2 Petro 1 - AHYERƐLƐ KRONGRON

¹ Simɔn Petro bɔ nde Yesu Kristo akoaa ne somafoɛ ne, mefa mebrɛ bɛ bɔ ɔnate yɛ Nyameɛ ne Ngoadefoɛ Yesu Kristo tenenee so banya gyidie bɔ odi mu kyɛ yɛ deɛ ne ala ɔ.

² Mesrɛ kyɛ adom ne asomdwee ɔyɛ pee ma ɛmɔ, wɔ Nyameɛ ne y’Awurade Yesu nwo nimdeɛ nu.

Bafrɛ yɛ kyɛ yɛɛnyi gyidie nu

³ Nyameɛ tumi ne afa nikyee biala bɔ yɛhia ye wɔ asetena nu ne nyamesom paa nu ɔ wahyɛ yɛ, na wafa ye bɔ wafrɛ yɛ wahɔ ye bɔbɔ ye animnyam ne ye paayɛlɛ nu ne, ye nwo nimdeɛ so.

⁴ Na ɔnate ɛhemɔ aso yeɛ wafa ye bɔhyɛ mbiri mbiri bɔ odi mu ne wahyɛ yɛ ɔ; amaa ɔnate ɛhemɔ aso ɛmɔanwati bafi prɔlowaa bɔ ɔwɔ wiase bɔ ɔnate akɔnnɔ so yeɛ ɔba ne anu, ná ɛmɔanya Nyameɛ sue ne bie.

⁵ Na ye sɔ ne ati, ɛ́mɔbɔ mmɔden bɛ́fa bra paa bɛ́foa ɛmɔ gyidie so; ɛ́mɔfa nimdeɛ bɛfoa bra paa so;

⁶ ɛ́mɔfa anwohyɛsoɛ bɛ́foa nimdeɛ so; ɛ́mɔfa animia bɛ́foa anwohyɛsoɛ so; ɛ́mɔfa nyamesom paa bɛ́foa animia so;

⁷ ɛ́mɔfa aliɛmaa nwo dɔ bɛ́foa nyamesom paa so, ná ɛ́mɔfa ɔdɔ bɛ́foa aliɛmaa nwo dɔ so.

⁸ Na sɛ ɛmɔle sɔ suban paa hemɔ mmorosoɛ a, bɛngɔma ɛmɔngɔtena berɛ mbaen anaa ɛmɔngɔyɛ mmenia bɔ benzu mmaa wɔ y’Awurade Yesu Kristo nwo nimdeɛ nu ɔ.

⁹ Ofikyɛ sona biala bɔ sɔ suban nemɔ wabɔ ye ne, ɔte anyesiniwaaniɛ, ye nye so yɛ ye wusiwusi, na ye wora afi kyɛ bate ye nwo bafi ye bɔne bɔ wayɔ ye daa ne nwo ɔ.

¹⁰ Yiti aliɛmaa mɔ, ɛ́mɔbɔ mmɔden bétira ɛfrɛlɛ bɔ bafrɛ ɛmɔ ne, ɔne ɛnealɛ bɔ baneanea nu baye ɛmɔ ne anu yé, ofikyɛ sɛ ɛmɔyɔ ɛhemɔ a, ɛmɔngofi ase le.

¹¹ Na ɔba ye sɔ a, bɛkɔma ɛmɔ atee mmorosoɛ bɔ ɔkɔ y’Awurade ne yɛ Ngoadefoɛ Yesu Kristo ahennie afebɔɔ ne anu.

¹² Yiti mengobu me nye mengogua so kyɛ ngɔkaye ɛmɔ wɔ ɛhemɔ anwo daa biala, ɔwɔ nu kyɛ ɛmɔse sɔ dada, na ɛmɔatira ndii wɔ nahorɛ bɔ ɛmɔanya ye ne anu.

¹³ Na mmerɛ bɔ nwɔ ɛtena sua ye anu ye de, menea a, ɔte paa kyɛ ngɔbɔ ɛmɔ so maa ɔkɔkanyane ɛmɔ ɔ,

¹⁴ ofikyɛ mese kyɛ, ɔngɔhyɛ biala, bɛkɔye ɛtena sua ne bekofi me nwo, kyɛbɔ y’Awurade Yesu Kristo wala ye ali wahyire me ne.

¹⁵ Na mébɔ mmɔden menea kyɛ, mefi wiase wa mekɔ a, nziɛ ye ɛmɔkɔkaye ɛhemɔ daa biala.

Petro di Kristo animnyam nwo adanzeɛ

¹⁶ Amba, edwirɛ bɔ yahã yahyire ɛmɔ yafa y’Awurade Yesu Kristo tumi ne ye walɛ ne anwo ne, yamva kanda ɛhoaatolɛ so, na mmom yɛ bɔbɔ yɛte ye animnyam totohyia bɔ yɛnwuni ye ne nwo adanzefoɛ.

¹⁷ Ofikyɛ mmerɛ bɔ onyane anidie ne animnyam fili Baba Nyameɛ berɛ, ná komviɛ bie fili Animnyam Totohyia ne berɛ wale ye berɛ kyɛ, “Mma bɔ ɔla m’ahone nwo ná me nye gye ye nwo paa ne ɛhe” nen,

¹⁸ yɛtele sɔ komviɛ ne kyɛ ofi nyameɛso yeɛ ɔwale ɔ, ofikyɛ né yɛne ye yeɛ yɛwɔ bokaa krongron ne aso ɔ.

¹⁹ Na yɛsa yɛle ngɔmhyɛlɛ dwirɛ bɔ ɔma y’adwene si pi paa tra sɔ ɔ. Na ɛhe yeɛ ohia paa kyɛ ɛmɔnea ye yé, kyɛ kanea bɔ ɔta awosii nu maa okoodwu kyɛ aleɛ kɔhye, ná ngyerɛmɔ nzramaa kɔta ɛmɔ ahone nu ɔ.

²⁰ Ɔsɛ kyɛ ɛmɔdi moa bɛte ɛhe bo: kyɛ Ahyerɛlɛ ne anu ngɔmhyɛlɛ biala nne berɛ bɔ ye bohyirelɛ ne fale sona so yeɛ ɔwale ɔ,

²¹ ofikyɛ ngɔmhyɛlɛ biala wamva kuro sona pɛ so wamma le, na mmom Nyameɛ mmenia krongron bedwudwole, kyɛbɔ Sunzum Krongron ne ɔkanyane bɛ ɔ.