2 Korintofoɛ 9 - AHYERƐLƐ KRONGRON

Agyidifoɛ bokaboka bɛ nwo

¹ Onhia po kyɛ mekyerɛ mmokalɛ bɔ yɛkwaafa yɛboka anwoteefoɛ ne nwo krataa mebrɛ ɛmɔ.

² Ofikyɛ, mese kyɛ ɛmɔkuro kyɛ ɛmɔkɔboka, na mefa ɛmɔ mehoahoa me nwo mekyire Makedoniafoɛ kyɛ, ofi afoɛ hene yeɛ ɛmɔ, Akaiafoɛ, ɛmɔaboaboa bɛ nwo kyɛ ɛmɔkɔboka ɔ, na ɛmɔ mmɔdenbɔlɛ ne akanyane mmeni pee.

³ Nakoso mesoma aliɛmaa hemɔ amaa ɛmɔaboaboa ɛmɔ nwo ná y’anwohoahoa wɔ ɛmɔ nwo ne anyɛ mbaen; na kyɛbɔ ngane ne, mese kyɛ ɛmɔaboaboa ɛmɔ nwo.

⁴ Na sɛ Makedoniafoɛ ne me ba ná benwu kyɛ ɛmɔyyɔle ye nwo hwee a, yɛ nyunu kogua ase wɔ sɔ anwohoahoa ye nwo, na ɛmɔ deɛ de bɛnga ye ko.

⁵ Yiti madwene ye nwo kyɛ, ohia kyɛ mesrɛ aliɛmaa hemɔ maa bedi yɛ nyunu moa bɛbapasa ɛmɔ nwo, na bɛboaboa akyɛdeɛ bɔ ɛmɔahyɛ ye nwo bɔ ne noa; amaa wanyɛ kyɛ nhyɛsoɛ akyɛdeɛ, na mmom wafi ɛmɔ ahone nu.

Akyɛdeɛ bɔ ɔsɔ Nyameɛ nye ɔ

⁶ Ɔsɛ kyɛ ɛmɔnwu ye kyɛ, bɔ odua mmakaammaa kãa bie ne, okobu kãa bie; na bɔ odua pee ne, okobu pee.

⁷ Na kyɛbɔ ebiala asusu ye nwo wɔ ye adwene nu ne, maa ɔfa sɔ ma, na wanyɛ kyɛ ɔtwetwe ye gya ase anaakyɛ ɔyɛ ye nhyɛsoɛ nu; ofikyɛ bɔ ɔye ye kunu fitaa fa nikyee kyɛ ne yeɛ Nyameɛ kuro ye dwirɛ ɔ.

⁸ Nyameɛ kora ma ɛmɔnya saleɛ amukoraa mmorosoɛ, amaa mmerɛ biala ɛmɔ sa ahã nikyee biala bɔ ɛmɔhia ɔ, na ɛmɔkonya ye mmorosoɛ na ɛmɔafa bie baboka adwuma paa.

⁹ Ofikyɛ bahyerɛ kyɛ, “Ɔye ye kunu fa nningyein kyekyɛ paa, ɔkyɛ ehiafoɛ nikye, ye tenenee wɔ berɛ afebɔɔ.”

¹⁰ Na Nyameɛ bɔ ɔma kuaniɛ bakaammaa maa odua ná ɔma ye aleɛ maa odi ne, ɔkɔma ɛmɔ mmakaammaa mmorosoɛ ná wama ɛmɔ adɔeɛ ne asu mmaa pee.

¹¹ Ɛmɔkonya ɛmɔ nwo wɔ nikyee biala nu ná ɛmɔafa bie bayɔ adɔeɛ, na ɔnate yɛ so mmenia kɔla Nyameɛ ase wɔ ɛmɔ adɔeɛ ne nwo.

¹² Nna bɔ anwoteefoɛ ne hia ngome yeɛ ɛmɔ mmokalɛ ne ma bɛ sa kã ɔ, na mmom ɔmaa bɛfa asennaa pee koso bɛma Nyameɛ.

¹³ Sɔ mmokalɛ he di ɛmɔ nwo adanzeɛ, na ɔkɔmaa bɛkɔhyɛ Nyameɛ animnyam wɔ ɛmɔ sotie wɔ Kristo nzɛmba ne nwo, ɔne mmokalɛ bɔ ɛmɔfa boka bɛ ne mmenia mukoraa nwo,

¹⁴ na bɛkɔbɔ mbaeɛ bɛkɔma ɛmɔ ná bɛ wora adɔ ɛmɔ, ɔnate Nyameɛ adom mmorosoɛ bɔ ɛmɔanya ne ati.

¹⁵ Ɛ́mɔma yɛla Nyameɛ ase wɔ ye akyɛdeɛ bɔ olle kabea ne anwo.