2 Ahemvo 9 - AHYERƐLƐ KRONGRON

Elisa maa bɛpopa Yehu ngoo

¹ Na ngɔmhyɛlɛfoɛ fekue ne, ngɔmhyɛlɛniɛ Elisa frɛle bɛ nu ko sele ye kyɛ, “Bɔ w’abɔsoɛ, fa sɔ ngoo towaa he tira, na kɔ Ramote Gileade.

² Sɛ edwu dɔ a, pena Yehu bɔ ye baba ole Yehosafate, bɔ ye baba ole Nimisi ne. Ye mmango bɔ ɔne bɛ tete berɛ ne, maa odwɔso fi bɛ nu, ná fa ye kowura sua nu.

³ Afei ngoo towaa ne, hwie gua ye ti so, ná se ye kyɛ, ‘AWURADE nwa: Mapopa wɔ ngoo mafa wɔ mali Yisrael so hene.’ Eyie a, bukye anoa ne nwati kɔ. Nnɛyɛ ngyɛkyerɛ biala.”

⁴ Yiti ngɔmhyɛlɛniɛ aberandeɛ ne sili nu hɔle Ramote Gileade.

⁵ Ɔhɔle ne, né safohene nemɔ bayia nu. Na ɔfa tole dwaa kyɛ, “Safohene, wɔ ngraa wɔ me berɛ.” Yeɛ Yehu bisale kyɛ, “Yɛ nu nwa ɔ?” Na obuale kyɛ, “Wɔ ɔ, safohene.”

⁶ Yiti Yehu dwɔso hɔle sua nu. Ngɔmhyɛlɛniɛ aberandeɛ ne hwiele ngoo ne guale ye ti so, na osele ye kyɛ, “AWURADE Yisrael Nyameɛ nwa: Mapopa wɔ ngoo mafa wɔ masie AWURADE maen Yisrael so hene.

⁷ Odi kyɛ eku wɔ mene Ahabo ye awuro ama, amaa ɔnate so matɔ Yesebɛl so wereɛ, ɔnate me somvoɛ ngɔmhyɛlɛfoɛ nemɔ bɛ mogya, ɔne AWURADE somvoɛ amukoraa bɛ mogya so ti.

⁸ Ofikyɛ odi kyɛ eku Ahabo awuro ama amukoraati. Ngohũ Ahabo awuro ama bienzua biala wɔ Yisrael, kyɛ ɔte dehyeɛ oo, anaa akoaa oo.

⁹ Nikyee bɔ mva nyɔle Nebate awa Yeroboam awuro ama, ɔne bɔ mva nyɔle Ahiya awa Baasa awuro ama ne, sɔ ala yeɛ ngɔfa ngɔyɔ Ahabo awuro ama ɔ.

¹⁰ Ngyea yeɛ bekoli Yesebɛl naen wɔ Yesreel mbɔtam ɔ, na ebiala ngonya ye fuin ngosie ye.” Afei ngɔmhyɛlɛniɛ ne obukyele anoa ne nwati hɔle.

¹¹ Yehu sa wale ye mene ye safohene nemɔ anwo berɛ ne, bebisale ye kyɛ, “Nikyee biala te bɔkɔɔ de? Nzu ati yeɛ akoaa bɔnamvoɛ ne wale wɔ berɛ ɔ?” Yehu buale bɛ kyɛ, “Naa ɛmɔse sɔ biaa ne, ɔne kyɛbɔ osi kekã ye dwirɛ ɔ.”

¹² Bebuale ye kyɛ, “Anoanu! Nea nu kã kyire yɛ!” Yiti Yehu sele kyɛ, “Edwirɛ bɔ ɔhã hyirele me ɛhe, ‘AWURADE nwa: Mapopa wɔ ngoo mafa wɔ masi Yisrael so hene.’ ”

¹³ Berɛ ne ala bɛyeyele bɛ ndaadeɛ amukoraa bɛsesɛle aseɛnwo berɛ ma Yehu natele so. Behuli totorobɛndo, na bɛbɔle ohomoo kyɛ, “Yehu ali hene oo!”

Yehu ku Yisrael hene Yoram

¹⁴ Na Yehu bɔ ye baba ole Yehosafate, bɔ ye baba ole Nimisi ne, ɔbɔle Yoram ti so porɛ. Né Yoram ne Yisrael koɛhonɛfoɛ amukoraa baboa bɛ noa bɔ bɛbɔ Ramote Gileade nwo waen befi Siria hene Hasael sa nu ɔ.

¹⁵ Nakoso mmerɛ bɔ Nana Yoram ɔne Siria hene Hasael bɛɛhone koɛ ne, ɔnate epuralɛ bɔ Siriafoɛ bepurale Nana Yoram ne ati, né wasa ye si wahɔ Yesreel kyɛ ɔkwaatoto ye nwo. Yiti Yehu hane kyɛ, “Sɛ ɛmɔpene so kyɛ medi hene a, ye de edwirɛ bɔ wasi ye, nnɛma ebiala fi wa ɔkɔ Yesreel ɔkɔkã.”

¹⁶ Yeɛ Yehu tenane ye teaseɛnam nu hɔle Yesreel, nekaa bɔ Yoram né ɔtoto ye nwo ne. Né Yuda hene Ahasia wawa berɛ kyɛ ɔbaafua Yoram nwo.

¹⁷ Yehu ne ye lɔen bepingyele Yesreel ne, wɛmvoɛ bɔ ogyina kuro berɛ abandenden ne aso ne, onwuni bɛ kyɛ bɛba ɔ, na ɔhane kyɛ, “Manwu ɛlɔen bie.” Yeɛ Yoram sele kyɛ, “Soma pɔngɔhanɛniɛ maa ooyia bɛ na obisa bɛ kyɛ, ‘Ɔte bɔkɔɔ anaa?’ ”

¹⁸ Yiti pɔngɔhanɛniɛ ne ooyiale Yehu, na osele ye kyɛ, “Nana nwa mmisa wɔ kyɛ, ‘Ɔte bɔkɔɔ anaa?’ ” Yeɛ Yehu buale kyɛ, “Asomdwee nwo dwirɛ de, ɔfa wɔ nwo nzu? Baali me si!” Wɛmvoɛ ne maa bɛɛbɔle Nana Yoram amaneɛ kyɛ, “Ɛbɔfoɛ ne waadwu bɛ nwo berɛ, nakoso wanza wamma.”

¹⁹ Yiti ɔsomane pɔngɔhanɛniɛ bɔ ɔtɔ so nyɔ ɔ maa ɔhɔle bɛ berɛ oosele bɛ kyɛ, Nana nwa mmisa kyɛ, ‘Ɔte bɔkɔɔ anaa?’ Na Yehu buale kyɛ, “Asomdwee nwo dwirɛ de, ɔfa wɔ nwo nzu? Baali me si!”

²⁰ Wɛmvoɛ ne maa bɛɛbɔle Nana Yoram amaneɛ bieku kyɛ, “Ɛbɔfoɛ ne waadwu bɛ nwo berɛ, nakoso wanza wamma. Sona bɔ ɔkã teaseɛnam ne, ɔkã ye te kyɛ Nimisi awa Yehu, ofikyɛ ye de, ye teaseɛnamhanɛ te basabasa.”

²¹ Yeɛ Yoram hane kyɛ, “Ɛ́mɔsiesie me teaseɛnam bɛma me kekesaala ye.” Na besiesiele ye teaseɛnam bɛmane ye. Yeɛ Yisrael hene Yoram ne Yuda hene Ahasia besili nu, ebiala te ye teaseɛnam nu, na bɛhɔle kyɛ bɛkwaayia Yehu. Beyiale ye wɔ Yesreelniɛ Nabɔto ye aseɛ ne aso.

²² Yoram nwuni Yehu pɛ, obisale ye kyɛ, “Yehu, ɔte bɔkɔɔ anaa?” Na obuale ye kyɛ, “Wɔ aberɛ bɔ eni Yesebɛl ɔtɛ so mmosoen ná ɔtɛ tira ahɔenlilɛ nu ne, ɔkɔyɛ sɛɛ né asomdwee awa?”

²³ Yeɛ Yoram kakyili ye nwo kyɛ ɔnwati, na ɔteane nu sele Ahasia kyɛ, “Ahasia, wayɛ lɔen oo!”

²⁴ Yehu le ye anwoserɛ amukoraa tole ye agyaen ne. Agyaen ne wurale Yoram mvorɔma nu maa ɔɔwɔle ye ahone nu, na ɔtɔle wɔ ye teaseɛnam ne anu.

²⁵ Na Yehu sele ye bɔbɔ ye bokafoɛ Bideka kyɛ, “Kuku ye fi teaseɛnam ne anu, ná findi ye to Yesreelniɛ Nabɔto aseɛ ne aso. Na kaye kyɛ mmerɛ bɔ mene wɔ yɛbɔle nu yɛhane teaseɛnam yɛlili ɔse Ahabo si ne, AWURADE hane sɔ dwirɛ he fale ye nwo kyɛ,

²⁶ ‘AWURADE nwa: Nabɔto mogya ne ye mma mɔ mogya bɔ nwuni ye anoma nen, meta ndaen kyɛ sɔ aseɛ ne aso ala yeɛ ngotua wɔ so kerɛ ɔ.’ Yiti pagya ye findi ye to aseɛ ye aso, kyɛbɔ AWURADE ahã ne ala.”

Yehu maa beku Ahasia

²⁷ Mmerɛ bɔ Yuda hene Ahasia nwuni bɔ ɔkɔ so ne, ɔfale ye nye hyirele Bete Hagan atee so kyɛ ɔnwati. Yehu foane ye, na Yehu hane kyɛ, “Ɛ́mɔto agyaen behũ ye koso.” Na bɛtole agyaen bɛwɔle ye wɔ teaseɛnam ne anu wɔ Gure pambaa bɔ opingye Yiblim ne aso. Yeɛ Ahasia nwati hɔle Megido, na oowuli dɔ.

²⁸ Ye mbanyi mɔ soale ye fuin teaseɛnam nu bɛhɔle Yerusalem, na beesiele ye wɔ ye bɔbɔ ye asieleɛ nu wɔ nekaa bɔ besiele ye mbanyi mɔ ɔ, wɔ Dawide kuro.

²⁹ Ahabo awa Yoram lili bia ne, ye afoɛ bɔ ɔtɔ so buru ne ko ne anu, Ahasia lili Yuda so hene.

Yesebɛl wue

³⁰ Yehu wale Yesreel nen, Yesebɛl tele ye nga. Yesebɛl kekane ye nye asi, ɔbɔle ye ti, na ɔfale ye nye tɛle mboma nu.

³¹ Mmerɛ bɔ Yehu ɔkwaawura kuro berɛ pambim ne anu nen, Yesebɛl bisale ye kyɛ, “Simri bɔ ahu wɔ mene ɔ, aso ɛwale ye asomdwee nu?”

³² Yehu pagyale ye nye neane mboma ne anu, na obisale kyɛ, “Nwa yeɛ ɔwɔ me bue nu ɔ? Nwa yeɛ ɔwɔ me bue nu ɔ?” Yeɛ sayɛɛ nyɔ anaa nza huli bɛ nye ase mboma nu bɛneane Yehu.

³³ Yehu hane kyɛ, Ɛ́mɔfindi ye bɛto aseɛnwo faen.” Yiti befindini Yesebɛl bɛtole aseɛnwo. Ye mogya ne bie bɔ petene terɛ ne anwo ɔne mbɔngɔ bɔ betiatiale ye so nemɔ nwo.

³⁴ Afei Yehu wurale ahemvie berɛ odidili ɔnone. Ɔhane kyɛ, “Ɛ́mɔnea bɛpena nekaa besie braa busueniɛ ne, ofikyɛ ɔse te hene.”

³⁵ Nakoso bɛhɔle kyɛ bɛkwaasie ye ne, benwuni kyɛ waha ye ti kokuroka ne ye gya tasaa ne ye sa tasaa angome.

³⁶ Besa bɛwale bɛɛbɔle Yehu amaneɛ ne, ɔhane kyɛ, “AWURADE dwirɛ bɔ ɔnate ye somvoɛ Tisibeniɛ Elia so hane ne yeɛ wawa nu ɔ. AWURADE nwa, ‘Yesreel mbɔtam berɛ yeɛ ngyea koli Yesebɛl naen ɔ.

³⁷ Yesebɛl fuin kɔto kɔpete aseɛ ne aso kyɛ ewura wɔ Yesreel mbɔtam, amaa ebiala annwu kyɛ Yesebɛl ɔ.’ ”