2 Samuel 10 - AHYERƐLƐ KRONGRON

Dawide di Amonfoɛ ne Siriafoɛ so ngonim

¹ Ye si ye, Amonfoɛ hene wuli, na ɔwa Hanun lili ye bia.

² Na Dawide sele kyɛ, “Hanun baba Nahase wayɔ me paa, yiti me koso ngɔyɔ Hanun paa ne bie.” Yiti Dawide tuli ɛbɔfoɛ mɔ kyɛ bɛɛyɛ ye yaakɔ, ɔnate ɔse wue ne ati. Nakoso Dawide bɔfoɛ nemɔ beedwuli Amonfoɛ aseɛ so ne,

³ Amon mbanyi sele bɛ mene Hanun kyɛ, “Dawide somanɛ bɔ wasoma mmenia kyɛ bɛɛyɛ wɔ yaakɔ ye, ɛnwa nzɛ anidie yeɛ ɔfa ma wɔ baba ɔ? Aso nna kuro ye anu neanealɛ, ye sralɛ, ɔne so ngonimlilɛ ti yeɛ Dawide atu ɛbɔfoɛ maa bawa wɔ wa ye?”

⁴ Yiti Hanun hyele Dawide bɔfoɛ nemɔ, ɔpoane ebiala kanza bue, ɔpepɛle bɛ ndaadeɛ ne nekaa bɔ ɔkata bɛ bo ne guale, na ɔfoane bɛ maa bɛhɔle.

⁵ Na Nana Dawide tele edwirɛ bɔ wasi nen, ɔsomane mmenia maa beeyiale bɛ bɛha behyirele bɛ kyɛ, “Ɛ́mɔtena Yeriko ma ɛmɔ kanza ne ofu koraka né ɛmɔasa bawa.” Ofikyɛ né Hanun agua bɛ nyunu ase paa.

⁶ Amonfoɛ nwuni kyɛ bama Dawide ahone ahu bɛ so paa, yiti betuli ɛbɔfoɛ mɔ maa bɛɛbɔle sɔ mmenia hemɔ paa: Siriafoɛ koɛhonɛfoɛ apee aburanyɔ bɔ bɛnate ase ɔ, bɔ befi Bete Rehobo ne Soba, Maaka hene berɛ koɛhonɛfoɛ apee ko, yeɛ koɛhonɛfoɛ apee buru ne nyɔ bɔ befi Tobo aseɛ so.

⁷ Na Dawide tele porɛ bɔ babɔ nen, ɔmane Yoabo ne koɛhonɛfoɛ ne amukoraa bɛhɔle kyɛ bɛ ne bɛ bɛɛho.

⁸ Amonfoɛ fili bɛ kuro ne anu fitele beegyinagyinane kuro berɛ pambim ne anyunu. Nakoso Siriafoɛ bɔ befi Soba ne Rehobo, yeɛ Tobo ne Maaka koɛhonɛfoɛ nemɔ de, beegyinagyinane eburo.

⁹ Yoabo nwuni kyɛ koɛ ne afite ye nyunu ne ye si, yiti ɔyele Yisrael koɛhonɛfoɛ paa paa nemɔ nu bie, kyɛ ɔkwaafa bɛ toa Siriafoɛ ɔne bɛ ko.

¹⁰ Ɔmane oliɛma Abisae lale ye koɛhonɛfoɛ ngaa nemɔ noa, kyɛ ɔɔfa bɛ toa Amonfoɛ ɔne bɛ ho.

¹¹ Na Yoabo sele kyɛ, “Sɛ Siriafoɛ b’anwoserɛ bo me so a, baaboka me; yeɛ sɛ Amonfoɛ koso b’anwoserɛ bo wɔ so a, ngɔɔboka wɔ.

¹² Gyina pindinn. Na ɔnate yɛ maen, ɔne yɛ Nyameɛ nguro nemɔ ati, maa yɛhyire yɛ bienzua. Mesrɛ kyɛ AWURADE ɔyɔ bɔ okuro ɔ.”

¹³ Afei Yoabo ne ye koɛhonɛfoɛ hɔle bɛ nyunu bɛ ne Siriafoɛ bɛɛfa bɛtetale so, na Siriafoɛ nwati fili ye nyunu.

¹⁴ Na mmerɛ bɔ Amonfoɛ nwuni kyɛ Siriafoɛ anwati nen, bɛ koso bɛnwati befili Abisae nyunu, na beewurale kuro ne anu. Yoabo ne Amonfoɛ bɛɛhone koɛ beyiele ne, afei osa wale Yerusalem.

¹⁵ Siriafoɛ nwuni kyɛ Yisrael ali bɛ so ngonim, yiti bɛboaboale bɛ koɛhonɛfoɛ noa bieku.

¹⁶ Siriafoɛ bɔ bɛwɔ asue Yufreti si dɔ ne, Hadadesa somane maa bɛɛfale bɛ bɛwale. Bɛwale Helam. Né Hadadesa safohene Sobake yeɛ ɔla bɛ noa ɔ.

¹⁷ Dawide tele sɔ dwirɛ nen, ɔboaboale Yisrael koɛhonɛfoɛ amukoraa noa, na ɔɔpɛle asue Yɔɔdan hɔle Helam. Siria koɛhonɛfoɛ nemɔ te gyinane, na bɛ ne Dawide fale koɛ tetale so.

¹⁸ Siriafoɛ nwati fili Yisrael nyunu; na Dawide huhuni bɛ teaseɛnamhanɛfoɛ ɛyaa nzoo ɔne pɔngɔhanɛfoɛ apee aburanna. Na opurale bɛ safohene Sobake maa owuli berɛ.

¹⁹ Na ahemvo amukoraa bɔ né bewura Hadadesa bo ne, benwuni kyɛ Yisrael ali bɛ so ngonim ne, bɛ ne Yisrael yɛle asomdwee apam, na bɛsole Yisrael. Na Siriafoɛ surole kyɛ bɛkɔɔboka Amonfoɛ bieku ɔ.