2 Korintofoɛ 10 - AHYERƐLƐ KRONGRON

Pɔɔlo nwa ɔte somafoɛ turoloo

¹ Me, Pɔɔlo, mefa Kristo anwobrɛaseɛ ne ye dwolɛ bɔ odwo ne aso metu ɛmɔ foɛ; me bɔ me nye bɔ ɛmɔ nyunu a meyɛ me nwo anwumvoin anwumvoin, nakoso mefi ɛmɔ berɛ a mema m’ahone yɛ se wɔ ɛmɔ so ne.

² Mesrɛ ɛmɔ kyɛ sɛ meba ɛmɔ berɛ a, nnɛmɔyɛ maa meye m’ahoneserɛ ne ali; ofikyɛ mede medi kyɛ mekora mefa m’ahoneserɛ ne mekɔ mmenia biemɔ bɔ bebu yɛ kyɛ yɛnate anwoɔnaen nu atee so ne, bɛ so.

³ Ofikyɛ ɔwɔ nu kyɛ yɛbɔ yɛ bra wɔ anwoɔnaen nu de, nakoso yɛngo anwoɔnaen nu koɛ.

⁴ Ofikyɛ y’akodeɛ bɔ yɛfa yɛko ne ɔtte anwoɔnaen nu akodeɛ, na mmom ɔte Nyameɛ tumi akodeɛ bɔ yɛfa yɛdwiri anwoserɛ afealeɛ mɔ yɛgua ɔ.

⁵ Yɛfa yɛdi ngonim wɔ aporowaasulɛ nu ne nikyee biala bɔ ɔma ye nwo so tia Nyameɛ nwo nimdeɛ so, na yɛkakyi sona biala adwene maa ɔyɛ sotie ma Kristo.

⁶ Na yasiesie yɛ nwo kyɛ sɛ ɛmɔ sotieyɛlɛ di mu bɔkɔɔ a, yɛkotua asoserɛ biala so kerɛ.

⁷ Ɛ́mɔma yɛnea bɔ yɛ nye tua ɔ: sɛ ebie bu ye nwo kyɛ ɔte Kristo deɛ a, maa ɔdwene ye nwo bieku kyɛ, kyɛbɔ ɔte Kristo deɛ ne, sɔ ala yeɛ yɛ wora yɛte Kristo deɛ ɔ.

⁸ Awurade tumi bɔ ɔfa mane yɛ kyɛ yɛma ɛmɔnya ngɔsoɛ, na nna kyɛ yɛsɛkye ɛmɔ ne, sɛ mefa yɛ tumi ne mehoahoa me nwo maa ɔbo so kãa po a, ɔnyɛ me nya.

⁹ Na menguro kyɛ meyɛ me nwo kyɛ mefa me ngrataa menwunanwuna ɛmɔ;

¹⁰ ofikyɛ mmenia kekã kyɛ, “Ye ngrataa te anwunanwuna na nu sa yɛ se, nakoso sɛ ɔba wa a, ye noa yɛ mmerɛ, yeɛ ye noa dwirɛ koso mbɛ asue.”

¹¹ Na méma sɔ mmenia ne bɛte ye bo kyɛ, bɔ yɛkyerɛ ye krataa nu wɔ mmerɛ bɔ yɛnne ɛmɔ berɛ ne, sɔ ala yeɛ yɛwɔ ɛmɔ berɛ a yɛyɔ ɔ.

¹² Ɔnzɛ kyɛ yɛfa yɛ nwo yɛsusu, anaa yɛtoto ebiemɔ bɔ bɛkamvo bɛ bɔbɔ bɛ nwo ne, ofikyɛ mmenia bɔ bɛfa bɛ nwo besusu bɛ nwo bɛ nwo, na basa bafa batoto bɛ nwo bɛ nwo ne, bɛnze nworɛ.

¹³ Nakoso yɛ de, yɛngɔhoahoa yɛ nwo ma ɔngɔbo so, na mmom kyɛbɔ asusudeɛ bɔ Nyameɛ afa ama yɛ kyɛ yɛdwu ɛmɔ berɛ ne ɔte ne ala.

¹⁴ Na yɛndwe yɛ nu ma ɔndra so kyɛ ebiaa yandwu ɛmɔ berɛ ɔ, ofikyɛ yɛ yeɛ yɛlili moa yɛfale Kristo nwo nzɛmba ne yɛpɛle atee yɛtoale ɛmɔ ɔ.

¹⁵ Yɛ de, yɛnhoahoa yɛ nwo ma ɔndra so, yɛmva ebiemɔ adwuma bɔ bayɔ yɛnhoahoa yɛ nwo. Na mmom yɛle anyelasoɛ kyɛ, sɛ ɛmɔ gyidie nyi a, ɔkɔma dwumadie bɔ Nyameɛ afa awura yɛ sa wɔ ɛmɔ berɛ ne kɔtrɛ,

¹⁶ amaa yahora yaha nzɛmba ne wɔ nekaa foforɛ mɔ, na yamva ebie adwuma bɔ wayɔ ye dada wɔ nekaa bie yanhoahoa yɛ nwo.

¹⁷ “Ma ebiala bɔ ɔhoahoa ye nwo ne, ɔfa Awurade hoahoa ye nwo.”

¹⁸ Ofikyɛ nna sona bɔ ɔkamvo ye nwo ne yeɛ ɔsɔ Awurade nye ɔ, na mmom bɔ Awurade kamvo ye ne yeɛ ɔsɔ ye nye ɔ.