2 Korintofoɛ 13 - AHYERƐLƐ KRONGRON

Foɛtulɛ

¹ Meba ɛmɔ berɛ he a, né ye pɛen nza so ɛne. Na kwaadu biala, odi kyɛ benya adanzefoɛ nyɔ anaa nza noa dwirɛ bɛfa bɛfoa so.

² Mmɔle bɛ bɔ daa ne bɛyɛle bɔne, ne bɛ bɔ baha ne amukoraa kɔkɔ, na kekesaala ye bɔ nne ɛmɔ berɛ ye koso, mesi so bieku, kyɛbɔ nyɔle ye mmerɛ bɔ nzrale ɛmɔ ye pɛen nyɔ so ne kyɛ, sɛ meba berɛ bieku a, mengɔfa bɛ nwo ngɔhyɛ bɛ.

³ Ofikyɛ ɛmɔpena adanzeɛ bɔ okyire kyɛ Kristo yeɛ ɔfa me so dwudwo ɔ. Kristo nyɛ mmerɛ wɔ ɛmɔ so, na mmom ye tumi yɔ adwuma wɔ ɛmɔ nu.

⁴ Ɔwɔ nu kyɛ bɛbɔle ye mmeamudua nu wɔ mmerɛyɛlɛ nu de, nakoso ɔnate Nyameɛ tumi so ɔte ase. Yɛ koso, yɛyɛ mmerɛ wɔ ye nu, nakoso yɛnate Nyameɛ tumi so yɛne ye kɔtena ase.

⁵ Ɛ́mɔneanea ɛmɔ ahone nu bɛnea sɛ ɛmɔtɛtira gyidie ne anu a. Ɛ́mɔso ɛmɔ nwo bɛnea. Aso ɛmɔnnwu ye kyɛ Yesu Kristo te ɛmɔ nu anaa? Sana ebiaa né ɛmɔabɔ ase wɔ gyidie nu.

⁶ Nakoso mede medi kyɛ ɛmɔkonwu ye kyɛ yɛ de, yɛbbɔle ase wɔ gyidie nu.

⁷ Na yɛsrɛ Nyameɛ kyɛ ɛmɔngɔyɔ bɔne. Yɛngyire kyɛ yɛ de yɛsɔ anyeɛ oo, daabi! na mmom ɛmɔ de yɛpena kyɛ ɛmɔyɔ bɔ ɔtengyɛ ɔ, ɔwɔ nu kyɛ ebie a yayɛ kyɛ bɛbɔ babɔ ase wɔ gyidie nu ne.

⁸ Ofikyɛ yɛngɔhora yɛngɔyɔ nikye fee ngotia nahorɛ ne, na mmom kyɛ yɛkogyina yɛkɔma nahorɛ ne yeɛ yɛkɔhora kɔyɔ ɔ.

⁹ Na sɛ yɛyɛ mmerɛ, na ɛmɔ de ɛmɔyɛ se a, né yɛ nye agye; na yɛ mbaeɛ ole kyɛ ɛmɔkoli mu ɔ.

¹⁰ Yiti mekyerɛ krataa he mebrɛ ɛmɔ wɔ mmerɛ bɔ nne ɛmɔ berɛ ɔ, amaa sɛ meba a, Awurade tumi bɔ wafa wama me ne, mamva so me ne ɛmɔ yanni ye weewee. Ofikyɛ nna ɛmɔ asefinɛ, na mmom ɛmɔ ngɔsoɛ ti yeɛ nyane sɔ tumi ne ɔ.

Ngraalilɛ ne mbaeɛ

¹¹ Afei aliɛmaa mɔ, mekra ɛmɔ oo! Ɛ́mɔma ɛmɔ nwo te, ɛ́mɔma ɛmɔ wora kyekye, ɛmɔnya adwene ko, ɛmɔtena asomdwee nu, na ɔdɔ ne asomdwee Nyameɛ ɔne ɛmɔ kɔtena.

¹² Ɛmɔyɛ ɛmɔ nwo awaawaatuu krongron nu.

¹³ Anwoteefoɛ ne amu bebisa ɛmɔ ahye.

¹⁴ Y’Awurade Yesu Kristo adom ne, Nyameɛ dɔ ne, ɔne Sunzum Krongron abiɛngoɛfalɛ ne ɔne ɛmɔ amukoraa bɛtena. Amen.