2 Samuel 2 - AHYERƐLƐ KRONGRON

Dawide di Yuda so hene

¹ Ɛhe asi ne, Dawide bisale AWURADE kyɛ, “Aso ngɔ Yuda nguro nemɔ ko aso anaa?” Na AWURADE buale ye kyɛ, “Yoo, kɔ.” Yeɛ Dawide sa bisale kyɛ, “Bɛ nu beni yeɛ ngɔ so ɔ?” Na obuale kyɛ, “Hebron.”

² Yiti Dawide ne ɔye nyɔ nemɔ bɛhɔle berɛ. Bɛ ole Ahinoam bɔ ofi Yesreel, yeɛ Abigail bɔ ofi Kamɛl bɔ ɔte Nabal kunaniɛ ne.

³ Dawide fale mmienzua bɔ ɔne bɛ nate ne koso bokale ye nwo so; bɛ nu biala ne ye awuro ama, na bɛɛtenane Hebron nwo nguro nemɔ anu.

⁴ Afei Yuda mmienzua wale bɛɛpopale Dawide ngoo, na bɛfale ye besili Yuda awuro ama so hene wɔ berɛ. Mmerɛ bɔ bɛbɔle Dawide amaneɛ kyɛ Yabese Gileadefoɛ yeɛ besiele Sɔɔlo nen,

⁵ Dawide tuli ɛbɔfoɛ mɔ maa bɛhɔle Yabese Gileadefoɛ berɛ beesele bɛ kyɛ, “AWURADE yira ɛmɔ, kyɛ ɛmɔahyire ɔdɔ bama ɛmɔ mene Sɔɔlo, ná ɛmɔasie ye ɔ.

⁶ Mesrɛ kyɛ, AWURADE ɔye ye ɔdɔ pindinn ne ye nahorɛlilɛ ali ohyire ɛmɔ. Na me koso, bɔ ɛmɔayɔ ye, ngɔfa ye nwo akatuaa ngɔma ɛmɔ.

⁷ Yiti ɛ́mɔgyina pindinn ná ɛ́mɔmia ɛmɔ nye; ofikyɛ ɛmɔ mene Sɔɔlo awu, na Yuda awuro ama bapopa me ngoo bafa me bali bɛ so hene.”

Abenɛ fa Yisbosɛte di Yisrael so hene

⁸ Nakoso Sɔɔlo safohene Abenɛ, bɔ ɔse ole Nɛɛ ne, ɔfale Sɔɔlo awa Yisbosɛte wale Mahanaim.

⁹ Ɔfale ye sili Gileade, Asurifoɛ, Yesreel, Efraim, Benyamin ne Yisrael mukoraa so hene.

¹⁰ Sɔɔlo awa Yisbosɛte hyɛle ye bo lili Yisrael so hene ne, né wali afoɛ aburanna, na olili hene afoɛ nyɔ. Nakoso Yuda awuro ama de, bɛhɔle Dawide bue nu.

¹¹ Na Dawide lili Yuda awuro ama so hene wɔ Hebron afoɛ nzoo ne bue.

Koɛ tɔ Yisrael ne Yuda b’afia

¹² Nɛɛ awa Abenɛ ne Sɔɔlo awa Yisbosɛte ye somvoɛ mɔ befili Mahanaim bɛhɔle Gibeon.

¹³ Yeɛ Seruya awa Yoabo ne Dawide somvoɛ mɔ koso bɛboaboale bɛ noa beeyiale bɛ wɔ Gibeon ɛkwaa ne anwo. Abenɛ ne ye lɔen begyinane ɛkwaa ne bue ko, yeɛ Yoabo ne ye lɔen koso begyinane ɛkwaa ne bue ko.

¹⁴ Na Abenɛ to manene Yoabo kyɛ, “Ma mmerandeɛ nemɔ bedwɔso bɛho wɔ yɛ nyunu wa.” Yeɛ Yoabo buale kyɛ, “Maa bɛfa bɛbɔ so e!”

¹⁵ Yiti bedwɔsole maa bɛhale bɛ. Benyamin abusua ne Sɔɔlo awa Yisbosɛte bɛ koɛhonɛfoɛ ne, bɛte buru ne nyɔ, yeɛ Dawide mmenia mɔ koso bɛ deɛ buru ne nyɔ.

¹⁶ Bɛfa bɛbɔle so, na bɛ nu ko biala sɔle obiɛngo ti mane ye wora ɔsɔle ye deɛ. Na ebiala fale ngrandɛ wɔle obiɛngo mvenu mane ye wora ɔwɔle ye bie. Na bɛ mukoraa bɛte beguale aseɛnwo berɛ bewuwuli. Yiti nekaa bɔ ɛhe sili wɔ Gibeon ne, bɛfrɛ berɛ Helkate Hasurim.

¹⁷ Koɛ ne noa yɛle se sɔ kyẽa ne, na Dawide mmenia nemɔ lili Abenɛ ne Yisrael mmenia ne aso ngonim.

¹⁸ Seruya mma mmienzua nza nemɔ, bɔ bɛ ole Yoabo, Abisae ne Asahel ne, né bɛwɔ berɛ bie. Né Asahel tu amirika te kyɛ ɛwanzane.

¹⁹ Asahel foane Abenɛ bɔ Asahel ammakye wangɔ bɛen anaa famaa ɔ.

²⁰ Yeɛ Abenɛ pɛle ye nye nziɛ sele kyɛ, “Asahel, wɔ ɛne?” Na obuale kyɛ, “Yoo, me ɔ.”

²¹ Na Abenɛ sele ye kyɛ, “Yakyi me foalɛ. Fa wɔ nye kyire famaa so anaa bɛen so, ná kye mmerandeɛ nemɔ nu ko de ye nwo koɛ nu nzesadeɛ ne.” Nakoso Asahel anyakyi ye foalɛ.

²² Yeɛ Abenɛ sele Asahel bieku kyɛ, “Yakyi me foalɛ. Nzu ati yeɛ ɛpena kyɛ meku wɔ ɔ? Sɛ meku wɔ a, aso ngɔhora eliɛma Yoabo nyunu nea?”

²³ Nakoso Asahel anyakyi ye foalɛ. Yiti Abenɛ fale ye pealɛɛ ne bo wɔle Asahel kunu maa ofitele ye si. Na owu tɔle berɛ ala. Na ebiala bɔ oodwuli nekaa bɔ Asahel ho tɔle ne, ogyinane berɛ konn.

²⁴ Nakoso Yoabo ne Abisae hɔle so foane Abenɛ. Na eyia kwaatɔ ne, beedwuli Amma pambaa bɔ ɔwɔ Gia ndendeneɛ so ne aso. Ɔwɔ Gibeon ɛserɛ so atee ne aso.

²⁵ Benyaminfoɛ nemɔ boale bɛ noa beegyinane Abenɛ si bɛyɛle fekue ko, na beegyinane pambaa bie ti afia.

²⁶ Yeɛ Abenɛ teane nu sele Yoabo kyɛ, “Aso odi kyɛ yɛkɔ so yɛfa ngrandɛ yɛdi yɛ nwo awue anaa? Aso ɛnze kyɛ ɔkɔfa ɛpɔen kɔwa ɔ? Ɛkɔmaa okoodwu kyinzu koraka né ama wɔ lɔen ne bayakyi b’eliɛma mɔ foalɛ?”

²⁷ Na Yoabo buale kyɛ, “Meta AWURADE ndaen kyɛ, sɛ anga sɔ dwirɛ ne a, ahaa koɛhonɛfoɛ nemɔ kɔhɔ so kɔfoa b’eliɛma nemɔ toonn kɔma aleɛ kɔhye.”

²⁸ Yiti Yoabo huli totorobɛndo ne, na koɛhonɛfoɛ nemɔ gyinane. Bamvoa Yisrael koɛhonɛfoɛ nemɔ ko, yeɛ bɛ ne bɛ ango ko.

²⁹ Abenɛ ne ye lɔen ne natele sɔ kɔngɔen ne toonn wɔ Yɔɔdan bɔnza ne anu. Bɛpɛle asue Yɔɔdan, na bɛfale Bitron amukoraa kɔpem kyɛ beedwuli Mahanaim ɔ.

³⁰ Yoabo yakyili Abenɛ foalɛ sale ye si. Na ɔmane ye koɛhonɛfoɛ ne amukoraa bɛboale bɛ noa nen, onwuni kyɛ Dawide koɛhonɛfoɛ nemɔ, asora Asahel wue ne, bɛ nu buru ne ngona bɛnne berɛ bie.

³¹ Nakoso Benyaminfoɛ bɔ yeɛ bɛte Abenɛ koɛhonɛfoɛ ne de, né Dawide koɛhonɛfoɛ nemɔ bahu ɛyaa nza ne aburasia.

³² Na Yoabo ne koɛhonɛfoɛ nemɔ bɛɛfale Asahel besiele ye wɔ ye baba asieleɛ ne anu wɔ Betlehem. Bɛnatele kɔngɔen ne toonn, na beedwuli Hebron ne, né aleɛ ahye.