2 Korintofoɛ 4 - AHYERƐLƐ KRONGRON

Agyapadeɛ bɔ ɔwɔ ngukue nu

¹ Ye sɔ ti, kyɛ Nyameɛ wanwu yɛ anwumvoin wafa ɛsom he wawura yɛ sa ye, yɛngɔpa aba.

² Na yagyi nyanzoen bra bɔ bɛbɔ ye mvealeɛ nu ne yagua; yɛmmɔ nnakannaka bra, yeɛ yɛngã Nyameɛ dwirɛ ne yɛngyea ye; na mmom yɛfa nahorɛ ne bɔ yɛye ye ali ne aso maa mmenia de yɛ to nu wɔ Nyameɛ nyunu.

³ Na sɛ yɛ nzɛmba ne aso akata a, so akata ama bɛ bɔ bɛwɔ so bemini ne.

⁴ Bɛ yeɛ ewiase wa nyameɛ ama bɛ bɔ benne benni ne, b’adwene ali naakye, amaa Kristo bɔ ole Nyameɛ sue n’animnyam nzɛmba kanea ne, wanda bɛ so.

⁵ Nna yɛ bɔbɔ yɛ nwo dawure yeɛ yɛbɔ ɔ, na mmom Kristo Yesu bɔ ɔte Awurade ne, ye nwo dawure yɛbɔ ɔ, na yɛsa yɛbɔ dawure kyɛ ɔnate Yesu ti yayɛ ɛmɔ ngoaa.

⁶ Ofikyɛ Nyameɛ bɔ ɔmane kanea fili awosii nu tale ne, wata hyireinn wɔ y’ahone nu, kyɛ Nyameɛ animnyam nwo nimdeɛ kanea bɔ ɔwɔ Yesu Kristo nyunu ne.

⁷ Nakoso sɔ agyapadeɛ bɔ yanya ye ne wɔ ngukue nu, na ɛhe maa ɔda adi kyɛ sɔ tumi totohyia ne te Nyameɛ deɛ, na nna yɛ deɛ ɔ.

⁸ Yɛnwu amaneɛ wɔ nikyee biala nu, nakoso ommu y’abasa nu; yɛ nwo ahyere yɛ, nakoso yɛle anyelasoɛ.

⁹ Bɛtane yɛ nye, nakoso Nyameɛ de ɔppole yɛ; babɔ yɛ bɛto ase, nakoso bɛsɛkyele yɛ.

¹⁰ Daa biala, yɛsoa Awurade Yesu wue ne wɔ yɛ nipadua nu, amaa ɔnate so Yesu sue ne koso ala ali wɔ yɛ nipadua nu.

¹¹ Ofikyɛ mmerɛ bɔ yɛte ase ye de, ɔnate Yesu ti daa biala bɛma ewue di yɛ mvanvando, amaa ɔnate so Yesu ngoa ne koso ala ali wɔ yɛ nwonaen bɔ owu ne anu.

¹² Yiti ewue li yɛ mvanvando, nakoso ɛmɔ de ngoa wɔ ɛmɔ nu.

¹³ Ɔnate kyɛ yɛ koso yɛle sɔ gyidie sunzum ne ala bie, kyɛbɔ wahyerɛ kyɛ, “Male mali, yiti madwudwo” ne, sɔ ala yeɛ yɛ koso yɛde yɛdi, yiti yɛdwudwo ɔ.

¹⁴ Ofikyɛ yɛse kyɛ, bɔ otingyele Awurade Yesu fili ewue nu ne kotingye yɛ kɔboka Yesu so, ná wafa ɛmɔ ne yɛ wahɔ ye nyunu.

¹⁵ Ɛmɔ ti yeɛ sɔ nikyee ne wɔ berɛ ɔ, amaa mmeni pee bɔ Nyameɛ adom ɔtrɛ kɔ bɛ berɛ ne, bafa asennaa mmorosoɛ bahyɛ Nyameɛ animnyam.

Yɛte ase wɔ gyidie nu

¹⁶ Ɔnate ɛhe ati, yɛmma y’abasa nu mmu. Na ɔwɔ nu kyɛ anwoɔnaen he bɔ anyeɛ nwu ye ne gu so ɔsɛkye de, nakoso sunzum nu de, yɛnyi frɔmfrɔm alehyeleɛ biala.

¹⁷ Ofikyɛ kekesaala ye amaneɛ kãa bɔ yɛnwu ye ne, osiesie yɛ ma animnyam kandinga bɔ ɔwɔ berɛ afebɔɔ, bɔ ɔtra so ɔ.

¹⁸ Yiti yɛmva yɛ nye yɛnzie nningyein bɔ anyeɛ nwu ye so, na mmom yɛfa yɛsie bɔ anyeɛ nnwu ye so; ofikyɛ bɔ anyeɛ nwu ye ne ngyɛ ná wapɛ nu, nakoso bɔ anyeɛ nnwu ye ne de ɔwɔ berɛ afebɔɔ.