2 Samuel 21 - AHYERƐLƐ KRONGRON

Gibeonfoɛ tɔ Sɔɔlo boso ama so wereɛ

¹ Mmerɛ bie, ɛhɔen piri bie wale toonn afoɛ nza wɔ Dawide aberɛ so. Dawide fa tole AWURADE nyunu, na AWURADE buale ye kyɛ, “Mogya nwo foɛlilɛ la Sɔɔlo ne ye awuro ama so, ɔnate kyɛ ohuhuni Gibeonfoɛ.”

² Ye sɔ ne ati, Nana Dawide tole ye sa frɛle Gibeonfoɛ ɔne bɛ dwudwole. (Gibeonfoɛ de, né bɛtte Yisraelfoɛ ne bie, na mmom bɛte Amorifoɛ bɛ bosofoɛ. Ɔwɔ nu kyɛ Yisraelfoɛ tale ndaen kyɛ bengohu bɛ, nakoso Sɔɔlo bɔle mmɔden kyɛ okohu bɛ kɔmaa bɛ boso konua, ofikyɛ né Sɔɔlo ɔko ma Yisrael ne Yuda.)

³ Yeɛ Dawide bisale Gibeonfoɛ kyɛ, “Nzu yeɛ ɛmɔkuro kyɛ meyɔ mema ɛmɔ ɔ? Nzikyɛ yeɛ ɛmɔkuro kyɛ mefa mepata ɛmɔ ɔ, bɔ ɔnate so ɛmɔkoyira AWURADE mmenia ɔ?”

⁴ Na Gibeonfoɛ buale ye kyɛ, “Nna ɛdwetɛ anaa sikaa kɔkorɛ nwo dwirɛ yeɛ wawa yɛ ne Sɔɔlo ne ye boso ama afia ɔ, yeɛ atee nne berɛ kyɛ yɛkohu sona biala wɔ Yisrael ɔ.” Yeɛ Dawide bisale kyɛ, “Nzikyɛ yeɛ ɛmɔpena kyɛ meyɔ mema ɛmɔ ɔ?”

⁵ Na bebuale Nana Dawide kyɛ, “Biaa bɔ ohuhuni yɛ, bɔ ahaa ɔpena kyɛ yɛ boso nua, ná ɔye yɛ fi Yisrael aseɛ so nekaa biala ne,

⁶ maa bɛfa ye boso ama mmienzua nzoo bewura yɛ sa, ná yɛɛbɔ bɛ kɔme wɔ AWURADE nyunu, wɔ Sɔɔlo bɔ AWURADE neaneane nu yele ye ne ye kuro Gibea.” Na Nana Dawide hane kyɛ, “Ngɔfa bɛ ngɔma ɛmɔ.”

⁷ Nakoso Sɔɔlo anomaa Mefibosɛte bɔ ɔte Yonatan awa ne de, Nana Dawide maa onyane ye ti didili nu, ɔnate kyɛ né Dawide ne Sɔɔlo awa Yonatan bɛ munyɔ bafa AWURADE bata bɛ nwo ndaen.

⁸ Na Nana Dawide fale ɛhemɔ: Aya awa brasua Risipa ye mma mmienzua nyɔ bɔ ɔne Sɔɔlo bɛwole bɛ ne, bɔ beli Amoni ne Mefibosɛte, yeɛ afei Sɔɔlo awa brasua Merabo ye mma mmienzua nnu bɔ ɔne Meholateniɛ Basilae ɔwa Adriɛl bɛwole bɛ ne,

⁹ na ɔfale bɛ wurale Gibeonfoɛ sa. Na Gibeonfoɛ bɔle mmenia nzoo ne bɛ kɔme wɔ bokaa ne aso wɔ AWURADE nyunu. Mmenia nzoo ne amukoraa, bewu bɛbɔle nu. Ayuo telɛ dwuli ne, bɛhyɛle ye bo kyɛ bɛte ne ala yeɛ behuni bɛ ɔ.

¹⁰ Afei Aya awa brasua Risipa fale ɛsɛen tena sɛle nyɔboɛ so wɔ nekaa bɔ efuin nemɔ gua ne. Na ɔtenane berɛ toonn fite mmerɛ bɔ bɛhyɛle ayuotelɛ bo maa oodwuli kyɛ esue tɔ guale efuin nemɔ so ɔ. Alehyeleɛ nu, wamma nnomaa ate ma banzuso efuin nemɔ. Yeɛ alesaleɛ nu koso, wamma ngaka aboyaa ate ma banni.

¹¹ Aya awa brasua Risipa bɔ né ɔte Sɔɔlo sómaa ne, bɛfale nikyee bɔ wayɔ ne nwo amaneɛ bɛbɔle Dawide.

¹² Na ɛhe mane Dawide hɔle Yabese Gileadefoɛ berɛ oolele Sɔɔlo ne ɔwa Yonatan mmowue ne fili bɛ berɛ. Né Yabese Gileadefoɛ bali moa baawua mmowue ne bafi Bete San dwaa ne aso. Kyẽa bɔ Filistifoɛ huni Sɔɔlo wɔ Gilboa ne, Bete San dwaa ne aso yeɛ bɛfale efuin nemɔ besinzele ɔ.

¹³ Dawide fale Sɔɔlo ne ɔwa Yonatan bɛ mmowue ne fili dɔ wale. Na mmenia bɔ Gibeonfoɛ bɔle bɛ kɔme ne koso, bɛboaboale bɛ mmowue noa.

¹⁴ Na besiele Sɔɔlo ne ɔwa Yonatan bɛ mmowue ne wɔ Sɔɔlo baba Kise asieleɛ nu, wɔ Sela, wɔ Benyamin aseɛ so. Bɛyɔle bɔ Nana Dawide ha hyirele bɛ ne amukoraa. Na ye si ye, Nyameɛ tiele aseɛ ne anwo mbaeɛ bɔ bɛbɔle ne.

Yisraelfoɛ ku Filisti kwabranoa mɔ

¹⁵ Filistifoɛ ne Yisrael sa fale koɛ tetale so. Dawide ne ye koɛhonɛfoɛ nemɔ yeɛ bɛhɔle koɛ ne ɔ. Bɛ ne Filistifoɛ hone, na nziɛ ye, né Dawide afɛ paa.

¹⁶ Na Filisti kwabranoa nemɔ, bɛ bosoniɛ ko bie bɔ oli Yisibi Benobo ne, ɔbɔle mmɔden kyɛ okohu Dawide. Né ye pealɛɛ ne anu nonɛ te kilo nza ne bue, na né ye akodeɛ nemɔ te monɛ.

¹⁷ Nakoso Abisae bɔ oni ole Seruya ne, ɔpepɛ lele Dawide, na ɔhɔle Filistiniɛ ne so ohuni ye. Na ɛhe mane Dawide mmenia nemɔ tale ndaen tole ye so kyɛ, “Yɛkɔ koɛ bieku a, ɛngɔhɔ bie, anyɔ a ekonua Yisrael kanea ne.”

¹⁸ Ɛhe asi ye, bɛ ne Filistifoɛ hone koɛ bieku wɔ Gɔbo. Koɛ ne anu, Husaniɛ Sibekae huni kwabranoa nemɔ bosoniɛ ko bɔ oli Safe.

¹⁹ Besa bɛ ne Filistifoɛ hone koɛ bieku wɔ Gɔbo. Na Betlehemniɛ Yaare Oregim ɔwa Ɛlhanan ohuni Gitiniɛ Goliate. Goliate pealɛɛ ne, ɔte kyɛ mbuna bɔ bɛfa nyamaa bɛsosɔ nu bɛnwo ɛtena ɔ.

²⁰ Besa bɛ ne Filistifoɛ hone koɛ wɔ Gate. Gate berɛ, né Filistiniɛ bienzua tendenn guraen bie wɔ berɛ. Ye sa ne ye gya mmɛseka nemɔ te nzia nzia, na ye mu ka bɔ nu a, ɔte aburanyɔ ne nna. Ye koso ɔte kwabranoa nemɔ bosoniɛ.

²¹ Ɔpɛle Yisrael poa, na Dawide aliɛma Simei ɔwa Yonatan huni ye.

²² Sɔ mmenia nna ne, bɛte Gate kwabranoa nemɔ bɛ bosofoɛ nemɔ bie. Na Dawide ne ye mmenia nemɔ huhuni bɛ.