2 Ahemvo 7 - AHYERƐLƐ KRONGRON

¹ Yeɛ Elisa buale kyɛ, “Ɛ́mɔtie AWURADE noa dwirɛ: AWURADE nwa nyoo, ‘Ɛhema bekye sɔa, bɛkɔfa esam paa kilo buru ne nyɔ bekole sekel ko, ná bafa ayuo kilo aburanyɔ ne nna bale sekel ko, wɔ Samaria dwaa nu.’ ”

² Yeɛ Yisrael hene safohene bɔ ode ye di paa ne sele Nyameɛ sona ne kyɛ, “Sɛ AWURADE tofitofi ewienu (ma ayuo tɔ gua ase) po a, aso ɛhe kɔhora kosi?” Nakoso Elisa buale ye kyɛ, “Ɛkɔfa wɔ nye konwu ye, nakoso engoli bie.”

Kwatafoɛ biemɔ ma Siriafoɛ nwati

³ Mmienzua kwatafoɛ nna biemɔ, bɔ né bɛte kuro berɛ pambim ne asi dɔ ɔ, besisele bɛ nwo kyɛ, “Nzu ati yeɛ odi kyɛ yɛtena wa ma ɛhɔen ku yɛ maa yɛwu ɔ?

⁴ Sɛ yɛkã kyɛ yɛkɔ kuro ne aso dɔ a, ɛhɔen wɔ dɔ, na ɛhɔen kɔmaa yɛkowu dɔ. Nakoso sɛ yɛtena wa a, ye koso ɛhɔen kɔmaa yɛkowuwu. Yiti ɛ́mɔma yɛhɔ Siriafoɛ b’asikyeleɛ ne anu dɔ. Sɛ bɛyakyi yɛ maa yɛnya yɛ ti yɛdidi nu a, ye de yɛ ti ngoa. Nakoso sɛ beku yɛ koso a, ewue komapɛ ne ala ɔ.”

⁵ Yiti bedwɔsole nɔsoa kyɛ bɛkɔ Siriafoɛ asikyeleɛ ne anu, nakoso beedwuli asikyeleɛ ne anwo ne, né sona fee nne berɛ.

⁶ Ofikyɛ né AWURADE ama Siria koɛhonɛfoɛ nemɔ bate teaseɛnam mɔ, mbɔngɔ mɔ, ɔne koɛhonɛfoɛ lɔen kandinga nga wɔ bɛ so anu, bɔ ɔnate so maa besisele bɛ nwo kyɛ, “Yisrael hene waabɔ Hiti ahemvo ne Misraim ahemvo mɔ paa kyɛ bɛɛfa koɛ bɛtoa yɛ.”

⁷ Yiti koɛhonɛfoɛ nemɔ nwatili nɔsoa ne bɛyakyili b’ɛtena sua mɔ, bɛ mbɔngɔ mɔ ɔne b’afunum mɔ wɔ b’asikyeleɛ ne anu berɛ, na bɛ nu biala nwatili penane ye ti didili nu.

⁸ Kwatafoɛ nemɔ beedwuli asikyeleɛ ne anwo ne, beewurale ɛtena sua ko anu, na bedidili bɛnone, na bɛsesale ɛdwetɛ, esikaa kɔkorɛ ne ndaadeɛ, na befili berɛ bɛfa bɛɛfeale. Besa bɛwale, beewurale ɛtena sua ko bieku anu, na bɛsesale nu nningyein ne bie bɛfa bɛɛfeale.

⁹ Yeɛ besisele bɛ nwo kyɛ, “Nikyee bɔ yɛyɔ ye, ɔtte mayee. Ɛnɛ te ndɛenvɛen kyẽa. Sɛ yammɔ so ná yɛtena berɛ ma aleɛ kye a, yɛkoli ye nwo fɔ. Yiti ɛ́mɔma yɛhɔ ahemvie yɛɛbɔ amaneɛ.”

¹⁰ Yiti bɛɛfrɛfrɛle kuro berɛ pambim awɛmvoɛ nemɔ bɛbɔle bɛ amaneɛ kyɛ, “Yɛhɔle Siriafoɛ asikyeleɛ ne anu, nakoso yannwu sona fee, yeɛ yande sona fee nga wɔ dɔ. Bɔ yɛnwuni ala yeɛ ole mbɔngɔ ne afunum mɔ bɔ bamendamenda bɛ ɔ, ɔne b’ɛtena sua mɔ kyɛbɔ bɛyakyili bɛ berɛ bɛhɔle ne ala.”

¹¹ Na pambim awɛmvoɛ nemɔ teateane nu bɛbɔle ahemvie berɛ ama amaneɛ.

¹² Yisrael hene dwɔsole kɔngɔen ne ala, na osele ye mbanyi mɔ kyɛ, “Ɛ́mɔma ngyire ɛmɔ ngaen bɔ Siriafoɛ basua yɛ ɔ. Bɛse ye kyɛ ɛhɔen ku yɛ, yiti bafi b’asikyeleɛ ne anu baafeafea eburo, na b’adwene ole kyɛ, ‘Sɛ Yisraelfoɛ befi bɛ kuro ne anu befite a, yɛkɔhyehye bɛ anyekaenn so, ná yanya ate yawura kuro ne anu.’ ”

¹³ Ye mbanyi nemɔ ko buale kyɛ, “Ma mmenia ne bie bɛfa mbɔngɔ bɔ baha nemɔ anu nnu ná ɛ́mɔma yɛsoma bɛ maa bɛɛnea. Ofikyɛ mbɔngɔ bɔ baha wa ne, bekowuwu kyɛ Yisrael ɛlɔen bɔ bawuwu ne ala.”

¹⁴ Yiti betuli mmenia, na Yisrael hene somane bɛ maa bɛfale teaseɛnam nyɔ bɔ mbɔngɔ sosɔ bɛ ɔ bɛpole Siria koɛhonɛfoɛ nemɔ aso kyɛ, “Ɛmɔhɔ bɛɛnea bɔ wasi ɔ.”

¹⁵ Bɛpole Siriafoɛ so alaa beedwuli asue Yɔɔdan noa. Mmerɛ bɔ Siriafoɛ bɛnwati, bɔ né bɛ nwo kã bɛ tɛtɛtɛtɛ ne, bɛ ndaadeɛ ne akodeɛ bɔ befindini beguale ne, ɛbɔfoɛ nemɔ nwuni bɛ wɔ atee ne aso. Yiti ɛbɔfoɛ nemɔ besa bɛwale bɛɛbɔle Yisrael hene amaneɛ.

¹⁶ Yeɛ Samariafoɛ fitele bɛɛfene Siriafoɛ asikyeleɛ ne anu nningyein. Ɔnate so, bɛfale esam paa kilo buru ne nyɔ belele sekel ko, yeɛ bɛfale ayuo kilo aburanyɔ ne nna belele sekel ko, kyɛbɔ AWURADE hane ne ala.

¹⁷ Na Yisrael hene tuli ye safohene bɔ ode ye di paa ne kyɛ oogyina pambim ne anyunu berɛ ɔɔtoto nningyein yé. Na ɛlɔen ne tiatiale ye so behuni ye wɔ pambim ne anyunu berɛ, kyɛbɔ Nyameɛ sona ne hane ala, wɔ mmerɛ bɔ Yisrael hene hɔle ye berɛ ne.

¹⁸ Ofikyɛ mmerɛ bɔ Nyameɛ sona ne hã hyirele Yisrael hene kyɛ, “Ɛhema bekye sɔa, bɛkɔfa ayuo kilo aburanyɔ ne nna bekole sekel ko, ná bafa esam paa kilo buru ne nyɔ bale sekel ko, wɔ Samaria dwaa nu” ne,

¹⁹ sɔ safohene ne buale Nyameɛ sona ne kyɛ, “Sɛ AWURADE tofitofi ewienu (ma ayuo tɔ gua ase) po a, aso ɛhe kɔhora kosi?” Nakoso Elisa buale kyɛ, “Ɛkɔfa wɔ nye konwu ye, nakoso engoli bie.”

²⁰ Sɔ ala pɛpɛɛpɛ yeɛ ɔtole safohene ne ɔ. Ɛlɔen ne tiatiale ye so behuni ye wɔ pambim ne anyunu berɛ.