2 Korintofoɛ 11 - AHYERƐLƐ KRONGRON

Pɔɔlo ne asomafoɛ ngondombofoɛ

¹ Sɛ ɛmɔfa me ngwaseasɛm ne sɔ ala ma me a, ahaa mekuro. Mesrɛ ɛmɔ ala ɛmɔfa ye sɔ!

² Nyameɛ nungunɛ ne bie yeɛ metwe wɔ ɛmɔ nwo ɔ. Ofikyɛ mafa ɛmɔ mabɔ asiwa mama biaa komapɛ, ye ole Kristo, na ngɔfa ɛmɔ ngɔma ye kyɛ ababunu bɔ ye nwo te ná onnwuni biaa le ɔ.

³ Nakoso mesuro kyɛ, kyɛbɔ ewoo ne fale anyeteɛ nworɛ lakalakale Hawa nen, sɔ ala yeɛ bɛkɔsɛkye ɛmɔ adwene maa ɛmɔkɔhwe bɛ nwo bekofi Kristo bɔ ɛmɔafa bɛ nwo bama ye nahorɛ nu ne anwo ɔ.

⁴ Ofikyɛ sɛ ebie ba ɛmɔ berɛ bakã Yesu foforɛ bie nwo dwirɛ bɔ yɛhhane, anaakyɛ sɛ ɛmɔnya sunzum foforɛ bɔ ɔne bɔ ɛmɔlili moa benyane ye ne bɛtte ko, anaakyɛ nzɛmba foforɛ bɔ ɔne bɔ ɛmɔale bato nu ne bɛtte ko a, naa ɛmɔfa anika bɛsɔ nu!

⁵ Nakoso menne menni kyɛ sɔ “asomafoɛ atitire” nemɔ bɛtra me ɔ.

⁶ Na sɛ me noa yeɛ ɔttele po a, nimdeɛ nu de mebɔ mmɔden; na nikyee biala nu yala ɛhe ali yahyire ɛmɔ wɔ atee biala so.

⁷ Na sɛ mmrɛle me nwo ase maa ɛmɔnyane ngɔsoɛ wɔ mmerɛ bɔ ngane Nyameɛ nzɛmba ne ngyirele ɛmɔ, bɔ mammisa ɛmɔ berɛ hwee ne a, né bɔne beni yeɛ mayɔ ɔ?

⁸ Asɔre biemɔ mmokalɛ bɔ bɛfa bɛbokale me ne, mefa ye kyɛ mawua bɛ; ofikyɛ mvale sɔ akatuaa ne neane me nwo nzole ɛmɔ.

⁹ Na mmerɛ bɔ me nwo hyerele me wɔ ɛmɔ berɛ ne, mamva m’anwokyere mangua ebiala so, ofikyɛ aliɛmaa mɔ bɔ befi Makedonia bɛwale ne bɛfale nikyee biala bɔ mehia bɛbrɛle me. Yiti kyɛbɔ neane me nwo daa wɔ nikyee biala nu ne, ngɔhɔ so ngɔyɔ ye sɔ ala, na manyɛ ɛmɔ so tɔsom.

¹⁰ Kristo nwo nahorɛ dwirɛ wɔ me nu, yiti ebiala ngɔhora ngɔma mengɔyakyi me nwo hoahoalɛ wɔ Akaia manzini nu.

¹¹ Nzu ati ɔ? Aso menguro ɛmɔ dwirɛ hɔ ɔ? Nyameɛ yeɛ ɔse ɔ.

¹² Ngɔhɔ so ngɔyɔ bɔ meyɔ ne ala, na ɛhe ngɔma mmenia ngonya edwirɛ biala ngogyina so ná bafa bahoahoa bɛ nwo kyɛ bɛyɔ b’adwuma kyɛ yɛ deɛ ne ala.

¹³ Ofikyɛ sɔ mmenia ne te asomafoɛ ngondombofoɛ, adwumayɔlɛfoɛ nnakannakafoɛ bɔ bɛkakyi bɛ nwo kyɛ Kristo asomafoɛ ɔ.

¹⁴ Na ɔnyɛ nwanwa! Ofikyɛ Abɔnzam po kakyi ye nwo kyɛ nahorɛ abɔfo.

¹⁵ Yiti sɛ ye asomafoɛ mɔ koso bɛkakyi bɛ nwo kyɛ tenenee somvoɛ mɔ a, ɔnyɛ nwanwa, na b’ayieleɛ koyie bɛ kyɛbɔ bɛ yɔleɛ te ɔ.

Pɔɔlo fa amaneɛnwunɛ hoahoa ye nwo

¹⁶ Mesi so bieku, nnɛma ebiala dwene kyɛ nnne adwene. Nakoso sɛ ɛmɔbu me kyɛ nnne adwene po a, ɛ́mɔfa me sɔ ala, ná me koso nhoahoa me nwo kãa.

¹⁷ Sɔ anwohoahoa ye nwo dwirɛ bɔ mekã ye, nna Awurade tumi yeɛ mefa mekã ɔ, na mmom mekã ye kyɛ sona bɔ nnne adwene ɔ.

¹⁸ Mmeni pee hoahoa bɛ nwo wɔ anwoɔnaen atee so, yiti me wora ngɔhoahoa me nwo bie.

¹⁹ Ɛmɔle ngwaseafoɛ nwo aboterɛ, ofikyɛ ɛmɔte nworɛfoɛ.

²⁰ Na sɛ ebie fa ɛmɔ yɛ ngoaa, anaa odi ɛmɔ aminɛ, anaa osisi ɛmɔ, anaa ɔmoma ye nwo so, anaa ɔpakye ɛmɔ nye so po a, ɛmɔnya ye nwo aboterɛ.

²¹ Ɔyɛ me nya kyɛ mekã kyɛ yɛ de yɛbrɛle yɛ nwo ase soma ɔ. Nakoso bɔ ebie kora fa hoahoa ye nwo ne, medwudwo kyɛ ebiaa nnne adwene de oo, me wora mekora mefa mehoahoa me nwo bie.

²² Bɛte Hebrifoɛ anaa? Me wora nde bie. Bɛte Yisraelfoɛ anaa? Me wora nde bie. Bɛte Abraham boso ama anaa? Me wora nde bie.

²³ Bɛte Kristo asomvoɛ anaa? Medwudwo kyɛ ebiaa nnne adwene de oo, metra bɛ: mayɔ adwuma serɛ matra bɛ, mala kuku nu somaa matra bɛ, babo me pee batra bɛ, yeɛ ewue ato afo me pee atra bɛ.

²⁴ Yudafoɛ mbire bɔ befi ye aburanna ne, pɛen nnu mumua yeɛ bɛtetele so ngoko na bɛfale ye ngaa ne befini me ɔ.

²⁵ Baha me mbire koso pɛen nza, baboro me nyɔboɛ ko, ɛlɛen abutu me pɛen nza, yeɛ ɛpo koso fale me lili akɔneaba alehyeleɛ ne alesaleɛ ko.

²⁶ Matu atee pee na mali amia wɔ nzue so, awuefoɛ sa nu, me bɔbɔ me nwo ama bɛ sa nu, Amaenmaensofoɛ sa nu, kuro nu nningyein suronyi, ɛserɛ so suronyi, ɛpo so suronyi, yeɛ aliɛmaa ngondombofoɛ sa nu.

²⁷ Mayɔ adwuma mafɛ, mmerɛ pee mennya nnaa menna, ɛhɔen ne nzuhɔen ku me, metaa mekye hɔen, ɛyerɛ ku me, yeɛ ndaadeɛ bɔ ngowura abɔ me.

²⁸ Nna ɛhemɔ ngome, na mmom asɔre ne amukoraa nwo dadwene koso la me so ɛlɛho biala.

²⁹ Nwa yeɛ ɔyɛ mmerɛ a, ná me wora nnyɛle mmerɛ ɔ? Nwa yeɛ bɛmaa ɔkɔ bɔne nu a memvɛ yaa ɔ?

³⁰ Na sɛ odi kyɛ mehoahoa me nwo a, nningyein bɔ okyire kyɛ meyɛ mmerɛ yeɛ ngɔfa ngɔhoahoa me nwo ɔ.

³¹ Na Nyameɛ bɔ ɔte y’Awurade Yesu Kristo Baba, bɔ ɛkamvolɛ te ye deɛ daa daa ne, ɔse kyɛ membɛ ngondombo.

³² Ngɔle Damasko nen, amrado bɔ owura Nana Aretase bo ne fale asraafoɛ gyinagyinane kuro ne anu kyɛ bɛhye me,

³³ nakoso bɛfale me besiele kɛndɛenmboho bie anu, na bedwurale me bɛfale mboma bɔ ɔwɔ fasue ne anu maa nwati mvili ye sa nu.