2 Korintofoɛ 3 - AHYERƐLƐ KRONGRON

Apam foforɛ nwo asomvoɛ

¹ Aso yɛsa yɛhyɛ ye bo yɛkamvo yɛ nwo yɛkyire anaa? Anaa ohia kyɛ yɛfa krataa bɔ odi yɛ nwo adanzeɛ yɛbakyire ɛmɔ, anaakyɛ yɛde bie yɛfi ɛmɔ berɛ, kyɛbɔ ebiemɔ de bɛyɔ ne?

² Ɛmɔ ole yɛ nwo adanzeɛ krataa bɔ bahyerɛ ye wɔ y’ahone nu ɔ, bɔ mmenia mukoraa nwu ye ná bɛkenga ɔ;

³ na ɔda ali pefee kyɛ ɛmɔte Kristo krataa bɔ ɔnate yɛ dwumadie so wahyerɛ ɔ. Wamva ayirebire, na mmom ɔfale Nyameɛ teasefoɛ Sunzum yeɛ ɔhyerɛle ɔ. Nna nyɔboɛ poen so, na mmom sona ahone poen so yeɛ ɔhyerɛle ɔ.

⁴ Sɔ gyidie ne yeɛ ɔnate Kristo so yanya ye wɔ Nyameɛ nu ɔ;

⁵ nna kyɛ yɛfata kyɛ yɛsusu kyɛ yɛ bɔbɔ yɛ mmɔdenbɔlɛ yeɛ yɛfa yɛyɔ nikyee bie ɔ, na mmom yeɛ mmɔdenbɔlɛ ne fi Nyameɛ berɛ.

⁶ Ye yeɛ wamaa yafata kyɛ yɛyɛ apam foforɛ ne nwo asomvoɛ ɔ, nna mmeraa bɔ bahyerɛ ɔ nu, na mmom Sunzum nu, ofikyɛ bɔ bahyerɛ ne ma ewue, nakoso Sunzum ne de ɔma ngoa.

Apam foforɛ n’animnyam

⁷ Ewue nwo ɛsom bɔ bɛhyerɛ beguale nyɔboɛ so ne mane animnyam kandinga ma yiti Yisraelfoɛ bangora bannea Mose nyunu ɔnate kyɛ né ɔta hyireinn ne, ɔwɔ nu kyɛ né sɔ animnyam ne okyikyi. Sɛ ye sɔ de a,

⁸ ye de ɔkɔyɛ sɛɛ bɔ Sunzum nu ɛsom ne ngonya animnyam bɔ ɔtra so ɔ?

⁹ Na sɛ ɛsom bɔ obua mmenia foɛ ne le animnyam a, nzaade ɛsom bɔ ɔma mmenia yɛ tenenee n’animnyam kɔbo so koraa!

¹⁰ Amba, ɛnea a, bɔ daa né ole animnyam ne, kekesaala de, olle animnyam biala po, ofikyɛ ɛnɛ deɛ n’animnyam tra daa deɛ ne bɔkɔɔ.

¹¹ Na sɛ bɔ ogu so ɔpɛ nu kɔ ne nyane animnyam a, nzaade bɔ ɔwɔ berɛ afebɔɔ n’animnyam bo so koraa.

¹² Na ɔnate kyɛ yanya sɔ anyelasoɛ ne ati, yɛkora yɛsi y’ahone yɛdwudwo.

¹³ Yɛ de, yɛtte kyɛ Mose bɔ ɔfale ngatanyunu katale ye nyunu, kyɛbɔ ɔkɔyɛ ná Yisraelfoɛ bangora bangyene bɛ nye bannea ye nyunu animnyam bɔ né okyikyi ne ɔ.

¹⁴ Nakoso b’adwene lili naakye, bɔ ɛnɛ ne ɛnɛ ye po sɛ bɛkenga apam daa ne a, ngatanyunu komapɛ ne ala tɛwɔ berɛ bɔ bennya bɛyyele ɔ, ofikyɛ sana Kristo nu angome yeɛ ngatanyunu ne ye fi berɛ ɔ.

¹⁵ Na ɔbaadwu ɛnɛ ye po, sɛ bɛkenga Mose nwomaa ne a, ngatanyunu ne tɛkata bɛ ndeaseɛ so.

¹⁶ Nakoso sɛ sona fa ye nwo bɔ Awurade a, ɔkɔye ngatanyunu ne kɔma ye.

¹⁷ Afei, Awurade ole Sunzum ne, na nekaa bɔ Awurade Sunzum wɔ ne, fawɔnwodi wɔ berɛ.

¹⁸ Baye yɛ mukoraa yɛ nyunu ngatanyunu ne, yiti yɛnwu Awurade animnyam ne kyɛ yɛnea neanu nu ɔ, na Awurade Sunzum ne gu so ɔsesã yɛ maa yɛnya ye sue ne bie yɛfi animnyam nu yahɔ animnyam nu.