2 Ahemvo 5 - AHYERƐLƐ KRONGRON

Elisa sa Naaman anwonyerɛ

¹ Naaman te Siria hene ye koɛhonɛfoɛ so safohene. Né ɔte sona titire bɔ ye mene Siria hene kuro ye dwirɛ ɔ, ofikyɛ ɔnate ye so, AWURADE mane Siria lili ngonim wɔ koɛ nu. Ɔwɔ nu kyɛ né biaa ne te koɛhonɛniɛ titire paa de, nakoso né kwata anwonyerɛ ayɛ ye.

² Siriafoɛ bɛbɔle apaa na bɛhyele Yisrael abaayaa bie nnure befili Yisrael aseɛ so bɛhɔle. Né sɔ abaayaa ne, ɔso Naaman aye.

³ Ɛlɛho bie, abaayaa ne sele ye mene aye ne kyɛ, “Sɛ me mene kɔ ngɔmhyɛlɛniɛ bɔ ɔwɔ Samaria ne berɛ a, ahaa ɔkɔsa ye kwata anwonyerɛ ne.”

⁴ Yiti edwirɛ bɔ abaayaa bɔ ofi Yisrael aseɛ so ne hane ne, Naaman ɔɔfa bɔle ye mene Siria hene amaneɛ pɛpɛɛpɛ.

⁵ Yeɛ Siria hene buale kyɛ, “Nzaade a kɔ, na ngɔhyerɛ krataa ngɔboka wɔ so ngɔɔma Yisrael hene.” Na Naaman fale ɛdwetɛ talɛnde buru, esikaa kɔkorɛ sekel apee nzia ne ndaadeɛ faa buru, na osili nu hɔle.

⁶ Ɔfale krataa ne ɔɔmane Yisrael hene. Nu dwirɛ ole kyɛ, “Mefa sɔ krataa he mebrɛ wɔ mekã mekyire wɔ kyɛ, mama me somvoɛ Naaman wawa wɔ berɛ kyɛ ɛsa ye kwata anwonyerɛ ne.”

⁷ Yisrael hene kengale krataa ne yiele pɛ, osunzuale ye bɔbɔ ye ndaadeɛ nu, na ɔhane kyɛ, “Aso nde Nyameɛ né mahora mama ewue anaa ngoa, bɔ yeɛ biaa ye ato me ngraa kyɛ nza biaa he kwata anwonyerɛ ɔ! Aso ɛmɔnea a, ɔmbena me ne ngondii!”

⁸ Nakoso Nyameɛ sona Elisa tele kyɛ Yisrael hene asunzua ye ndaadeɛ nu ne, ɔmaa beesele ye kyɛ, “Nzu ati yeɛ asunzua wɔ ndaadeɛ nu ɔ? Ma ɔbra me wa, amaa ɔnate so wanwu kyɛ ngɔmhyɛlɛniɛ wɔ Yisrael.”

⁹ Yiti Naaman ne ye mbɔngɔ ne teaseɛnam mɔ bɛwale, na beegyinane Elisa awuro anoa nu berɛ.

¹⁰ Yeɛ Elisa somane sona maa ɔɔhã hyirele ye kyɛ, “Kɔ na kobia asue Yɔɔdan nu pɛen nzoo, na wɔ nwonaen kosa kɔyɛ kyɛ ye daa ne ala, na wɔ nwo kɔte.”

¹¹ Nakoso Naaman fɛle yaa, ofili berɛ hɔle, na osele kyɛ, “Me de menwa nzɛ okofite kɔwa, ná waagyina wa wabɔ AWURADE ye Nyameɛ ne dumaa, ná wanwaha ye sa wɔ nekaa bɔ anwonyerɛ ne wɔ ne aso, ná wasa kwata anwonyerɛ ne!

¹² Damasko asue mɔ Abana ne Faapa, aso benni mu bɛndra Yisrael asue biala? Ahaa ye de mengomia bɛ nu ma me nwo nde?” Yiti ole ɛyaa kakyili ye nwo sili nu kyɛ ɔkɔ.

¹³ Nakoso ye somvoɛ nemɔ hɔle ye nwo berɛ beesele ye kyɛ, “Yɛ mene, sɛ ngɔmhyɛlɛniɛ ne, ɔhane kyɛ ɛyɔ nikyee serɛ bie po a, ahaa ɛngɔyɔ anaa? Na sɛ wahã wahyire wɔ kyɛ, ‘Kɔ bia asue nu ma wɔ nwo te’ a, nzu ati yeɛ ɛngɔyɔ ɔ?”

¹⁴ Yiti osili nu hɔle asue Yɔɔdan nu ɔɔtɔle nu pɛen nzoo, kyɛbɔ Nyameɛ sona ne hane ne ala. Na ye nwonaen sa tɔle so kyɛ akwadaa kaaba deɛ, na ye nwo tele.

¹⁵ Yeɛ Naaman, ɔne ye lɔen bɔ bɛboka ye so amukoraa, besa bɛhɔle Nyameɛ sona ne berɛ. Naaman oogyinane ye nyunu berɛ, na ɔhane kyɛ, “Afei de manwu kyɛ aseɛ ye aso amukoraa, Nyameɛ biala ɔnne neka fee sana Yisrael angome. Mesrɛ wɔ, de w’akoaa sa nu akyɛdeɛ ye.”

¹⁶ Nakoso Elisa buale kyɛ, “Kyɛbɔ AWURADE bɔ ngyi ye nyunu ye ɔte ase ye, mengole hwee!” Naaman hɔle so srɛle Elisa kyɛ ole ye akyɛdeɛ ne, nakoso wanne.

¹⁷ Yeɛ Naaman hane kyɛ, “Sɛ engole m’akyɛdeɛ ne po a, mesrɛ wɔ, maa bɛsa ɛwa nnɛterɛ somaa bɔ afunum nyɔ kɔhora ye soa ɔ bɛma w’akoaa. Ofikyɛ w’akoaa, mengɔbɔ naen yeralɛ afɔleɛ anaakyɛ afɔleɛ biala mengɔma nyameɛ foforɛ biala ko, sana AWURADE angome.

¹⁸ Nakoso w’akoaa, sɔ nikyee komapɛ he anwo de, mesrɛ AWURADE kyɛ ɔ́fa ɔ́hyɛ me. Ye ole kyɛ, sɛ me mene Siria hene kɔ bosoen Rimon so kyɛ ɔkwaasɔne wɔ berɛ, ná ɔkã kyɛ ngɔmmoka ye, maa ye sɔ ti mebɔ me nu ase mesɔne Rimon a, sɛ mebɔ me nu ase mesɔne Rimon a, w’akoaa, mesrɛ AWURADE kyɛ sɔ nikyee he angome de ɔfa hyɛ me.”

¹⁹ Na Elisa sele Naaman kyɛ, “Fa asomdwee kɔ.” Nakoso Naaman fili Elisa nyunu berɛ hɔle moa kãa ne,

Gehasi nye boro nikye

²⁰ Gehasi bɔ ɔte Nyameɛ sona Elisa somvoɛ ne, osusuli kyɛ, “Me mene ama sɔ Sirianiɛ Naaman ne, wafa ye nwo wali, ofikyɛ wanne akyɛdeɛ bɔ wafa wabrɛ ye ne. Kyɛ AWURADE te ase ye, ngɔpo ye so ngɔɔpena nikyee bie ngole ngofi ye dɔ.”

²¹ Yiti Gehasi pole Naaman so. Naaman nwuni kyɛ biaa bie le amirika oli ye si nen, odwu fili teaseɛnam ne anu ooyiale ye, na obisale ye kyɛ, “Ɔte bɔkɔɔ de?”

²² Na obuale ye kyɛ, “Ɔte bɔkɔɔ, na mmom me mene afa ngraa wasoma me wɔ berɛ kyɛ, ‘Ngɔmhyɛlɛfoɛ fekue ne anu mmenia nyɔ, befi Efraim mmokaa aseɛ ne aso dɔ bawa me wa kekesaala ye. Mesrɛ wɔ, ma bɛ ɛdwetɛ talɛnde ko ne ndaadeɛ faa nyɔ.’ ”

²³ Naaman buale kyɛ, “Mesrɛ wɔ, maa mma wɔ talɛnde nyɔ.” Naaman srɛle Gehasi, na ɔkyekyele ɛdwetɛ talɛnde nyɔ wɔ bɔtɔ nyɔ nu. Ɔfale ndaadeɛ faa nyɔ bokale so, na ɔfa mane ye somvoɛ nemɔ anu nyɔ maa bɛsoale belili Gehasi nyunu.

²⁴ Gehasi oodwuli bokaa ne aso ne, olele bɔtɔ nemɔ fili somvoɛ nemɔ berɛ ɔfa oosiele sua nu. Afei ɔmane bɛ ate maa bɛhɔle.

²⁵ Gehasi oogyinane ye mene Elisa nyunu, na Elisa bisale ye kyɛ, “Gehasi, ɛhɔle ni?” Obuale kyɛ, “Wɔ somvoɛ, nngɔle neka fee.”

²⁶ Nakoso Elisa sele ye kyɛ, “Mmerɛ bɔ biaa bie huru fili ye teaseɛnam nu ooyiale wɔ ne, aso nna me sunzum ɔne wɔ yeɛ bɛhɔle ɔ? Aso sɔ mmerɛ ye yeɛ odi kyɛ ede esikaa ne ndaadeɛ, olive boo ne bobe boo, mmoaen ne nandwie mɔ, ngoaa ne afaneɛ mɔ ɔ?

²⁷ Ɔnate ye sɔ ti, Naaman kwata anwonyerɛ ne kɔte kɔha wɔ ne wɔ boso ama so afebɔɔ.” Yiti Gehasi fili Elisa nyunu berɛ hɔle bɔ né kwata anwonyerɛ ayɛ ye ma ye nwo ayɛ horaenn kyɛ asukɔtwea ɔ.