2 Korintofoɛ 2 - AHYERƐLƐ KRONGRON

¹ Yiti nyɛle m’adwene kyɛ mengɔfa aworabɔlɛ mengosa mengɔwa ɛmɔ berɛ ko.

² Na sɛ mema ɛmɔ wora bɔ a, nwa bieku yeɛ ɔkɔma me nye kɔha ɔ? Nna mmenia komapɛ bɔ mama ɛmɔ wora abɔ ye ala ɔ?

³ Na ɛhe ati yeɛ ɔmaa ngyerɛle ɛmɔ krataa hene ɔ, amaa sɛ meba a, mmenia bɔ ɔsɛ kyɛ bɛgyegye me nye ne, bamma me wora ammɔ. Ofikyɛ mede ɛmɔ amukoraa medi kyɛ sɛ me nye gye a, né ebiala nye agye.

⁴ Mvale ahometrɛ ne aworabɔlɛ worawora nu, ɔne me nye moenporolɛ pee yeɛ ngyerɛle ɛmɔ ɔ. Manyɛ kyɛ mema ɛmɔ wora bɔ, na mmom né mepena kyɛ ɛmɔnwu kyɛ mekuro ɛmɔ dwirɛ soma.

Fa bɔne kyɛ

⁵ Nakoso sɛ ebie ama aworabɔlɛ bie awa a, nna me ngome yeɛ wama me wora abɔ ɔ; na mmom atee bie aso, sɛ mékã ye kyɛbɔ medwudwolɛ noa ngɔyɛ hye a, ɛmɔ amukoraa ɛmɔboka so.

⁶ Na ɔte paa bɔkɔɔ ma sɔ sona ne kyɛ mmeni soma ahwi ye nyunu ɔ.

⁷ Yiti ohia kyɛ ɛmɔfa ye nwo bɛkyɛ ye ná ɛmɔkyekye ye wora, amaa aworabɔlɛ ne ammu ye kɔme anu.

⁸ Mesrɛ ɛmɔ ala kyɛ ɛmɔhɔ so behuro ye dwirɛ.

⁹ Na ɛhe ati yeɛ ɔmaa ngyerɛle krataa ye ɔ, amaa ɔnate so maso ɛmɔ manea sɛ ɛmɔayɛ sotie wɔ nningyein mukoraa nu a.

¹⁰ Na sona bɔ ɛmɔkɔfa ye nwo bɛkɔhyɛ ye ne, me koso mefa mekyɛ ye. Na sɛ mafa edwirɛ bie mahyɛ a, sona bɔ mva ngyɛle ye ne, ɔnate ɛmɔ ti yeɛ mafa mahyɛ ye wɔ Kristo nyunu ɔ;

¹¹ amaa Abɔnzam anni yɛ aminɛ, ofikyɛ yɛse ye atee bɔ ɔnate so ɔ.

Pɔɔlo fili Troase

¹² Mmerɛ bɔ ngɔle Troase kyɛ mekwaahã Kristo nzɛmba nen, Awurade bukyele atee mane me.

¹³ Nakoso wanyɛ me fɛ paa biala, ofikyɛ mannwu nniɛma Tito wɔ berɛ. Yiti ngrale berɛ ama, na nzili nu ngɔle Makedonia.

Ngonim wɔ Kristo nu

¹⁴ Nyameɛ bɔ daa ɔmaa yɛdi ngonim wɔ Kristo nu, ná afei osa fa yɛ so ma ye nwo nimdeɛ woroworo nekaa biala kyɛ ayirefona ne, yɛda ye ase.

¹⁵ Ofikyɛ yɛte Kristo ayirefona wɔ Nyameɛ nyunu, na ye fona ne tu fa bɛ bɔ Nyameɛ gu so ode bɛ ngoa, ɔne bɛ bɔ begu so bemini so.

¹⁶ Sɔ ayirefona ne te ewue pambaen bɔ ɔkɔ wue nu ma ebiemɔ; nakoso ebiemɔ de, ɔte ngoa fona bɔ ɔkɔ ngoa nu ɔ. Na nwa yeɛ ɔfata ɛhemɔ ɔ?

¹⁷ Yɛ de, yɛtte kyɛ mmeni pee bɔ bɛnate besi Nyameɛ dwirɛ ne aso kongo ne. Na mmom yɛbɔ Kristo nwo dawure nahorɛ nu wɔ Nyameɛ nyunu kyɛ mmenia bɔ Nyameɛ asoma bɛ ɔ.