2 Korintofoɛ 12 - AHYERƐLƐ KRONGRON

Pɔɔlo kã ye nyekyire nwo dwirɛ

¹ Ye nwo nhia kyɛ ngɔhoahoa me nwo ɔ, nakoso ngɔhã Awurade nyekyire, ɔne bɔ waye wahyire me nwo dwirɛ.

² Mese ebie wɔ Kristo nu, na afoɛ buru ne nna ɛhe yeɛ behwimini ye bɛhɔle nyameɛso bɔ ɔtɔ so nza ne aso ɔ. Sɛ ɛhe sili wɔ anwoɔnaen nu oo, sɛ nna anwoɔnaen nu ahɔ oo, me de menze, Nyameɛ yeɛ ɔse ɔ.

³ Mese kyɛ behwimini sɔ sona ne bɛhɔle Paradise. Nakoso sɛ ɛhe sili wɔ anwoɔnaen nu oo, sɛ nna anwoɔnaen nu ahɔ oo, me de menze, Nyameɛ yeɛ ɔse ɔ.

⁴ Na berɛ yeɛ ɔtele edwirɛ bɔ kuro sona ngora nga bie, yeɛ atee koso nne berɛ kyɛ ɔkã ɔ.

⁵ Sɔ sona ne yeɛ ngɔfa ye ngɔhoahoa me nwo ɔ, nakoso me bɔbɔ me nwo de mengɔhoahoa; sana me mmerɛyɛlɛ nwo yeɛ ngɔhoahoa me nwo ɔ.

⁶ Na sɛ mekuro kyɛ mehoahoa me nwo po a, mengɔyɛ kwaseaa, ofikyɛ nahorɛ yeɛ ngɔhã ɔ. Nakoso mayakyi m’anwohoahoa ne po, anyɔ a né bɔ ebie nwu ye anaa bɔ ɔte fi me berɛ ne ati wabu me watra so.

⁷ Na kyɛbɔ ɔkɔyɛ na mamva anwanwadeɛ nyekyire hemɔ mammoma me nwo so soma ne ati, bɛfale ɛhawo bie bawura me nwonaen nu, bɔ ɔte Abɔnzam bɔfoɛ, kyɛ ɔma nwu yealɛ, ná mammoma me nwo so.

⁸ Ɔnate ɛhe ati, nzrɛle Awurade pɛen nza kyɛ ɔye sɔ nikyee ne fi me so.

⁹ Nakoso obuale me kyɛ, “M’adom ne ala sone ma wɔ, ofikyɛ sona mmerɛyɛlɛ nu yeɛ me tumi ne ye ye nwo ali paa paa ɔ.” Yiti ngɔfa anika piri paa ngɔhoahoa me nwo wɔ me mmerɛyɛlɛ nu, amaa Kristo tumi ne wawura me nu.

¹⁰ Na ɔnate Kristo ti, me nye gye wɔ mmerɛyɛlɛ nu, alapaa bɔ bɛbɔ me nu, anwokyere nu, ndaneanyeɛ nu, aworabɔlɛ nu; ofikyɛ sɛ meyɛ mmerɛ a, yeɛ me nwo yɛ se ɔ.

Korintofoɛ nwo hia Pɔɔlo

¹¹ Mayɛ kwaseaa mahoahoa me nwo, nakoso ɛmɔ yeɛ bamaa mayɛ sɔ ɔ, ofikyɛ ɛmɔ yeɛ ɔsɛ kyɛ ɛmɔkamvo me bekyire ɔ. Na sɛ nnde huu po a, sɔ “asomafoɛ atitire” nemɔ de bɛndra me wɔ atee biala so.

¹² Nningyein bɔ bedi asomafoɛ paa nwo adanzeɛ ne, nyɔle ye wɔ ɛmɔ berɛ wɔ aboterɛ mukoraa ne nzɛngyerɛnneɛ, anwanwadeɛ ne tumi nnwumaa nu ɔ.

¹³ Nzikyɛ paa yeɛ nyɔ mane asɔre ngaa nemɔ bɔ mbɛle ɛmɔ nyakyili ɔ? Sana m’anwokyere ye ala bɔ mamva mangua ɛmɔ so ye. Na sɛ ɛhe nwo yeɛ mayɔ tɛɛ hɔ a, nzaade ɛmɔfa bɛhyɛ me.

¹⁴ Ye pɛen nza ɛhe yeɛ maboaboa me nwo kyɛ meba ɛmɔ berɛ ɔ. Memmanyɛ ɛmɔ so tɔsom, ofikyɛ membena ɛmɔ dɔ nikye fee, na mmom mepena ɛmɔ bɔbɔ deinn. Ofikyɛ nna mmaa yeɛ bɛpena nikyee bɛyakyi awofoɛ ɔ, na mmom awofoɛ yeɛ bɛpena bɛyakyi mmaa ɔ.

¹⁵ Na me de, ɔkɔyɛ me fɛ kyɛ ɔnate ɛmɔ kra ti ngɔhwere me nikyee biala, ɔne me bɔbɔ me mumua ne. Na sɛ mekuro ɛmɔ dwirɛ pee sɔa a, né nzu ati yeɛ ɛmɔ de ɛmɔkuro me dwirɛ kãa bie ɔ?

¹⁶ Ɔwɔ nu kyɛ manyɛ ɛmɔ so tɔsom de, nakoso ɛmɔdwene kyɛ nde anyeteɛ sona, na nnakannaka yeɛ mafa manya ɛmɔ ɔ.

¹⁷ Mmenia bɔ nzomane bɛ ɛmɔ berɛ ne, aso mafa bɛ so mali ɛmɔ aminɛ anaa?

¹⁸ Nzrɛle Tito, na nzomane ye ne aliɛmaa ne kyɛ bɛbra ɛmɔ berɛ. Aso Tito, olili ɛmɔ aminɛ anaa? Ɔne me yɛ dwumadie ne ɔtte ko anaa? Anaakyɛ nna agyirɛ komapɛ ne ala yeɛ yɛtuli ɔ?

¹⁹ Ɛmɔdwene kyɛ yɛ noa yeɛ yɛye yɛkyire ɛmɔ ɔ? Daabi. Yɛdwudwo Kristo dumaa nu wɔ Nyameɛ nyunu; na aliɛmaa mɔ, ɛmɔ ngɔsoɛ ti yeɛ ɔmaa yɛkã ɛhe amukoraa ɔ.

²⁰ Na mesuro ye si kyɛ sɛ meba a, ngoonwu ɛmɔ wɔ atee bɔ menguro so, ná ɛmɔ koso ɛmɔanwu me wɔ atee bɔ ɛmɔnguro so. Ebiaa ngɔɔto ɛmɔ ne ngondii, ahoɔyea, ɛyaafɛlɛ, pɛsɛmangomenya, bɛ gya ndii nu pepɛlɛ, nzekure, anwomasoɛ ne basabasayɔlɛ nu.

²¹ Ebiaa meba bieku a, me Nyameɛ kɔbrɛ me ase wɔ ɛmɔ nyunu maa ngoli ɛmɔ nu pee nwo aworabɔlɛ wɔ mmenia somaa bɔ daa bayɔ bɔne, ná kekesaala ye bɛtɛyɔ ná banzakyera b’adwene wɔ brabɔlɛ fiɛ, adwamanbɔlɛ ne ahuhubra nwo ti.