhonɛfoɛ ahoneserɛfoɛ aburasa ne aso: Yoabo aliɛma Asahel, Betlehemniɛ Dodo ɔwa Ɛlhanan,

²⁵ Sama bɔ ofi Harode, Elika bɔ ofi Harode,

²⁶ Paltiniɛ Helese, Yira bɔ ye baba Yikese fi Tekoa,

²⁷ Abiesa bɔ ofi Anatote, Husaniɛ Mebunae,

²⁸ Ahohiniɛ Salmon, Maharae bɔ ofi Netofa,

²⁹ Helebo bɔ ye baba Baana fi Netofa, Yitae bɔ ye baba Ribae fi Gibea bɔ ɔwɔ Benyamin aseɛ so,

³⁰ Benaya bɔ ofi Piraton, Hidae bɔ ofi Gaase asue mmaa mmaa ne anwo dɔ ne,

³¹ Abatiniɛ Abi Abon, Asimawete bɔ ofi Bahurim,

³² Eliaba bɔ ofi Saabon, Yasen mma nemɔ:

³³ Harariniɛ Sama ɔwa Yonatan, Harariniɛ Sarare ɔwa Ahiam,

³⁴ Elifɛlɛte bɔ ye baba Ahasebae fi Maaka, Giloniɛ Ahitofel ɔwa Eliam,

³⁵ Hesro bɔ ofi Kamɛl, Abiniɛ Paarae,

³⁶ Yigale bɔ ye baba Natan fi Soba, Gadeniɛ Bani,

³⁷ Amonniɛ Seleke, Naharae bɔ ofi Beerote bɔ né otira Seruya awa Yoabo akodeɛ ɔ,

³⁸ Yitriniɛ Yira, Yitriniɛ Garebo,

³⁹ Hitiniɛ Yuria. Bɛ mukoraa bɛte aburasa ne nzoo.