2 Ahemvo 8 - AHYERƐLƐ KRONGRON

Sunamniɛ braa ne sa kã ye aseɛ

¹ Né Elisa ahã ahyire braa bɔ otingyele ɔwa bienzua fili ewue nu ne kyɛ, “Ɛne w’awuro ama mɔ, ɛ́mɔdwɔso, na ɛmɔtu bɛɛtena nekaa biala bɔ ɛmɔkonya ɔ; ofikyɛ AWURADE baama ɛhɔen piri ba aseɛ ye aso afoɛ nzoo.”

² Yiti braa ne yɔle kyɛbɔ Nyameɛ sona ne hane ne ala. Ɔne ye awuro ama betuli bɛɛtenane Filistifoɛ maen nu afoɛ nzoo.

³ Afoɛ nzoo ne sone, bɔ braa ne fi Filistifoɛ maen nu sa wale ne, ɔfa ɔɔtole Yisrael hene nyunu kyɛ ye awuro ne ye aseɛ bɔ wafi ye sa ne, ode ye nikye.

⁴ Yisrael hene ne Gehasi, bɔ ɔte Nyameɛ sona ne somvoɛ ne, né bedi ngɔmɔ. Na osele Gehasi kyɛ, “Kekã anwanwadeɛ amukoraa bɔ Elisa wayɔ ne kyire me.”

⁵ Ogu so bɔ ɔbɔ Yisrael hene amaneɛ kyɛbɔ Elisa tingyele awufoɛ wale ngoa nu ne, braa bɔ Elisa tingyele ɔwa ne, ɔwale Yisrael hene berɛ ɔɔfale ye awuro ne ye aseɛ nwo dwirɛ tole ye nyunu. Na Gehasi sele kyɛ, “Nana, me mene, braa ne, ɔne ɔwa bɔ Elisa tingyele ye wale ngoa nu ne, bɛ ɛhe.”

⁶ Yisrael hene bisale braa ne nen, braa ne fa tole Gehasi deɛ ne aso. Yiti Yisrael hene yele panyi ko mane ye kyɛ, “Nea ma ye sa hã ye nningyein amukoraa, ná afei esikaa bɔ banya ye bafi ye boo nu amukoraa ofi kyẽa bɔ otuli wa bɔ ɔbaadwu ɛnɛ ye, bɛ́fa bɛ́boka so.”

Siria hene Ben Hadade wue

⁷ Elisa hɔle Damasko wɔ mmerɛ bɔ né anwonyerɛ abɔ Siria hene Ben Hadade ɔ. Bɛbɔle ye amaneɛ kyɛ, “Nyameɛ sona ne, wawa wa” nen,

⁸ Ben Hadade sele Hasael kyɛ, “Fa akyɛdeɛ kɔ ná konwu Nyameɛ sona ne. Fa ye so bisa AWURADE noa dwirɛ, kyɛ aso sɔ anwonyerɛ bɔ wabɔ me ye, ngɔte apɔ a.”

⁹ Yiti Hasael fale akyɛdeɛ, ɔne Damasko nningyein paa ahoroɔ soale afupɔngɔ aburanna, na ɔhɔle Elisa berɛ. Hasael oogyinane ye nyunu ne, Hasael sele kyɛ, “W’akoaa Siria hene Ben Hadade wasoma me wɔ berɛ kyɛ mmamisa wɔ kyɛ, ‘Aso sɔ anwonyerɛ bɔ wabɔ me ye, ngɔte apɔ anaa?’ ”

¹⁰ Elisa buale ye kyɛ, “Kɔhã kyire ye kyɛ, ‘Hmmm, ɛkɔte apɔ amba’, nakoso AWURADE aye ahyire me kyɛ nahorɛ nu okowu.”

¹¹ Ɔneane ye nyunu haa kɔpem kyɛ afei de ye nyunu yɛle basaa. Afei, Nyameɛ sona ne suni.

¹² Na Hasael bisale kyɛ, “Me mene, nzu ati yeɛ esu ye?” Na Elisa buale kyɛ, “Ofikyɛ mese bɔne bɔ ɛkɔfa koli Yisraelfoɛ ɔ. Bɛ nguro bɔ babɔ ye nwo waen nemɔ, ɛkɔto bɛ nu see, ɛkɔfa ngrandɛ kohũhũ bɛ mmerandeɛ mɔ, ɛkɔte bɛ mma mmaa mmaa mɔ ti kɔbɔ nikyee nu kohũ bɛ, ná bɛ pemvoɛ mɔ koso, ɛkɔpakyepakye bɛ kunu.”

¹³ Yeɛ Hasael buale kyɛ, “W’akoaa, kyea ba bɔ ɔte kyɛ me ɔ, me yeɛ nne nwa bɔ ngɔhora ngɔbɔ sɔ musue piri he ɔ?” Na Elisa buale kyɛ, “AWURADE aye ahyire me kyɛ wɔ yeɛ ɛbaali Siria so hene ɔ.”

¹⁴ Yiti ofili Elisa nwo berɛ hɔle ye mene Ben Hadade dɔ. Na Ben Hadade bisale ye kyɛ, “Nzikyɛ dwirɛ yeɛ Elisa hã hyirele wɔ ɔ? Obuale ye kyɛ, “Ɔhã hyirele me kyɛ, Ɛkɔte apɔ amba.”

¹⁵ Nakoso aleɛ hyene ne, Hasael fale kundu bɔ ɔsɛ bɛen ne aso ne, ɔloale ye, na ɔfa munduni Ben Hadade ye ti kɔpem kyɛ owuli ɔ. Na Hasael fale ye bia ne lili.

Yehoram di Yuda so hene

¹⁶ Yisrael hene Ahabo ɔwa Yoram lili hene ne, ye afoɛ bɔ ɔtɔ so nnu ne anu, Yuda hene Yehosafate ɔwa Yehoram lili Yuda so hene.

¹⁷ Yehoram lili bia ne, né wali afoɛ aburasa ne nyɔ, na ɔtenane bia so afoɛ mmɔtwɛ wɔ Yerusalem.

¹⁸ Ɔyɔle bɔne bɔ Yisrael ahemvo bɛyɔle ne bie, kyɛbɔ Ahabo boso ama bɔ belili bia ne, bɛyɔle ne ala, ofikyɛ ogyale Ahabo awa brasua. Ɔyɔle bɔ ɔte bɔne wɔ AWURADE nyunu ɔ.

¹⁹ Nakoso AWURADE anzɛkye Yuda, ɔnate ye somvoɛ Dawide ti. Ofikyɛ né wahyɛ Dawide bɔ kyɛ ye boso ama koli bia afebɔɔ.

²⁰ Yehoram mmerɛ so, Edom yɛle Yuda nwo lɔen, na besili bɛ bɔbɔ bɛ hene.

²¹ Yoram ne ye teaseɛnam amukoraa bɛpɛle nu bɛhɔle Sairi. Ɔhɔle kɔngɔen ɔɔfale koɛ tetale Edomfoɛ ne bɛ teaseɛnam safohene mɔ bɔ né bapɛ ye nwo bayia ne, nakoso Yoram koɛhonɛfoɛ nemɔ de bɛnwatili bɛhɔle awuro.

²² Yiti Edom ayɛ Yuda nwo lɔen maa waadwu ɛnɛ. Sɔ mmerɛ ne ala koso, Libina koso yɛle lɔen.

²³ Afei Yoram nwo dwirɛ ngaa ne, ɔne bɔ ɔyɔle amukoraa, amba, bahyerɛ ye wɔ Yuda ahemvo nwo dwirɛ nwomaa ne anu.

²⁴ Yoram toale ye mbanyi mɔ, na besiele ye wɔ nekaa bɔ besiele ye mbanyi mɔ ɔ, wɔ Dawide kuro, na ɔwa bienzua Ahasia lili ye bia.

Ahasia di Yuda so hene

²⁵ Yisrael hene Ahabo awa Yoram lili hene ne, ye afoɛ buru ne nyɔ ne anu, Yuda hene Yehoram ɔwa Ahasia lili Yuda so hene.

²⁶ Ahasia lili bia ne, né wali afoɛ aburanyɔ ne nyɔ. Olili hene afoɛ ko wɔ Yerusalem. Oni ole Atalia bɔ ɔte Yisrael hene Omri ye anomaa ne.

²⁷ Ahabo boso ama bɔ belili bia ne, bɔne bɔ bɛyɔle ne, ye koso ɔyɔle bie. Ɔyɔle bɔ ɔte bɔne wɔ AWURADE nyunu ɔ, kyɛbɔ Ahabo boso ama bɛyɔle ne ala, ofikyɛ né Ahabo awuro ama bɛ sia bienzua ɛne.

²⁸ Ahasia ne Ahabo awa Yoram bɛfale koɛ bɛɛtetale Siria hene Hasael wɔ Ramote Gileade. Na Siriafoɛ purale Yoram wɔ berɛ.

²⁹ Mmerɛ bɔ Yoram ne Siria hene Hasael bɛhone koɛ ne, ɔnate epuralɛ bɔ Siriafoɛ bepurale Nana Yoram wɔ Rama ne ati, osa wale Yesreel kyɛ ɔbaatoto ye nwo. Yuda hene Ahasia bɔ ye baba ole Yehoram ne, ɔɔpasale Ahabo awa Yoram nwo wɔ Yesreel, ofikyɛ né Yoram wapura.