2 Samuel 14 - AHYERƐLƐ KRONGRON

Absalom sa ba Yerusalem

¹ Seruya awa Yoabo nwuni kyɛ Absalom nwo adwenedwene atɔ Nana Dawide so.

² Yiti Yoabo somane maa bɛhɔle Tekoa bɛɛfale braa nworɛniɛ bie befili dɔ bɛwale. Na osele braa ne kyɛ, “Yɛ wɔ nwo kyɛ ɛwɔ ɛsɛen nu, kera ɛsɛen tena, nnɛpopa. Yɛ wɔ nwo kyɛ brasua bɔ ye nwoniɛ awu maa watena ɛsɛen nu wahyɛ ɔ.

³ Afei kɔ Nana Dawide berɛ kɔha edwirɛ bɔ mebaaha mekyire wɔ ne kyire ye.” Na Yoabo fale edwirɛ ne tuale braa ne noa.

⁴ Braa bɔ ofi Tekoa ne wale Nana Dawide berɛ nen, ɔbɔle ye ti ase kotole ye, na osele kyɛ, “Nana, mesrɛ wɔ, boka me!”

⁵ Yeɛ Nana Dawide bisale ye kyɛ, “Nzikyɛ yeɛ ehia ɔ?” Obuale kyɛ, “Nana, nde kunaniɛ, me hu awu.

⁶ W’afaneɛ, né nne mmaa mmienzua nyɔ. Bɛɛhone ngondii wɔ eburo. Né ebiala nne berɛ bɔ ɔkɔpata bɛ ɔ, na ko bɔle obiɛngo maa owuli.

⁷ Na abusua ne amukoraa badwɔso w’afaneɛ so kyɛ, ‘Ko bɔ wabɔ oliɛma wahũ ye ne, ye ye bra ma yɛhu ye bie yɛtua kerɛ, ɔmva ye nwo kyɛ koliagyaa ne yeɛ yɛku ye yɛfi berɛ ɔ.’ Nana, bɛpena kyɛ benua me gyetia ko bɔ waha ne, na ɛhe kɔma me hu dumaa anaa ye boso konunu kofi aseɛ ye aso.”

⁸ Na Nana Dawide sele braa ne kyɛ, “Wɔ de, kɔ w’awuro, na ngɔnea ngosiesie edwirɛ ne ngɔma wɔ.”

⁹ Yeɛ braa bɔ ofi Tekoa ne sele Nana Dawide kyɛ, “Nana, me mene, mede meto nu kyɛ, me ne me baba abusuafoɛ yeɛ yɛdi edwirɛ he anwo fɔ ɔ. Nakoso Nana, ɛne wɔ bia de, ɛmɔdi ye nwo be.”

¹⁰ Yeɛ Nana Dawide buale kyɛ, “Sɛ ebie ha wɔ a, fa ye brɛ me, na ɔngɔha wɔ ko.”

¹¹ Na braa ne sele kyɛ, “Nana, fa AWURADE wɔ Nyameɛ ta ndaen, bɔ ɔnate so wereɛtɔlɛniɛ ne ɔngɔhã mogya ko ngogua ɔ, amaa ɔnate so mma ne anya ye ti wadidi nu.” Na Dawide sele kyɛ, “Kyɛ AWURADE te ase ye, ɛwa ne, ye ti nwiaa ko po ngotu ngɔtɔ ase.”

¹² Afei braa ne sele kyɛ, “Nana, me mene, mesrɛ wɔ ala, ma w’afaneɛ ɔha edwirɛ kãa hyire wɔ.” Na Dawide sele kyɛ, “Kɔ so.”

¹³ Yeɛ braa ne sele kyɛ, “Né nzaade, nzu ati yeɛ abɔ Nyameɛ mmenia nwo porɛ sɔa ɔ? Nana, wɔ bɔbɔ wɔ noa dwirɛ abua wɔ fɔ, ofikyɛ ɛwa bɔ afoa ye afi wɔ nwo ne, ɛmbena kyɛ esa fa ye ba awuro.

¹⁴ Ewue de, yɛ mukoraa yɛkowu. Yɛte kyɛ nzue bɔ bahwie bagua ase, bɔ bɛsesa a ɔnyɛ yé ɔ. Nyameɛ de, ɔnga mogya ngua, na mmom ebiala bɔ ɔne ye b’afia atete ne, ole nhyehyɛleɛ bɔ ɔnate so osa twe ye bata ye nwo ɔ.

¹⁵ Yiti Nana, me mene, mawa kyɛ mebaaha sɔ dwirɛ he mekyire wɔ, ofikyɛ mmenia amaa masuro. W’afaneɛ, nzusuli kyɛ, ‘Ngɔɔfa edwirɛ ne ngɔto Nana nyunu; ebiaa Nana kɔyɔ ye afaneɛ abisadeɛ kɔma ye.

¹⁶ Mese kyɛ Nana kotie me, na sona bɔ ɔpena kyɛ oku me ne mma, ná ɔye yɛ fi Nyameɛ agyapadeɛ nu ne, Nana kole ye afaneɛ kofi ye sa nu.’

¹⁷ Nana, me mene, w’afaneɛ susuli kyɛ, ‘Wɔ noa dwirɛ kɔma me soa nu kɔtɔ me.’ Ofikyɛ Nana, me mene, ɛte kyɛ Nyameɛ abɔfo, na ɛse paa ne bɔne nu nzonzoleɛ. AWURADE wɔ Nyameɛ ne, ogyina wɔ si.”

¹⁸ Na Nana Dawide buale braa ne kyɛ, “Edwirɛ bɔ mebaabisa wɔ ye, ka nu nahorɛ.” Na braa ne sele kyɛ, “Nana, me mene, bisa.”

¹⁹ Yeɛ Nana Dawide bisale ye kyɛ, “Sɔ dwirɛ he, aso nna Yoabo yeɛ wapesa wawura wɔ ɔ?” Na braa ne buale kyɛ, “Nana, me mene, aha ato me deɛ ne aso. Bɔ aha ne te nahorɛ turoloo. Amba, wɔ somvoɛ Yoabo yeɛ ohyirele me kyɛ nyɔ sɔ ɔ. Ye yeɛ ɔfale edwirɛ he amukoraa tuale w’afaneɛ noa ɔ.

²⁰ Wɔ somvoɛ Yoabo yɔle sɔ, kyɛbɔ engonwu edwirɛ ne asi ɔ. Nakoso me mene, ɛse nworɛ kyɛ Nyameɛ abɔfo ala, bɔ ɔmaa enwu aseɛ ye aso dwirɛ amukoraa ɔ.”

²¹ Afei Nana Dawide sele Yoabo kyɛ, “Mate, mepene wɔ nzusuleɛ ne aso. Kɔfa aberandeɛ Absalom maa osa bra.”

²² Yoabo tole ye nwo yele aseɛnwo berɛ, ɔfale ye nyunu butuli berɛ wɔ Dawide nyunu, na ɔsrɛle Nyameɛ saleɛ mane Nana Dawide. Osele kyɛ, “Nana, me mene, ɛnɛ kyẽa ye, wɔ somvoɛ, manwu ye kyɛ ale me ato nu, ofikyɛ Nana, ayɔ wɔ somvoɛ abisadeɛ ama ye.”

²³ Yiti Yoabo sili nu hɔle Gesure ɔɔfale Absalom wale Yerusalem.

²⁴ Nakoso Nana Dawide sele kyɛ, “Maa ɔɔtena ye bɔbɔ ye awuro. Membena kyɛ menwu ye nyunu.” Yiti Absalom ɔɔtenane ye bɔbɔ ye awuro, na wambe Nana Dawide nyunu.

Dawide fa Absalom nwo kyɛ ye

²⁵ Yisrael amukoraa, né ebiala nne berɛ bɔ bɛkamvo ye anwonyemene te kyɛ Absalom ɔ. Fite ye gya bo bɔ ɔkwaadwu ye ti so, ye nekaa biala nne berɛ bɔ ɛto ye nwo a ɔyɛ yé ɔ.

²⁶ Sɛ né ɔtete ye ti a, (afoɛnoa biala, sɛ ye ti fu gua ye nwo a, né ɔtete) ɔkari enwiaa ne, na nu nonɛ te kilo nyɔ ne bue, kyɛbɔ ahemvie berɛ kilo nu nonɛ te ɔ.

²⁷ Absalom wole mmaa mmienzua nza ne brasua ko. Brasua ne li Tamar. Ɔte brasua bɔ ye nwo yɛ nyemene ɔ.

²⁸ Absalom lili afoɛ nyɔ mumua wɔ Yerusalem, bɔ wannwu Nana Dawide nyunu ɔ.

²⁹ Yeɛ Absalom somane kyɛ bɛɛfrɛ Yoabo bɛbrɛ ye ma ɔsoma ye Nana Dawide berɛ, nakoso Yoabo amma. Ɔsomane maa bɛhɔle Yoabo berɛ ye pɛen nyɔ so, nakoso wamma.

³⁰ Yiti Absalom sele ye somvoɛ nemɔ kyɛ, “Ɛ́mɔtie, Yoabo boo bɔ ɔne me deɛ bɛbɔ wɛen ne, ayuo wɔ nu. Ɛmɔhɔ bɛɛto nu see.” Na Absalom somvoɛ nemɔ bɛɛtole eboo ne anu see.

³¹ Yeɛ Yoabo sili nu hɔle Absalom berɛ wɔ ye awuro oobisale ye kyɛ, “Nzu ati yeɛ wɔ somvoɛ nemɔ baato me boo ne anu see ɔ?”

³² Na Absalom buale Yoabo kyɛ, “Tie, ndole wɔ ngraa kyɛ ɛbra wa maa mva ngraa nzoma wɔ Nana Dawide berɛ kyɛ, ‘Ɛwa bɔ mvili Gesure mmale ye, ye nwo mvasoɛ ole sɛɛ? Sɛ ndɛ wɔ dɔ po a, ahaa ɔte paa.’ Afei de, maa ngɔ Nana nyunu, na sɛ medi fɔ a, ohu me!”

³³ Yiti Yoabo hɔle Nana Dawide berɛ ɔɔbɔle ye amaneɛ. Dawide maa bɛɛfrɛle Absalom. Absalom wale Nana Dawide berɛ, na ɔtole ye nwo yele berɛ fale ye nyunu butuli berɛ wɔ Dawide nyunu, na Nana Dawide tɔle ye nu.