2 Ahemvo 6 - AHYERƐLƐ KRONGRON

Elisa ma akumaa turu asue nye

¹ Afei ngɔmhyɛlɛfoɛ fekue ne, besele Elisa kyɛ, “Kyɛbɔ wɔ bɔbɔ anwu ye ne, nekaa bɔ yɛte maa ɛnea yɛ so ne, ɔte kãa ma yɛ.

² Yiti yɛsrɛ wɔ, maa yɛhɔ asue Yɔɔdan noa, na yɛ nu biala ɔpɛ bakaa ko, na yɛɛsi sua wɔ dɔ yɛtena nu.” Na Elisa buale kyɛ, “Ɛmɔhɔ.”

³ Yeɛ bɛ nu ko hane kyɛ, “Wɔ somvoɛ mɔ, yɛsrɛ wɔ, ɛne yɛ hɔ.” Na obuale kyɛ, “Yoo, me ne ɛmɔ yɛkɔhɔ.”

⁴ Yiti ɔne bɛ hɔle. Beedwuli asue Yɔɔdan noa ne, bɛhyɛle ye bo bɛpepɛle mmakaa.

⁵ Nakoso bɛ nu ko gu so bɔ ɔpɛ bakaa ne, ye akumaa ne tuli ɔɔtɔle asue ne anu. Na ɔteane nu kyɛ, “Ao, me mene, ngɔnzrɛle oo!”

⁶ Yeɛ Nyameɛ sona ne bisale kyɛ, “Nisua yeɛ ɔɔtɔle ɔ?” Ohyirele Elisa nekaa bɔ ɔtɔle ɔ. Elisa pɛle bakaa ofindini tole nekaa bɔ ɔtɔle ne, na ɔmane akumaa ne turuli asue ne anye.

⁷ Elisa sele kyɛ, “Ma so.” Yiti ɔtengyɛle ye sa fale.

Elisa ma Yisrael di Siriafoɛ so ngonim

⁸ Mmerɛ bie bɔ Siria hene fale koɛ ɔɔtetale Yisrael ne, Siria hene ne ye mbanyi mɔ bɛbɔle porɛ, na ɔhane kyɛ, “Sɔ nekaa he yeɛ ngɔkyekye me koɛ asikyeleɛ ɔ.”

⁹ Nakoso Nyameɛ sona ne fale ngraa ɔɔmane Yisrael hene kyɛ, “Nea yé né angɔamva dɔ, ofikyɛ Siriafoɛ kɔɔkyekye asikyeleɛ wɔ dɔ.”

¹⁰ Yiti koɛhonɛfoɛ bɔ bɛwɔ nekaa bɔ Nyameɛ sona ne abɔ ye nwo kɔkɔ ne, Yisrael hene maa bɛɛbɔle bɛ amaneɛ. Ɔmaa bɛɛbɔle bɛ amaneɛ mmerɛ pee maa bɛlale bɛ nwo so.

¹¹ Nikyee bɔ né ɔkɔ so ne, ɔhale Siria hene adwene paa. Yiti ɔfrɛle ye mbanyi nemɔ bisale bɛ kyɛ, “Yɛ nu nwa yeɛ ɔyɛ a, ɔkɔte yɛ bo kyire Yisrael hene ye?”

¹² Yeɛ ye mbanyi nemɔ ko buale kyɛ, “Me mene, Nana, nna yɛ nu biala ɔ, na mmom Yisrael ngɔmhyɛlɛniɛ Elisa ɔ. Ye yeɛ edwirɛ bɔ ekosusu ye nwo wɔ wɔ pumbu nu ne, ɔkã kyire Yisrael hene ɔ.”

¹³ Na Siria hene sele kyɛ, “Ɛmɔhɔ bɛɛpena nekaa bɔ Elisa wɔ ɔ, na ngɔsoma maa bɛkɔɔhye ye.” Bebuale kyɛ, “Ɔwɔ Dotan.”

¹⁴ Yiti Siria hene somane koɛhonɛfoɛ pee maa bɛfale mbɔngɔ ne teaseɛnam mɔ bɛhɔle dɔ. Beedwuli kɔngɔen, na bɛpɛle kuro ne anwo beyiale.

¹⁵ Nyameɛ sona ne, ye somvoɛ ne dwɔsole ngyerɛmɔ tutuutu. Na ofitele ne, onwuni kyɛ koɛhonɛfoɛ bɔ bɛtete mbɔngɔ so ne teaseɛnam mɔ nu ɔ bapɛ kuro ne anwo bayia ɔ. Ye somvoɛ ne hane kyɛ, “Me mene, yawu oo! Ɛhe de, yɛyɛ ye sɛ?”

¹⁶ Elisa buale kyɛ, “Nnesuro, ofikyɛ yɛ lɔen bɔ begyi yɛ si ne, bɛsone bɛtra bɛ lɔen deɛ ne.”

¹⁷ Yeɛ Elisa bɔle mbaeɛ kyɛ, “Ao AWURADE, mesrɛ wɔ, te ye nye maa onwu nikye bɔ ɔkɔ so ɔ.” Yiti AWURADE tele somvoɛ ne nye. Na onwuni kyɛ mbɔngɔ ne see teaseɛnam mɔ bayɛ mitimiti wɔ bokaa ne aso bapɛ Elisa nwo amukoraa bayia ɔ.

¹⁸ Siriafoɛ nemɔ hɔle Elisa so ne, Elisa bɔle mbaeɛ hyirele AWURADE kyɛ, “Mesrɛ wɔ, ma mmenia hemɔ bɛ nye osi.” Yiti Nyameɛ mane bɛ nye sini kyɛbɔ Elisa srɛle ne ala.

¹⁹ Na Elisa sele bɛ kyɛ, “Nna atee ne ɛhe, yeɛ nna kuro ne ɛhe. Ɛ́mɔli me si maa mva ɛmɔ ngɔ sona bɔ ɛmɔpena ye ne berɛ.” Yiti olili bɛ nyunu fale bɛ hɔle Samaria.

²⁰ Beedwuli Samaria pɛ, Elisa bɔle mbaeɛ kyɛ, “Ao AWURADE, te mmenia ye mɔ anye maa benwu bɔ ɔkɔ so ɔ.” Yiti AWURADE tele bɛ nye, na benwuni kyɛ saa bɛwɔ Samaria.

²¹ Yisrael hene nwuni Siriafoɛ nemɔ nen, obisale Elisa kyɛ, “Me baba, ngukũ bɛ anaa? Ngukũ bɛ anaa?”

²² Nakoso Elisa buale kyɛ, “Daabi, nnɛkũkũ bɛ. Aso mmenia bɔ ɛkɔfa wɔ ngrandɛ ne w’agyaen kɔhye bɛ nnure ne, odi kyɛ ekũkũ bɛ anaa? Brɛ bɛ aleɛ ne nzue maa bedidi na bɛno, na maa besa bɛhɔ bɛ mene dɔ.”

²³ Yiti Yisrael hene tole poen kandinga mane bɛ, na bedidili bɛnone beyiele ne, ɔmane bɛ ate, na besa bɛhɔle bɛ mene dɔ. Na Siriafoɛ bamma kyɛ bɛbaabɔ apaa wɔ Yisrael aseɛ so ko.

Ben Hadade tua Samaria

²⁴ Ɛhe asi ne, Siria hene Ben Hadade boaboale ye koɛhonɛfoɛ amukoraa noa. Ɔfale koɛ ɔɔtetale Samaria, na otuale kuro ne.

²⁵ Ɔnate kyɛ ɔhɔle so tuale Samaria ne ati, ɛhɔen pohonandafe bie wale kuro ne aso. Ɔnate so, né bɛfa afunum ti ko bede ɛdwetɛ sekel aburawɔtwɛ, yeɛ né bɛfa abubure ye bondua kongo bue bede ɛdwetɛ sekel nnu.

²⁶ Ɛlɛho bie, né Yisrael hene nate kuro berɛ fasue ne aso. Na braa bie teane nu sele ye kyɛ, “Nana, me mene, boka me ee!”

²⁷ Na obuale kyɛ, “Sɛ AWURADE ammoka wɔ a, nisua yeɛ mekwaanya mmokalɛ mefa meboka wɔ ɔ: nekaa bɔ bɛboro aburoo anaa nekaa bɔ betwi nzaa hɔ anaa?”

²⁸ Afei Yisrael hene bisale braa ne kyɛ, “Nzikyɛ dwirɛ ɔ?” Na obuale kyɛ, “Braa he hã hyirele me kyɛ, ‘Fa ɛwa bienzua ne maa yɛhu ye yɛto ye yɛli ɛnɛ, na ɛhema né mafa me deɛ maa yahu ye yato yali.’

²⁹ Yiti yɛhuni mma bienzua ne yɛtone ye yɛlili. Aleɛ hyene ne, nga ngyirele ye kyɛ, ‘Fa ɛwa bienzua ne maa yɛhu ye yɛto ye yɛli.’ Nakoso ye de, wafa ɔwa deɛ ne wafea.”

³⁰ Yisrael hene tele braa ne dwirɛ nen, osunzuale ye bɔbɔ ye ndaadeɛ nu. Ɔnate kyɛ né ɔnate kuro berɛ fasue ne aso ne ati, berɛ ama nwuni kyɛ ataadeɛ bɔ ɔwɔ ko bɔ wasunzua nu ne abo ne, ɔte ɛsɛen tena ataadeɛ.

³¹ Na ɔhane kyɛ, “Safate awa Elisa, sɛ ɛnɛ mande ye ti mamvi so a, Nyameɛ otua me kerɛ maa ɔbo so.”

³² Yiti ɔsomane sona kyɛ ɔhɔ Elisa berɛ. Né Elisa te ye awuro, bɔ né mbanyi mɔ tete ye nwo berɛ ɔ. Anzana bɔfoɛ ne baadwu berɛ ne, Elisa hã hyirele mbanyi nemɔ kyɛ, “Ɛmɔse kyɛ kodiawuniɛ ne, wasoma sona kyɛ ɔɔpɛ me ti ɔ? Sɛ bɔfoɛ ne badwu wa a, ɛmɔnea kyɛ ɛmɔkɔto anoa ne asi bɔ ongonya ate ngowura nu ɔ. Mete ye mene Yisrael hene ye gya bo so kyɛ oli ye si ɔba.”

³³ Na ogu so ɔne bɛ dwudwo ne, ɛbɔfoɛ ne wale ye berɛ osele kyɛ, “AWURADE yeɛ wama amaneɛ he awa ɔ! Nzu ati yeɛ odi kyɛ mekɔ so mefa me nwo meto ye so ɔ?”