2 Samuel 20 - AHYERƐLƐ KRONGRON

Hyeba yɛ Dawide lɔen

¹ Biaa bie bɔ bɛfrɛ ye Hyeba, bɔ onni dwirɛ ngɔ kuro so ɔ, né ɔwɔ (Gilgal) berɛ bie. Ɔse ole Benyaminniɛ Bikri. Ohuli totorobɛndo teane nu sele kyɛ, “Yɛ ne Dawide yɛlle hwee yɛnyɔ oo! Yese awa ne, yɛlle agyapadeɛ biala wɔ ye nu oo! Yisraelfoɛ ee, ebiala hɔ ye awuro!”

² Yiti Yisraelfoɛ amukoraa yakyili Dawide si lilɛ beelili Bikri awa Hyeba si. Nakoso Yudafoɛ de, begyinane bɛ hene ne asi fite asue Yɔɔdan noa beedwuli Yerusalem.

³ Nana Dawide wale ye ahemvie berɛ wɔ Yerusalem. Ye sómaa buru bɔ ɔyakyili bɛ berɛ kyɛ bɛnea awuro berɛ ne, ɔmaa bɛɛtenane awuro bie anu. Ɔmaa bɛwɛnene bɛ, na ɔbɔle bɛ akɔhoma. Nakoso wamva ye nwo wanga bɛ. Yiti bɛ ngome bɛtenane dɔ alaa kyɛ akunafoɛ maa oodwuli bɛ wue.

⁴ Afei Nana Dawide sele Amasa kyɛ, “Mema wɔ ɛlɛsa. Fa boaboa Yudafoɛ noa maa bɛbra me wa, na wɔ koso bra bie.”

⁵ Yiti Amasa hɔle kyɛ ɔkwaafrɛfrɛ Yudafoɛ, nakoso ɔmane ɛlɛsa bɔ Dawide ahyɛ ye ne pale ye nwo.

⁶ Yeɛ Dawide sele Abisae kyɛ, “Afei de, nikyee bɔ Bikri awa Hyeba kɔfa kɔyɛ yɛ ne, ɔkɔtra Absalom deɛ ne po. Yiti fa me koɛhonɛfoɛ nemɔ ná po ye so. Anyɔ a, ɔkɔɔfea nguro bɔ bato bɛ nwo fasue ne bie anu, bɔ yɛ sa ngɔhã ye ɔ.”

⁷ Yeɛ Yoabo mmenia nemɔ, Keretifoɛ, Peletifoɛ ne koɛhonɛfoɛ ne amukoraa belili Abisae si, na besili nu befili Yerusalem kyɛ bɛpo Bikri awa Hyeba so.

⁸ Na beedwuli nyɔboɛ piri ne anwo wɔ Gibeon nen, Amasa wale ooyiale bɛ. Né Yoabo wura koɛ ataadeɛ. Na abɔsoɛ bɔ ɔbɔ so ne, né wafa ngrandɛ bɔ owura bɔha nu wawura nu. Mmerɛ bɔ Yoabo ɔ́kɔ ye nyunu moa nen, ngrandɛ ne ye fili bɔha ne anu.

⁹ Na Yoabo sele Amasa kyɛ, “Nniɛma, wɔ nwo te sɛɛ?” Afei Yoabo le ye sa famaa sɔle Amasa kanza nu kyɛ ɔkwaatɔ ye nu yɛ ye atuu.

¹⁰ Nakoso Amasa annwu kyɛ Yoabo tira ngrandɛ ɔ. Yoabo fa wɔle Amasa kunu mane ye nyaa tu guale, na owuli. Wanwɔ ye pɛen nyɔ. Afei Yoabo ne oliɛma Abisae bɛpole Bikri awa Hyeba so.

¹¹ Na Yoabo mmenia nemɔ nu ko oogyinane Amasa fuin ne anwo berɛ teane nu sele kyɛ, “Wɔ biala bɔ ekuro Yoabo dwirɛ, ɔne wɔ biala bɔ ɛwɔ Dawide bue nu ne, di Yoabo si.”

¹² Amasa fuin bɔ mogya abia ye takaa ne, né ɔla atimbire ne anu. Sɔ biaa ne nwuni kyɛ, ebiala dwu berɛ ná onwu Amasa a, né wagyina. Onwuni kyɛ ebiala dwu ye nwo berɛ a ogyina ne ati, ɔmane Amasa so fili atimbire ne anu ɔɔtole buro, na ɔfale ɛtena katale ye so.

¹³ Ɔyele ye fili atimbire ne anu nen, afei ebiala lili Yoabo si maa bɛpole Bikri awa Hyeba so

¹⁴ Hyeba hyinihyini Yisrael mmusua kure amukoraa nu oodwuli Abel Bete Maaka, na Bikrifoɛ amukoraa boale bɛ noa bɛ ne ye hɔle kuro ne anu.

¹⁵ Mmenia bɔ beli Yoabo si ne, bɛhane Bikri bepuane wɔ Abel Bete Maaka. Afei kuro berɛ fasue ne, bɛboaboale nyɔboɛ noa wɔ ye si maa ɔhɔle anwuro. Na bɛhyɛle ye bo kyɛ bedwiri fasue ne begua.

¹⁶ Yeɛ braa nworɛniɛ bie teane nu fili kuro ne anu kyɛ, “Ɛ́mɔtie oo! Ɛ́mɔtie oo! Ɛ́mɔhã behyire Yoabo kyɛ ɔbra wa ma nga dwirɛ ngyire ye.”

¹⁷ Opingyele braa ne anwo berɛ, na braa ne bisale ye kyɛ, “Aso wɔ ole Yoabo anaa?” Na obuale kyɛ, “Yoo, me ɔ.” Yeɛ osele Yoabo kyɛ, “Ma w’afaneɛ ɔha dwirɛ kãa hyire wɔ.” Na obuale kyɛ, “Métie.”

¹⁸ Afei braa ne sele kyɛ, “Daa ne, né bɛtaa bɛka kyɛ, ‘Ɛmɔhɔ Abel bɛɛpena foɛtulɛ, na ɔnate so edwirɛ ne aso kɔpɛ.’

¹⁹ Asomdwee mmenia ne mmenia bɔ bedi nahorɛ wɔ Yisrael ne, bɛ nu ko ole me. Kuro bɔ ye nwo hia paa wɔ Yisrael yeɛ ɛpena kyɛ ɛbɔ ye ɔ. Nzu ati yeɛ ɛpena kyɛ enua AWURADE agyapadeɛ boso ɔ.”

²⁰ Yeɛ Yoabo buale kyɛ, “Ɔngɔwa ye sɔ le, ɔngɔwa ye sɔ le kyɛ ngɔbɔ kuro ne anaakyɛ ngɔma ye boso konua ɔ!

²¹ Edwirɛ ne, nna sɔ yeɛ ɔte ɔ! Bɔ ɔte ole kyɛ, biaa bie bɔ bɛfrɛ ye Hyeba, bɔ ɔse ole Bikri bɔ ofi Efraim mmokaa aseɛ ne aso ne, wayɛ Nana Dawide nwo lɔen. Ɛ́mɔye ye ngome bɛbra, na ngɔyakyi kuro ne tualɛ.” Na braa ne buale kyɛ, “Nzaade yɛkofindi ye ti yɛkɔfa fasue ne aso yɛkɔma wɔ.”

²² Afei braa ne fale ye nworɛ adwene ne ɔɔbɔle kuro berɛ ama mukoraa amaneɛ. Bɛpɛle Bikri awa Hyeba ti, na befindini bɛtole dɔ bɛmane Yoabo. Yiti Yoabo huli totorobɛndo ne, na bɛ mukoraa befili kuro ne anwo bɛhɔle b’awuro. Nakoso Yoabo de, osa hɔle Nana Dawide berɛ wɔ Yerusalem.

²³ Yoabo yeɛ né ɔla Yisrael koɛhonɛfoɛ amukoraa noa ɔ; Yehoada awa Benaya yeɛ né ɔla Keretifoɛ ne Peletifoɛ noa ɔ;

²⁴ Adoram yeɛ né ɔnea mmenia bɔ bɛhyɛ bɛ maa bɛyɔ adwuma ne aso ɔ; Ahilude awa Yehosafate yeɛ né ɔte maen ne anu abakɔsɛm ahyerɛlɛniɛ ɔ.

²⁵ Né Sewa yeɛ ɔte ahemvie berɛ ahyerɛlɛniɛ ɔ; yeɛ né Sadoke ne Abiata bɛte asɔfo.

²⁶ Né Yariniɛ Yira koso ɔte Dawide sɔfo.