2 Samuel 19 - AHYERƐLƐ KRONGRON

Yoabo twi Dawide nyunu

¹ Bɛɛbɔle Yoabo amaneɛ kyɛ, “Nana Dawide ósu Absalom, na ódi ye wue nwo aworabɔlɛ.”

² Yiti sɔ kyẽa ne, koɛhonɛfoɛ ne amukoraa bɛ ngonim bɔ bali ne, ɔkakyili aworabɔlɛ, ofikyɛ sɔ kyẽa ne, koɛhonɛfoɛ nemɔ tele kyɛ Dawide ódi ɔwa ne wue nwo aworabɔlɛ.

³ Na sɔ kyẽa ne, koɛhonɛfoɛ nemɔ yɛle kudɛɛ bɛwale kuro ne anu, kyɛbɔ koɛhonɛfoɛ bɛnwati befi koɛ nu a, bɛfa ɛfɛrelɛ bewuawua bɛ nwo bɛba ne ala.

⁴ Nana Dawide katale ye nyunu, na ɔteane nu suni kyɛ, “Yieee, mma Absalom, Ao Absalom, mma ye, mma ye!”

⁵ Yeɛ Yoabo wale Nana Dawide berɛ wɔ sua nu, na osele kyɛ, “Wɔ somvoɛ mɔ bɔ ɛnɛ bale wɔ ne wɔ mma mmienzua, wɔ mma mmrasua, ɛye mɔ ne wɔ sómaa mɔ ngoa ne, agua bɛ mukoraa bɛ nyunu ase ɛnɛ.

⁶ Ofikyɛ ahyire kyɛ ekuro wɔ pɔfoɛ mɔ dwirɛ, na bɛ bɔ bekuro wɔ dwirɛ ne de, ɛpɔ bɛ. Ɛnɛ amaa wala ali pefee kyɛ, safohene mɔ ne somvoɛ mɔ de, bɛ nwo nhia wɔ. Manwu ye kyɛ, ɛnɛ sɛ Absalom tɛ te ase, bɔ yɛ mukoraa yawuwu a, ahaa ekuro.

⁷ Yiti dwɔso kodwudwo kyire wɔ somvoɛ nemɔ ma b’ahone tɔ nzue nu. Na meta AWURADE ndaen kyɛ, sɛ angɔ a, sona ko po ngɔha wɔ nwo wa ɛnɛ kɔngɔen ye. Na ɛhe kɔyɛ edwirɛ piri paa kɔtra edwirɛ biala bɔ wato wɔ ɔ, fite wɔ mmerandeɛ nu bɔ ɔbaadwu ɛnɛ ɔ.”

⁸ Yiti Nana Dawide dwɔsole ɔɔtenane ase wɔ kuro berɛ pambim ne anwo. Yeɛ bɛɛbɔle mmenia ne amukoraa amaneɛ kyɛ, “Ɛ́mɔtie, Nana aatena kuro wa pambim ne anwo.” Na mmenia ne amukoraa bɛhɔle Nana Dawide berɛ. Sɔ mmerɛ ne, né Yisraelfoɛ amukoraa banwati bahɔ b’awuro.

Dawide sa ba Yerusalem

⁹ Yisrael mmusua kure nemɔ anu, né mmenia ne amukoraa bésu ye nwo aporowaa kyɛ, “Nana Dawide lele yɛ fili yɛ pɔfoɛ mɔ sa nu, yeɛ ɔyele yɛ fili Filistifoɛ sa nu. Nakoso kekesaala ye de, ɔnate Absalom ti wanwati wafi maen ye anu.

¹⁰ Absalom bɔ yɛpopale ye ngoo yɛfale ye yɛsili yɛ so hene ne, waho watɔ. Na afei, nzikyɛ yeɛ ɛmɔnwondɛ, bɔ yiti yeɛ ɛmɔnza ngɔmva Nana Dawide bɛmma ɔ?”

¹¹ Yiti Nana Dawide fale ngraa he somane maa beesele asɔfo Sadoke ne Abiata kyɛ, “Ɛ́mɔfa bɛ́to Yuda mbanyi nyunu kyɛ, ‘Nzu ati yeɛ ɛmɔtena berɛ ma ebiemɔ bedi ɛmɔ nyunu moa bɛkɔɔfa Nana Dawide bɛba ye awuro ɔ? Ofikyɛ edwirɛ bɔ bɛ́keka ye wɔ Yisrael amukoraa ne, mate.

¹² Me deɛ ole ɛmɔ, ɛmɔte me nnehyeɛ kaenn. Nzu ati yeɛ ɛmɔtena berɛ ma ebiemɔ di ɛmɔ nyunu moa bɛkɔfa Nana Dawide bɛba ɔ?’

¹³ Ɛ́mɔsa bɛha behyire Amasa koso kyɛ, ‘Ɛte me dehyeɛ kaenn. Ofi ɛnɛ bɔ ɔkɔ ɔ, sɛ mamva wɔ manzi Yoabo gya nu mammɔ wɔ safohene wɔ me koɛhonɛfoɛ nemɔ aso a, Nyameɛ tua me kerɛ piri paa.’ ”

¹⁴ Dawide noa dwirɛ ne hane mmenia bɔ bɛwɔ Yuda amukoraa bɔle nu maa bɛyɛle ko, na bɛmaa beesele Nana Dawide kyɛ, “Sa bra, ɛne wɔ somvoɛ amukoraa.”

¹⁵ Yiti Nana Dawide sili nu kyɛ osa kɔ. Na oodwuli asue Yɔɔdan noa ne, Yuda abusua kure wale Gilgal kyɛ bɛbaayia ye bɛfa ye bɛpɛ Yɔɔdan.

¹⁶ Na Benyaminniɛ Gera ɔwa Simei bɔ ofi Bahurim ne, ɔyɛle ndɛndɛ ɔne Yudafoɛ bɛhɔle beeyiale Nana Dawide.

¹⁷ Benyamin abusua kure ne, né nu mmenia apee ko boka Simei so. Siba bɔ ɔte Sɔɔlo abusua nu somvoɛ ne, ye koso ɔboka so, ɔne ye mma mmienzua buru ne nnu ne ye somvoɛ aburanyɔ. Na bɛhane bɛ nwo bɛhɔle asue Yɔɔdan noa dɔ kyɛ bɛkwaayia Nana Dawide.

Dawide fa Simei bɔne kyɛ ye

¹⁸ Sɔ mmerɛ ne ala, mmenia fale Nana Dawide awuro ama beguale ɛlɛen nu kyɛ bɛfa bɛ bɛpɛ asue ne, ná besa bɛyɔ nikyee biala bɔ okuro ɔ bɛma ye. Na mmerɛ bɔ Nana Dawide yɛle kyɛ ɔpɛ asue Yɔɔdan nen, Gera awa Simei oobutuli ye nyunu berɛ,

¹⁹ na osele Nana Dawide kyɛ, “Me mene, mesrɛ wɔ ala, nnɛnea me bɔne bɔ mayɔ ɔ. Nana, me mene, mvomsoɛ bɔ w’akoaa nyɔle ye kyẽa bɔ efili Yerusalem ne, mesrɛ wɔ, bu wɔ nye gua so. Nana, nnɛfa sie wɔ ti anu.

²⁰ W’akoaa, mese kyɛ mayɔ bɔne. Yiti Nana, me mene, mesrɛ wɔ, Yosef awuro ama amukoraa, me yeɛ mali moa mawa kyɛ mebaayia wɔ ɔ.”

²¹ Na Seruya awa Abisae buale kyɛ, “Aso ɔnzɛ kyɛ beku Simei anaa? Ofikyɛ ɔborole sona bɔ AWURADE apopa ye ngoo ne amoen.”

²² Nakoso Dawide buale kyɛ, “Ɛmɔ Seruya mma ye mɔ, me dwirɛ fa ɛmɔ nwo nzu, bɔ ɛnɛ ɛmɔayɛ me pɔfoɛ ye? Aso ɛnɛ ɔsɛ kyɛ beku sona wɔ Yisrael anaa? Aso menze kyɛ ɛnɛ me yeɛ nde Yisrael so hene ɔ.”

²³ Na Nana Dawide tale ndaen foale so sele Simei kyɛ, “Ebiala ngohũ wɔ.”

Dawide nwu Mefibosɛte anwumvoin bieku

²⁴ Sɔɔlo anomaa Mefibosɛte hɔle ooyiale Nana Dawide. Né wayakyi ye gya boen maa wafu, wama ye kanza afu funyaenn, na ye ndaadeɛ koso né ɔppole, fite kyẽa bɔ Nana Dawide fili Yerusalem maa oodwuli kyẽa bɔ osa wale asomdwee nu ɔ.

²⁵ Mmerɛ bɔ ofili Yerusalem ooyiale Nana Dawide nen, Nana Dawide bisale ye kyɛ, “Mefibosɛte, nzu ati yeɛ ɛne me angɔ ɔ.”

²⁶ Na obuale kyɛ, “O Nana, me mene, me somvoɛ ne lakalakale me. Nana, wɔ somvoɛ, nga ngyirele ye kyɛ osiesie afunum ma ndena so ma me ne wɔ yɛhɔ, ofikyɛ wɔ somvoɛ, nde bubuaniɛ.

²⁷ Nana, me mene, waatoatoa me wahyire wɔ. Nakoso Nana, me mene, wɔ de ɛte kyɛ Nyameɛ abɔfo, yiti bɔ ekuro kyɛ ɛyɔ biala, yɔ.

²⁸ Nana, me mene, ahaa me baba abusuafoɛ mukoraa, ehunɛ yeɛ yɛfata kyɛ eku yɛ ɔ. Nakoso amaa me, wɔ somvoɛ, maboka mmenia bɔ bedidi wɔ poen so ne aso. Nana, nzikyɛ bieku yeɛ ngɔhora ngobisa ngofi wɔ berɛ ɔ?”

²⁹ Na Nana Dawide sele ye kyɛ, “Onhia kyɛ ɛkɔha wɔ nwo kodwudwo ko. Mahã kyɛ, ɛne Siba bɛkɔhyɛ aseɛ ne.”

³⁰ Yeɛ Mefibosɛte sele Nana Dawide kyɛ, “Nana, me mene, awuro bɔ asa awa asomdwee nu ne yeɛ ohia ɔ, yiti maa ɔfa ye mukoraa.”

Dawide yɛ Basilae paa

³¹ Gileadeniɛ Basilae fili Rogelim wale, na ɔne Nana Dawide bɛhɔle asue Yɔɔdan noa dɔ, kyɛ ɔkwaasoma ye dwu asue ne asi dɔ.

³² Né Basilae anyi paa. Né wali afoɛ aburawɔtwɛ. Mmerɛ bɔ Nana Dawide wɔ Mahanaim nen, né Basilae yeɛ ɔma ye sa kɔ ye noa ɔ, ofikyɛ né ye sa nu le bie paa.

³³ Nana Dawide sele ye kyɛ, “Maa yɛpɛ asue ne yɛhɔ Yerusalem kɔtena nekaa bɔ nde ne, na ngɔnea wɔ.”

³⁴ Nakoso Basilae buale Nana Dawide kyɛ, “Waha m’afoɛ nyɛɛ wɔ aseɛ ye aso, bɔ me ne Nana yɛkɔ Yerusalem ɔ?

³⁵ Kekesaala ye, mali afoɛ aburawɔtwɛ. Nikyee bɔ ɔyɛ nyemene ne, ɔne bɔ ɔnyɛ nyemene ne, mennwu nu nzonzoleɛ ko. Aleɛ ne anonneɛ mɔ nyɛ me fɛ ko. Yeɛ sɛ mmenia bɛto dwein a, mende ye yé. Yiti Nana, me mene, nzu ati yeɛ ɔsɛ kyɛ wɔ somvoɛ meyɛ wɔ so tɔsom ɔ?

³⁶ Nana, wɔ somvoɛ, me ne wɔ yɛkɔpɛ asue ne yɛkɔhɔ ye si dɔ kãa. Nana, nzu ati yeɛ ɛbɔ me aba so sɔa ɔ?

³⁷ Mesrɛ wɔ ala, wɔ somvoɛ, maa nza ngɔ ngonwu wɔ me kuro, wɔ nekaa bɔ me ni ne me se asieleɛ wɔ ɔ. Nakoso Nana, me mene, wɔ somvoɛ Kimham ɛhe. Maa ɔne wɔ bɛpɛ asue ne bɛhɔ, na paa biala bɔ ekuro ne, fa yɛ ye.”

³⁸ Yeɛ Nana Dawide buale kyɛ, “Me ne Kimham yɛkɔpɛ asue ne yɛkɔhɔ, na paa biala bɔ ekuro kyɛ mefa meyɛ ye ne, ngɔfa ngɔyɛ ye; yeɛ nikyee biala bɔ ekobisa me ne koso, ngɔyɔ ngɔma wɔ.”

³⁹ Afei koɛhonɛfoɛ ne amukoraa bɛ ne Nana Dawide bɛpɛle asue ne. Na anzana Nana Dawide baapɛ asue ne nen, ɔtɔle Basilae nu yɛle ye atuu, oyirale ye, na Basilae sa hɔle ye kuro.

⁴⁰ Nana Dawide toale so hɔle Gilgal, na Kimham ne ye hɔle. Na Yuda koɛhonɛfoɛ amukoraa, bɛ ne Yisrael koɛhonɛfoɛ ne bue bɛfale Nana Dawide bɛhɔle.

⁴¹ Afei Yisrael koɛhonɛfoɛ amukoraa wale Nana Dawide berɛ beebisale ye kyɛ, “Nana Dawide, nzu ati yeɛ y’eliɛma mɔ bɔ befi Yuda ne, bale wɔ bafi yɛ sa nu, bɔ bafa wɔ ne w’awuro ama, ɔne bɛ bɔ bɛboka wɔ so amukoraa bapɛ asue Yɔɔdan ɔ?”

⁴² Yeɛ Yuda koɛhonɛfoɛ amukoraa buale Yisrael koɛhonɛfoɛ nemɔ kyɛ, “Nana Dawide te yɛ nwoniɛ kaenn ti ɔ. Nzu ati yeɛ ɛmɔafɛ edwirɛ he anwo yaa ɔ? Aleɛ bɔ yali ne, Nana yeɛ ɔfa mane yɛ hɔ ɔ, anaakyɛ wahyɛ yɛ nikyee bie hɔ ɔ?”

⁴³ Nakoso Yisrael koɛhonɛfoɛ nemɔ buale Yuda koɛhonɛfoɛ kyɛ, “Yɛ bue deɛ bɔ ɔwɔ ɛhene ne anu ne, ɔtra ɛmɔ bue deɛ sɔ alaa buru. Yɛ bue deɛ bɔ ɔwɔ Dawide nu ne, ɔtra ɛmɔ bue deɛ. Nzu ati yeɛ ɛmɔmmu yɛ sɔa ye? Aso nna yɛ yeɛ yɛlili moa yɛhane kyɛ yɛkwaafa yɛ hene yɛsa yɛba ɔ?” Nakoso Yudafoɛ mane bɛ noa yɛle se trale Yisraelfoɛ.