2 Petro 2 - AHYERƐLƐ KRONGRON

Akyerɛkyerɛfoɛ ngondombofoɛ

¹ Na ngɔmhyɛlɛfoɛ ngondombofoɛ bedwɔsole maen ne anu, kyɛbɔ akyerɛkyerɛfoɛ ngondombofoɛ bekodwɔso wɔ ɛmɔ nu koso ne. Bɛ yeɛ bɛkɔfeafea bɛ nwo bɛkɔfa ngyerɛkyerɛ tɛɛ bɔ ɔsɛkye mmenia bekoowura nu ɔ, na bɛkɔpo Awurade bɔ ɔɔpɔle bɛ ná olele bɛ ne po, na bɛkɔtwetwe ɛsɛkyelɛ bɔ ɔba ndɛndɛ ɔ bɛkɔbrɛ bɛ nwo.

² Na mmeni pee bekoli b’asanzabra ne asi, na ɔnate bɛ ti mmenia kɔkekã nahorɛ ne nwo dwirɛ tɛɛ.

³ Na bɛ nye bɔ ɔboro nikyee ne ati, bɛkɔfa nnakannaka dwirɛ bekodidi ɛmɔ nwo. Na ofi tetetete, ndɛen bɔ babua bɛ ne ɔndwetwe ye ase, yeɛ b’asohwenɛ koso ɔndɔ ngosie.

⁴ Na sɛ Nyameɛ amva abɔfo mɔ bɔ bɛyɔle bɔne ne nwo wangyɛ bɛ, ná mmom ogyili bɛ guale ɛborɔ kumaa kuronguronn awosii kabii nu, ná ɔbɔle bɛ panwu kyɛ ɔfa nwondɛ ndɛenbualɛ ne a;

⁵ ná sɛ wamva daa tete wiase nwo wangyɛ ye, na mmom olele Nowa bɔ ɔte tenenee nzɛmbahanɛniɛ, ɔne mmenia nzoo bɔ bɛboka ye so ne, ná ɔfale nzueyilɛ ɔɔkatale amumuyɛɛfoɛ wiase so a;

⁶ ná sɛ obuale Sodom ne Gomora nguro foɛ ɔbɔle bɛ tɔɔ, ɔsɛkyele bɛ maa bɛyerale bɛtɔle nzoen, ná ɔfa yɛle nhwɛsoɛ mane bɛ bɔ nziɛ ye bɛkɔbɔ amumuyɛɛ bra a;

⁷ na sɛ ɔpepɛ lele teneneeniɛ Lɔto bɔ amumuyɛɛfoɛ bɛfale b’asanzabra bɛteetee ye,

⁸ (ofikyɛ sɔ teneneeniɛ ne, bɔ onwuni ye ná ɔtele wɔ mmerɛ bɔ né ɔte bɛ nu berɛ ne, bɛ mmeraatolɛ yɔleɛ ne mane ye kra tenenee ne olili ye nwo yealɛ daa biala;)

⁹ né nzaade Awurade se atee bɔ ɔfa so ɔpepɛ de bɛ bɔ besuro ye ɔ fi nzɔhwɛ nu, ɔne kyɛbɔ ɔtwe bɛ bɔ bɛndengyɛ so ɔfa nwondɛ ndɛenbualɛ kyẽa ne ɔ,

¹⁰ nganga bɛ bɔ bedi anwoɔnaen akɔnnɔ fiɛ si, ná bebu tumililɛ animtia ɔ. Besi b’ahone, bedi bɛ ti piri, na benzuro kyɛ bɛkɔkekã dwirɛ bekotia animnyamfoɛ nemɔ ɔ.

¹¹ Na abɔfo mɔ po bɔ b’anwoserɛ ne bɛ tumi te piri tra bɛ ne, bɛngeka edwirɛ bendia bɛ bɛmmɔ bɛ kwaadu wɔ Awurade nyunu.

¹² Nakoso sɔ mmenia hemɔ, bɔ bɛte kyɛ ngaka bɔ adwene nne bɛ ti anu, bɔ bɛwole bɛ kyɛ bɛhye bɛ behũ bɛ ne, bɛkekã dwirɛ betia nikyee biala bɔ bɛnde ye bo ɔ, na bɛ bɔbɔ bɛ sɛkyelɛ nu yeɛ bekowuwu ɔ,

¹³ na ɔkɔyɛ bɛ bɔne yɔleɛ ne nwo akatuaa. Bɛ nye gye kyɛ bɛkɔbɔ ahohwibra eyia ketee ɔ. Bɛte ngekaleawa ne nnɛen, na bɛbɔ ahohwibra wɔ b’anigye nu, wɔ mmerɛ bɔ bɛne ɛmɔ didi ɔ.

¹⁴ Bele agyaasɛkyelɛ anyeɛ, bɔ ɔyɔ bɔne a ɔnde ye ɔ, bɛlakalaka akra bɔ bennya bettirale ndii ɔ, balɔ asukɔ wɔ adifuu nu. Bɛte mmenia bɔ banoma bɛ ɔ!

¹⁵ Bayakyi nahorɛ atee ne berɛ bali makyebu, na baafa Beɔ awa Balaam atee so, ye bɔ ohurole kyɛ okonya mvasoɛ kofi amumuyɛɛyɔlɛ nu ɔ.

¹⁶ Nakoso behwili ye nyunu wɔ ye mmeraatolɛ nwo; afupɔngɔ bɔ ɔngora dwudwo ɔ ɔfale sona komvi dwudwole fa sili ngɔmhyɛlɛniɛ ne ngwaseasɛm ne ate.

¹⁷ Sɔ mmenia nemɔ, bɛte abura mɔ bɔ nzue nne nu ɔ, ɔne munungum bɔ mvrama bɔ ye huu kɔ ɔ; na bɛ yeɛ basiesie awosii kabii bato berɛ bama bɛ ɔ.

¹⁸ Ofikyɛ bɛbobɔ bɛ noa nu bɛkekã anwomasoɛ dwirɛ mbaen mbaen, na bɛnate anwoɔnaen akɔnnɔ nu bɛfa ahohwisɛm bɛlakalaka bɛ bɔ begu so bɛnwati befi mmenia bɔ bɛbɔ azanzabra nemɔ bɛ mvomsoɛ nu ɔ.

¹⁹ Bɛfa fawɔnwodi bɛbɔ bɛ anohoba, wɔ aberɛ bɔ bɛ bɔbɔ bɛte prɔlowaa ngoaa ɔ. Ofikyɛ nikyee biala bɔ odi sona so ne, ye yeɛ sona ne te ye akoaa ɔ.

²⁰ Na sɛ bɛnate y’Awurade ne yɛ Ngoadefoɛ Yesu Kristo nwo nimdeɛ so banwati bafi wiase bra fiɛ nu, ná nziɛ ye bɛma sɔ bra fiɛ ne osa kye bɛ odi bɛ so a, ye de bɛ nziɛ ye asetena ne ɔte bɔne tra bɛ daa asetena ne.

²¹ Ofikyɛ sɛ bannwu tenenee atee ne po a, ahaa ɔte paa ma bɛ, tra kyɛ banwu ye bayie, ná afei nziɛ ye bakakyi bɛ nwo bafi ahyɛdeɛ krongron bɔ bɛfa bɛmane bɛ ne anwo ɔ.

²² Bɔ wato bɛ ne, ɔte kyɛbɔ nohorɛ anyandera ne kã ne, kyɛ: “Kyea fe a, osa kodi,” yeɛ “Ebia prako a, osa kɔbo ye asaa bɔ ɔla nu ne.”