2 Petro 3 - AHYERƐLƐ KRONGRON

Awurade walɛ ne nwo bɔhyɛ

¹ Aliɛmaa mɔ, ɛhe te me krataa bɔ ɔtɔ so nyɔ bɔ mekyerɛ mebrɛ ɛmɔ ɔ. Na bɛ nu yeɛ mékayekaye ɛmɔ metwe ɛmɔ adwene bɔ nu te ne mesie so,

² kyɛ, ɔsɛ kyɛ ɛmɔkaye edwirɛ mɔ bɔ ngɔmhyɛlɛfoɛ krongron nemɔ bɛhane ye daa ne, ɔne y’Awurade ne yɛ Ngoadefoɛ ahyɛdeɛ bɔ ɔfale yɛ bɔ yɛte ye asomafoɛ so wahã ne.

³ Na ɔsɛ kyɛ ɛmɔdi moa bɛte ɛhe bo, kyɛ, ngyẽa bɔ oli nziɛ ye anu, ngorohoɛfoɛ kodwɔso, na bekoli bɛ bɔbɔ b’akɔnnɔ si bekoli ngorohoɛ;

⁴ ná babisa kyɛ, “Ye walɛ ne nwo bɔhyɛ ne, ɔyɛle sɛɛ bɔ ɔwwale nu ɔ? Ofikyɛ, ofi mmerɛ bɔ yɛ nana mɔ bɛlelale ɔ, kyɛbɔ nikyee biala te fi mmerɛ bɔ Ɛdangama bɔle aleɛ ne, sɔ ala yeɛ ɔte ɔ!”

⁵ Bɛboapa bɛyɛ kyɛ bɛnze kyɛ, ofi tetetete ne, né anwuro wɔ berɛ, na aseɛ fi nzue nu yeɛ ɔwale ɔ, ofi nzue nu yeɛ ootimuni berɛ ɔ, na ɔnate Nyameɛ noa dwirɛ so.

⁶ Na ɔnate so ala yeɛ nzue yili sɛkyele wiase bɔ né ɔwɔ berɛ wɔ b’aberɛ so ne ɔ.

⁷ Na anwuro ne aseɛ bɔ ɔwɔ berɛ ye, ɔnate ye noa dwirɛ komapɛ ne ala so yeɛ otira nu ɔ, na wasiesie ye wama see, na ɔfa nwondɛ ndɛenbualɛ ne amumuyɛɛfoɛ kyẽa ne.

⁸ Nakoso aliɛmaa mɔ, nnɛmɔma ɛmɔ wora fi sɔ dwirɛ he, kyɛ, ɛlɛho te kyɛ afoɛ apee wɔ Awurade nye so, yeɛ afoɛ apee te kyɛ ɛlɛho wɔ ye nye so.

⁹ Awurade ndwetwe ye gya ase wɔ ye bɔhyɛ nwo, kyɛbɔ ebiemɔ bɛdwene kyɛ ɔkyɛ ne. Aboterɛ mmom yeɛ ole ye wɔ yɛ nwo ɔ, ɔmbena kyɛ sona biala mini, na mmom ɔpena kyɛ ebiala ba adwenesakyera nu.

¹⁰ Nakoso Awurade kyẽa ne kɔwa kyɛ awueniɛ ba [kɔngɔen] ɔ. Na nu yeɛ anwuro kɔbɔ nu kurudududu serɛserɛ kotu komini. See kɔma ewienu abɔdeɛ mɔ kohuro, na aseɛ ne so nningyein amukoraa kɔyera.

¹¹ Na sɛ sɔ yeɛ sɔ nningyein ne amukoraa bɛkɔsɛkye a, nzaade nzikyɛ mmenia yeɛ ɔsɛ kyɛ ɛmɔyɛ ɔ? Ɔsɛ kyɛ ɛmɔtira bra krongron ne nyamesom paa nu,

¹² wɔ mmerɛ bɔ ɛmɔnwondɛ ná ɛmɔpere kyɛ Nyameɛ kyẽa ne kɔwa ndɛ ɔ. Nu yeɛ see kɔtɔ anwuro nu kɔyera ye, na see kɔma ewienu abɔdeɛ mɔ kohuro.

¹³ Nakoso kyɛbɔ ye bɔhyɛ te ne, yɛ nye la nyameɛso foforɛ ne aseɛ foforɛ bɔ tenenee te nu ɔ ate.

Foɛtulɛ bɔ ɔpɛ ye bo ɔ

¹⁴ Yiti aliɛmaa mɔ, ɔnate kyɛ ɛmɔnwondɛ sɔ nningyein hemɔ ne ati, ɛ́mɔbɔ mmɔden kyɛ okonwu ɛmɔ wɔ asomdwee nu, bɔ ngekalewa anaa nnɛen biala nne ɛmɔ nwo ɔ.

¹⁵ Ɔsɛ kyɛ ɛmɔnwu Awurade aboterɛ ne kyɛ ɔte ngoalelɛ, kyɛbɔ y’eliɛma dɔfo Pɔɔlo koso nate nworɛ bɔ bafa bama ye ne aso ɔhyerɛ brɛle ɛmɔ ne.

¹⁶ Na ɔkã sɔ nningyein nemɔ nwo dwirɛ wɔ ye ngrataa ne amukoraa nu. Nu dwirɛ nemɔ bie ye botelɛ yɛ se; na ɛhe yeɛ mmenia bɔ bɛnze huu bɔ bɛ bo onnya ottindimuni ne, bekyirekyire ye bo bɛkyea ye, kyɛbɔ bɛyɛ Ahyerɛlɛ ngaa nemɔ koso ne, maa bɛ bɔbɔ bemini ɔ.

¹⁷ Yiti aliɛmaa mɔ, ɛmɔse ɛhemɔ dada, yiti ɛ́mɔla ɛmɔ nwo so, ná mmeraatolɛfoɛ mvomsoɛ ne wandwetwe ɛmɔ wangɔ, ná ɛmɔamvi ase bamvi nekaa bɔ ɛmɔatindim ne.

¹⁸ Na mmom, ɛmɔhɔ so benyi wɔ y’Awurade ne yɛ Ngoadefoɛ Yesu Kristo adom ne ye nwo nimdeɛ nu. Ye yeɛ animnyam hã ye kekesaala ye ɔne daa daa ɔ. Amen.