2 Samuel 11 - AHYERƐLƐ KRONGRON

Dawide ne Bahyeba

¹ Bɛhyɛ afoɛ bo bieku nen, mmerɛ bɔ ɔyɛ a ahemvo mɔ bɛkɔ koɛ ne, Dawide somane Yoabo ne ye koɛhonɛfoɛ mbanyi ne Yisrael koɛhonɛfoɛ amukoraa kyɛ bɛhɔ koɛ. Behuhuni Amonfoɛ pasaa, na betuale Raba kuro ne. Nakoso Dawide de, ɔhale Yerusalem.

² Na ɛlɛho bie nɔsoa, Dawide dwɔsole fili nnaa nu. Né ɔnatenate ahemvie berɛ anwuro nekaa bie bɔ basamo so ɔ. Ogyi nzamsoɛ ne aso ne, onwuni kyɛ braa bie obia. Né braa ne nwo yɛ nyemene paa.

³ Yeɛ Dawide somane ebie maa oobisale nwuni braa horɛ. Na bɛhane kyɛ, “Eliam awa Bahyeba ɛne. Hitiniɛ Yuria aye ɛne.”

⁴ Yiti Dawide tuli mmenia maa bɛɛfale braa ne bɛbrɛle ye, na ɔne braa ne bɛlale. (Braa ne buli ye sa ɔ, sɔ mmerɛ ne yeɛ né wafi bɔ ɔpete ye nwo ɔ.) Na braa ne sa hɔle ye awuro.

⁵ Braa ne nwonzɛle, na ɔsomane maa bɛɛbɔle Dawide amaneɛ kyɛ, “Menwonzɛ.”

⁶ Yiti Dawide tole Yoabo ngraa kyɛ, “Ma Hitiniɛ Yuria ɔbra me wa.” Na Yoabo mane Yuria hɔle Dawide berɛ.

⁷ Yuria oodwuli Dawide berɛ ne, Dawide bisale ye kyɛbɔ Yoabo ne koɛhonɛfoɛ nemɔ bɛ nwo si te ɔ, ɔne kyɛbɔ koɛ ne osi kɔ ɔ.

⁸ Afei Dawide sele Yuria kyɛ, “Kɔ awuro kɔpena nzue bie bia.” Yeɛ Yuria fili ahemvie berɛ fitele, na Nana Dawide maa bɛfale akyɛdeɛ bɛɛmane ye.

⁹ Nakoso Yuria angɔ ye awuro. Ɔlale ahemvie anoa nu berɛ, ɔne ye mene Dawide somvoɛ amukoraa yeɛ bɛlale berɛ ɔ.

¹⁰ Na bɛbɔle Dawide amaneɛ kyɛ Yuria angɔ ye awuro nen, Dawide sele Yuria kyɛ, “Bekye ala yeɛ efi atee awa ɔ. Nzu ati yeɛ angɔ w’awuro ye?”

¹¹ Na Yuria buale Dawide kyɛ, “Me mene, Nyameɛ alaka ne ɔne Yisrael ne Yuda koɛhonɛfoɛ bɛwɔ asese nu, yeɛ me mene Yoabo ne wɔ somvoɛ mɔ koso bakyekye asikyeleɛ wɔ eburo. Aso ngɔhora ngɔhɔ awuro ngoodidi ngɔno, ná me ne me ye yala anaa? Nana, mesrɛ meta wɔ ndaen kyɛ, sɔ nikyee de, mengɔyɔ.”

¹² Na Dawide sele Yuria kyɛ, “Nzaade da kuro wa ɛnɛ koso, na ɛhema ngɔmaa ekosa kɔhɔ.” Yiti Yuria tenane Yerusalem sɔ kyẽa ne. Na aleɛ hyene ne,

¹³ Dawide tole ye sa frɛle ye maa bedidili bɛnone, na Dawide maa ɔbole. Odwuli nɔsoa ne, Yuria angɔ ye awuro. Ɔne ye mene Dawide somvoɛ nemɔ yeɛ bɛlale ahemvie anoa nu berɛ ɔ.

Dawide maa beku Yuria

¹⁴ Aleɛ hyene ne, Dawide hyerɛle Yoabo krataa, na ɔfa wurale Yuria sa nu kyɛ ɔɔfa ma ye.

¹⁵ Krataa ne anu dwirɛ ɛhe: “Nekaa bɔ koɛ ne noa yɛ se paa ne, ma Yuria oogyina ye noa. Afei ɛ́mɔyakyi ye ngome nu ma bepura ye behũ ye.”

¹⁶ Na Yoabo gu so bɔ otua kuro ne nen, ɔfale Yuria oogyinane nekaa bɔ Amonfoɛ bɛ koɛhonɛfoɛ ahoneserɛfoɛ paa wɔ ne.

¹⁷ Kuro berɛ ama fite wale bɛɛfale koɛ bɛtoale Yoabo. Behuni Dawide koɛhonɛfoɛ mbanyi ne biemɔ, na behuni Hitiniɛ Yuria koso.

¹⁸ Yeɛ Yoabo tuli bɔfoɛ maa ɔɔfale koɛ ne anu amaneɛ amukoraa bɔle Dawide.

¹⁹ Na ɔhyɛle bɔfoɛ ne kyɛ, “Sɛ ɛkã koɛ ne anu dwirɛ amukoraa kyire Nana Dawide yie,

²⁰ ná Nana ahone hu maa obisa wɔ kyɛ, ‘Nzu ati yeɛ ɛmɔhɔle kuro ne anwo berɛ pɛɛ bɛɛhone ɔ? Né ɛmɔnze kyɛ bɛkɔto agyaen bɛkɔfa fasue ne aso ɔ?

²¹ Nwa yeɛ ohuni Yerubaal awa Abimɛlɛke ɔ? Aso nna braa bie yeɛ ɔyakyili nyɔkoa nu fili fasue so maa ɔɔbɔle ye huni ye wɔ Tebese ɔ? Nzu ati yeɛ ɛmɔhɔle fasue ne anwo berɛ pɛɛ ɔ?’ a, ye de ka kyɛ, ‘Wɔ somvoɛ Hitiniɛ Yuria koso bahu ye.’ ”

²² Yiti ɛbɔfoɛ ne sili nu hɔle, na ɔfale Yoabo ngraa ne amu bɔle Dawide amaneɛ.

²³ Ɛbɔfoɛ ne bɔle Dawide amaneɛ kyɛ, “Amonfoɛ b’anwoserɛ bole yɛ deɛ so. Befili kuro ne anu befitele, bɛfale koɛ bɛɛtoale yɛ wɔ eburo, nakoso yɛfoane bɛ alaa yɛɛdwuli kuro berɛ pambim ne anyunu.

²⁴ Afei b’agyaentolɛfoɛ nemɔ totole agyaen fale fasue ne aso wowɔle wɔ somvoɛ mɔ. Nana, wɔ somvoɛ nemɔ bie awuwu, na wɔ somvoɛ Hitiniɛ Yuria koso wawu.”

²⁵ Yeɛ Dawide sele ɛbɔfoɛ ne kyɛ, “Kose Yoabo kyɛ, ‘Nnɛdi edwirɛ he anwo yealɛ, ofikyɛ koɛ nu de, ɔyɛ sɛɛ ala a, mmenia totɔ wɔ bue ne amunyɔ nu. Yiti mia wɔ nye tua kuro ne ná di so ngonim.’ Afei hyɛ ye nguraen.”

²⁶ Na Yuria aye ne tele kyɛ ohu Yuria awu nen, osuni ohu ne.

²⁷ Olili ye kuna yiele nen, Dawide somane maa bɛɛfale ye bɛwale ye ahemvie berɛ. Ɔyɛle ɔye, na ɔne ye bɛwole baa bienzua. Nakoso AWURADE nye angye nikyee bɔ Dawide yɔle ne anwo.