2 Samuel 16 - AHYERƐLƐ KRONGRON

Dawide ne Siba

¹ Dawide trale bokaa ne ti afia hɔle ye nyunu kãa ne, mvum nu, Mefibosɛte somvoɛ Siba wale ooyiale ye. Ɔfale afunum nyɔ wale. Né bɛso paanoo ɛyaa nyɔ, bobe bɔ babobɔ ye kunguma ɛyaa ko, borɔdoma ɛyaa ko, yeɛ bobe nzaa kɔndoa ko.

² Yeɛ Nana Dawide bisale Siba kyɛ, “Sɔ nningyein hemɔ, ɛfa bayɔ nzu?” Na Siba buale kyɛ, “Afunum nemɔ, méfa mebrɛ Nana awuro ama maa bɛtena so. Paanoo ne ɔne borɔdoma ne, bɛte mmerandeɛ nemɔ deɛ bɔ bekoli ɔ, yeɛ nzaa ne koso ɔte bɛ bɔ bɛ nwo kɔyɛ bɛ hodwoo wɔ ɛserɛ so ne deɛ.”

³ Na Nana Dawide bisale ye kyɛ, “Wɔ mene awa bienzua ne, ɔwɔ ni?” Yeɛ Siba buale Nana Dawide kyɛ, “Ɔwɔ Yerusalem, na ɔnwa: ‘Ɛnɛ kyẽa ye, Yisrael awuro ama kosa kɔfa me nana ahennie ne kɔma me.’ ”

⁴ Yeɛ Nana Dawide sele Siba kyɛ, “Ofi ɛnɛ bɔ ɔkɔ ɔ, Mefibosɛte nikyee biala bɔ ole ye ne, wayɛ wɔ deɛ.” Na Siba sele kyɛ, “Nana, me mene, mekoto wɔ. W’adaworoma, do me.”

Simei boro Dawide amoen

⁵ Mmerɛ bɔ Nana Dawide oodwuli Bahurim nen, mvum nu, biaa bie bɔ oli Simei bɔ ofi Sɔɔlo abusua nu wale berɛ. Ye baba ole Gera. Ɔ́ba ne, né ɔ́boro amoen.

⁶ Simei borole Nana Dawide ne ye somvoɛ amukoraa nyɔboɛ. Né Dawide mmenia ne amu ne koɛhonɛfoɛ ne amu begua ye bɛen ne ye famaa.

⁷ Amoen bɔ Simei borole ne ɛhe: “Fi wa kɔ! Fi wa kɔ! Wudiniɛ! Ɛte busueniɛ!

⁸ Sɔɔlo bɔ atu ye ali ye bia ne, ye abusuafoɛ mogya mukoraa bɔ aha agua ne, AWURADE atua wɔ so kerɛ! AWURADE ale ahennie ne wafi wɔ sa nu wama ɛwa Absalom. Abue yeɛ wabu wɔ ɔ, ofikyɛ ɛte kodiawuniɛ!”

⁹ Na Seruya awa Abisae sele Nana Dawide kyɛ, “Me mene, ɔwale ye sɛ bɔ sɔ kyea fuin he ɔboro wɔ amoen ɔ? Nana, maa ngɔnde ye ti mvi so.”

¹⁰ Nakoso Nana Dawide buale ye kyɛ, “Ɛmɔ Seruya mma ye mɔ, me dwirɛ fa ɛmɔ nwo nzu? Amoen bɔ ɔ́boro ye, sɛ AWURADE yeɛ waha wahyire ye kyɛ, ‘Boro Dawide amoen,’ a, nwa yeɛ ɔkɔhora kobisa ye kyɛ, ‘Nzu ati yeɛ ɛ́yɔ sɔ ɔ?’ ”

¹¹ Na Dawide sele Abisae ne somvoɛ ne amu kyɛ, “Sɛ me kunu ba po ɔpena me ku me a; nzaade bɔ Benyaminniɛ he ɔ́yɔ ye, ɔnyɛ nwanwa! Ɛ́mɔyakyi ye ma ɔboro amoen ne. Ebiaa AWURADE yeɛ waha wahyire ye kyɛ ɔyɔ sɔ ɔ.

¹² Ebiaa AWURADE kɔnea m’amaneɛnwunɛ ye, na ɔkɔkakyi amoen bɔ baboro me ɛnɛ ye maa ngonya saleɛ.”

¹³ Afei Dawide ne ye mmenia nemɔ toale so bɛfale atee ne aso, yeɛ Simei koso fale bokaa ne ngyɛnu dɔ lili bɛ mvanvando. Ɔ́kɔ ne, né ogu so ɔboro Dawide amoen, ɔboro ye nyɔboɛ, ná osa tu mvuture gua ye so.

¹⁴ Nana Dawide ne ye mmenia ne amukoraa beedwuli asue Yɔɔdan noa nen, né bafɛ, na olele ye nwome wɔ berɛ.

Ahitofel tu Absalom foɛ tɛɛ

¹⁵ Absalom ne Yisrael mmienzua mukoraa bɛwale Yerusalem, bɔ né Ahitofel boka ye so ɔ.

¹⁶ Yeɛ Akiniɛ Husae bɔ ɔte Dawide adamvo ne, ɔwale Absalom berɛ, na obisale Absalom ahye kyɛ, “Nana, wɔ ngoa so oo! Nana, wɔ ngoa so oo!”

¹⁷ Na Absalom bisale ye kyɛ, “Eh, wɔ nahorɛ bɔ édi ma wɔ damvo ɛhe? Nzu ati yeɛ ɛne wɔ damvo bangɔ ɔ”

¹⁸ Na Husae buale Absalom kyɛ, “Daabi oo, sona bɔ AWURADE ne mmenia bɔ bayia wa ye, ɔne Yisraelfoɛ amukoraa baneanea nu baye ye ne, ye yeɛ ngyi ye si ɔ, na ye bue nu yeɛ nwɔ ɔ.

¹⁹ Asa koso, sɛ manzo Dawide awa ne a, né nwa yeɛ ngɔnzo ye ɔ? Na kyɛbɔ nzole wɔ baba ne, sɔ ala yeɛ ngɔso wɔ ɔ.”

²⁰ Yeɛ Absalom sele Ahitofel kyɛ, “Ɛ́mɔhyire ɛmɔ adwene; nzu yeɛ ɔsɛ kyɛ yɛyɔ ɔ?”

²¹ Na Ahitofel buale Absalom kyɛ, “Wɔ baba sómaa mɔ bɔ wayakyi bɛ berɛ kyɛ bɛnea awuro berɛ ne, ɛne bɛ bɛɛla. Na sɛ Yisraelfoɛ amukoraa bɛte kyɛ agua ɛse anyunu ase pɔtɔɔ a, ɔkɔhyɛ mmenia bɔ begyi wɔ si ne nguraen.”

²² Yiti besili ɛtena sua wɔ sua ne aso anwuro nekaa bɔ basamo ne, na Absalom ne ɔse sómaa nemɔ bɛɛlale bɔ Yisraelfoɛ amukoraa bɛ nye tua ɔ.

²³ Sɔ mmerɛ ne, né Ahitofel foɛ biala bɔ otu ne, né ɛnwa nzɛ ɔte Nyameɛ noa dwirɛ. Yiti né Dawide ne Absalom bɛndoto Ahitofel foɛtulɛ biala ase koraa.